ဆိုင်းမင်း/People’s Spring
မကွေးတိုင်း ၊ ပခုက္ကူမြို့နယ်နဲ့ မြိုင်မြို့နယ်အစပ်က ကျေးရွာတွေကို စစ်ကောင်စီတပ်က စစ်ကြောင်းထိုးနေတာကြောင့် အရပ်သား ပြည်သူ တစ်သောင်းဝန်းကျင် ထွက်ပြေးတိမ်းရှောင်နေရတယ်လို့ ဒေသခံတွေဆီကသိရပါတယ်။
ပခုက္ကုမြို့နယ်အနောက်ဘက် နဲ့ မြိုင်မြို့နယ် တောင်ဘက်မှာရှိတဲ့ ရေလာလေးရွာက စစ်တပ်နဲ့ပျုစောထီးပူးတွဲထိုင်ထားတဲ့စခန်း ဒီဇင်ဘာ ၁၁ ရက်မှာ တိုက်ခိုက်ခံရပြီးနောက်မှာ အနီးတဝိုက်ကရွာတွေကို စစ်ကောင်စီတပ်က စစ်ကြောင်းထိုး တာတွေ လုပ်ဆောင်လာတာပါ။
ရေလာလေး ရွာ စခန်းကို စီးနင်းတိုက်ခိုက်မှုမှာ သေနတ် ၁၈ လက်နဲ့ သုံ့ပန်း ၇ ဦး ဖမ်းမိတယ်လို့ ဒေသတွင်းတော်လှန်ရေးအင်အားစု Earthquake people`s defence force က ထုတ်ပြန်ထားပါတယ်။
Public Service Announcement
” ရေလာလေးစခန်းသိမ်းပြီးကတည်းက ရွာတွေကိုတောက်လျှောက်စစ်ကြောင်းထိုးလာတာ၊ ထိတွေ့မှုတွေလည်းဆက်တိုက်ဖြစ်နေတယ်ဗျ ” လို့ ပခုက္ကူမြို့နယ်အခြေစိုက် တော်လှန်ရေးတပ်ဖွဲ့ဝင်ကပြောပါတယ်။
စစ်ကောင်စီတပ် စစ်ကြောင်းထိုးချိန် ပခုက္ကူမြို့နယ် ၊ဝါးကျွန်းတွင်းရွာ ၊ ထန်းတပင်နဲ့ ရေသာကြီးရွာတွေက ဒေသခံ ပြည်သူ ၃ ဦး သတ်ဖြတ်ခံခဲ့ရတယ်လို့ သိရပါတယ်။
ဒါအပြင် ထန်းတပင်နဲ့ ရေသာကြီးကျေးရွာကြားမှာ စစ်ရှောင်သက်ကြီးရွယ်အိုရောဂါနဲ့သေဆုံးတာကို သွားရောက်ကူညီပေးတဲ့ တော်လှန်ရေးရဲဘော် ၂ ဦး စစ်ကောင်စီတပ်ရဲ့ ပစ်ခတ်ခံရပြီး ၁ ဦး ကျဆုံးခဲ့ရတယ်လို့ ပခုက္ကူမြို့နယ်အခြေစိုက် တော်လှန်ရေးတပ်ဖွဲ့ဝင်က အသိပေးပါတယ်။
မနေ့ ဒီဇင်ဘာလ ၁၈ ရက် နေ့ခင်းပိုင်း ၂ နာရီခွဲဝန်းကျင်မှာ မြိုင်မြို့နယ် ၊ဝက်ကြုံးကျေးရွာအနီး တိုက်ပွဲဖြစ်ပြီး ရွာကို စစ်ကောင်စီတပ်က မီးရှို့သွားတယ်လို့ ဒေသခံတွေကပြောပါတယ်။
ဒီဇင်ဘာလ ၁၁ရက်ကစတင်ပြီး ပခုက္ကူနဲ့ မြိုင်မြို့နယ်အတွင်းက ဝက်ကြုံး၊ ရေလာကြီး၊ ဝါးကျွန်းတွင်း၊ ပြည့်အိုင်၊ ထန်းတပင်၊ရွာသာအေး၊ ပဒိုင်းကော၊ အောင်သာ၊ ရေမျက် ၊ ဖောင်ကျောင်းစတဲ့ ကျေးရွာကြီး၁၀ရွာခန့်က ပြည်သူ တစ်သောင်းနီးပါးဟာ ထွက်ပြေးတိမ်းရှောင်နေတာလို့ သိရပါတယ်။
ဓာတ်ပုံ – နွေဦးတော်လှန်ရေး – မြိုင်မြို့
