ရောင်နီ/People’s Spring
ရန်ကုန်မြို့၊ စမ်းချောင်းမြို့နယ် ကျွန်းတောလမ်းပွဲဈေးပြုလုပ်သည့်ရက်များတွင် လျှပ်စစ်မီးပျက်မှုဆိုးရွားစွာဖြစ်နေကြောင်း အဆိုပါမြို့နယ်တွင် နေထိုင်သူများက ပြောသည်။
“မီးက အခုရက်တော်တော်ကို ပျက်တာ။ ကျွန်းတောပွဲဈေးနဲ့ ဆိုင်မဆိုင်တော့ မသိဘူး။ပျက်တာကတော့တော်တော်ကို ဆိုးတာ”ဟု စမ်းချောင်းမြို့နယ်၌ နေထိုင်သူတစ်ဦးက ပြောသည်။
ကျွန်းတောလမ်းပွဲဈေးကို ဒီဇင်ဘာ ၁၀ရက်တွင် စတင်ပြုလုပ်ခြင်းဖြစ်ပြီး ဒီဇင်ဘာ ၁၆ရက်အထိပြုလုပ်မည်ဖြစ်သည်။
Public Service Announcement
ယင်းပွဲဈေးပြုလုပ်သည့်ရက်တွင် မီးပျက်ချိန် ယခင်ထက် ပိုမိုများပြားလာပြီး ရေပျက်သည့် ဖြစ်ရပ်များလည်း ကြုံရကြောင်း ဒေသခံတစ်ဦးကပြောသည်။
လျှပ်မီးပေးရမည့် အချိန်တွင် တစ်နာရီပင် အပြည့်မရပဲ ပြန်ပျက်သွားကြောင်း စမ်းချောင်းမြို့နယ်၌ နေထိုင်သူအမျိုးသမီးတစ်ဦးကပြောသည်။
“အနေခက်၊ အစားခက် အသေခက်ဘဝကို လုံးလုံးရောက်နေပြီ ။မွန်းကြပ်မှုတွေအပြည့်နဲ့စာသိုက်အိမ်လိုအခန်းတွေမှာနေရတဲ့ဘဝမှာ ဘာအလုပ်မှမပြီးဘူး ။စိတ်ပျက်တယ်။ မပူလောင်ကြပါစေနဲ့။ ဒီတိုင်းပြည်မှာလူဖြစ်ရတဲ့ဘဝ ဝဠ်ကြွေးတွေလာဆပ်နေရတယ်”ဟု ၎င်းကပြောသည်။
ရန်ကုန်မြို့တွင် လျှပ်စစ်မီးကို အလှည့်ကျ ဖြင့်ပေးနေခြင်းဖြစ်ပြီး လက်ရှိတွင် တစ်ရက်လျှင် ရှစ်နာရီ မီးဖြတ်မည်ဟု ကြေညာထားသော်လည်း မီးလာချိန်များတွင်လည်း မလာကြောင်း ဒေသခံများက ပြောသည်။
