'/%3E%3C/svg%3E){kind=small}
ဟန်နွေ/People’s Spring
ကချင်ပြည်နယ် ဗန်းမော်မြို့နှင့် မံစီမြို့သိမ်းတိုက်ပွဲကို ကချင်လွတ်လပ်ရေးတပ်မတော်(KIA)နှင့် မဟာမိတ်များက ဆင်နွှဲလျက်ရှိရာ ယနေ့(ဒီဇင်ဘာ ၁၈ရက်)တွင် တိုက်ပွဲဆက်လက်ပြင်းထန်ခဲ့ကြောင်း ကချင်စစ်ရေး သတင်းရင်းမြစ်က ပြောသည်။
ဗန်းမော်နှင့် မံစီမြို့ရှိ လက်ကျန် စစ်ကောင်စီတပ်များကို KIAက ဒီဇင်ဘာ ၄ရက်တွင်စတင်ထိုးစစ်ဆင်ခဲ့ခြင်းဖြစ်ပြီး ပြီးခဲ့သည့် လေးရက်ခန့်ကစတင်၍ တိုက်ပွဲအနည်းငယ် ငြိမ်သက်နေရာ ယနေ့တွင် KIA က ပြန်လည်ထိုးစစ်ဆင်ခဲ့ခြင်းဖြစ်သည်ဟု ဆိုသည်။
“ဒီနေ့တော့ ဗန်းမော်နဲ့ မံစီဘက်မှာတိုက်ပွဲ တော်တော်ပြင်းထန်တယ်။ဗန်းမော်မြို့မှာက နေရာ သုံးနေရာလောက်ဖြစ်တယ်။ ပြီးတော့ မံစီဘက်မှာရော။မံစီမြို့နားက (၆၀၁)၊ (၃၁၉)နဲ့ (၅၂၃)တပ်ရင်း အဲဒါကို ထိုးစစ်ဆင်တာ။ ဗန်းမော်ဘက်မှာတော့ သုံးမိုင်ပတ်လည် လေယာဉ်ကွင်းနားမှာတိုက်ပွဲဖြစ်တာ။ ပြီးတော့ ၄၇ တပ်ရင်းဘက်မှာပြီးတော့ တက္ကသိုလ်ကျောင်းဝင်းဘက်မှာရော။ ဒီနေ့ ဗန်းမော်တိုက်ပွဲ တော်တော်ပြင်းထန်တာ။ လေကြောင်းပစ်ကူက ၆ကြိမ်၊ ၇ကြိမ်လောက်ရှိမယ်။ လေးရက်လောက်ငြိမ်ထားတာ အခုတော့ ပြန်စပြီ။ အခုက ဒုတိယလှိုင်းပေါ့” ဟု ကချင်စစ်ရေး သတင်းရင်းမြစ်က ပြောသည်။
Public Service Announcement
ဗန်းမော်မြို့သိမ်းစစ်ဆင်ရေးအတွင်း စစ်ကောင်စီ၏ ကာကင်းစခန်းနှင့် တပ်စွဲရာနေရာများကို KIAက သိမ်းပိုက်ရရှိထားသော်လည်း စစ်ရေးသတင်းလုံခြုံရေးအရ တိုက်ပွဲ အခြေအနေ အသေးစိတ်ကို သတင်းထုတ်ပြန်ခြင်းမရှိပေ။
သို့သော် တိုက်ပွဲကြောင့် ပြည်သူများအခက်အခဲများစွာ ကြုံနေရမှုကို KIA သတင်းပြန်ကြားရေးဌာနက ပြီးခဲ့သည့် ရက်ပိုင်းအတွင်း ဖော်ပြခဲ့သည်။
ဗန်းမော်မြို့အတွင်း စစ်ကောင်စီက လေကြောင်းတိုက်ခိုက်မှုများတိုးမြှင့်လုပ်ဆောင်နေ၍ မြို့တွင်းနေအိမ်များစွာ မီးလောင်ပျက်စီးလျက်ရှိသည်ဟု အသိပေးသည်။ တိုက်ပွဲပြင်းထန်လျက်ရှိပြီး ပြည်သူထိခိုက်သေဆုံးမှုရှိနေကြောင်း၊ ဖုန်း၊ အင်တာနက် လိုင်းများ ပိတ်ခံထား၍ တိုက်ပွဲအခြေအနေ ကို စုံစမ်းနေဆဲဖြစ်ကြောင်း KIA သတင်းပြန်ကြားရေး ဌာနက ဖော်ပြသည်။
မြို့ခံပြည်သူများ တိမ်းရှောင်နေသည်မှာ ၁၀ရက်ကျော်ပြီဖြစ်ပြီး ရေရှည်အတွက် စားဝတ်နေရေး အခက်အခဲဖြစ်နေကြောင်း၊ မြို့တွင်း ပိတ်မိပြည်သူအချို့ရှိနေပြီး စစ်ရှောင်များ ချိန်ထားခဲ့သည့် ပစ္စည်းများကို ခိုးယူသူများလည်း ရှိနေကြောင်း KIA သတင်းပြန်ကြားရေးဌာနက ဖော်ပြသည်။
