အိမ်သွင်/People’s Spring
ချင်းပြည်နယ်၊ မင်းတပ်မြို့သိမ်းတိုက်ပွဲအတွင်းမှ ထွက်ပြေးလာသော စစ်ကောင်စီတပ်ဖွဲ့ဝင်များမှာ ယောဒေသ၊ ကျောက်ထုမြို့နယ်အတွင်းရောက်ရှိနေပြီး အမြောက်တပ်က လက်နက်ကြီးများပစ်ကူပေး၍ လမ်းရှင်းပေးနေကြောင်း တော်လှန်ရေးအဖွဲ့များနှင့် ဒေသခံအချို့ကပြောသည်။
“မင်တပ်က ပြေးလာတာ ၃၀ကျော်၄၀လောက်ရှိမယ်။ ကျောက်ထုနယ်ဘက်ကို ပြေးလာကြပြီး ကာကွယ်ရေးတပ်တွေက လိုက်ပိတ်နေတယ်။ ဒါကို စစ်တပ်က လက်နက်ကြီးပစ်ပြီး လမ်းရှင်းပေးနေတာ။ ရွာတွေကတော့ လက်နက်ကြီးရန်ကြောက်လို့ ရှောင်ကြရတယ်”ဟု ကျောက်ထုမြို့ခံတစ်ဦးကပြောသည်။
မင်းတပ်မြို့နှင့် ကျောက်ထုမြို့သို့ ၁၈ မိုင်ဝန်းကျင်ကွာဝေးသည်။ ကျောက်ထုမြို့သည် မကွေးတိုင်းဒေသကြီး၊ ဂန့်ဂေါခရိုင်၊ ဆောမြို့နယ်မှ မြို့နယ်ခွဲအဆင့်ရှိ မြို့ဖြစ်သည်။
Public Service Announcement
မင်းတပ်မြို့ကို ချင်းညီနောင်စစ်ဆင်ရေးအဖြစ် ချင်းညီနောင်နှင့်မဟာမိတ်များဖြစ်ကြသည့် Yaw Defense Force (YDF)၊ Yaw Army (YA)၊မုံရွာခရိုင်တပ်ရင်း(၃)တို့နှင့်အတူ CDF မင်းတပ်က နိုဝင်ဘာ ၉ ရက်မှ စတင်တိုက်ခိုက်ခဲ့ပြီး ဒီဇင်ဘာ ၂၁ရက်တွင် သိမ်းပိုက်ခဲ့သည်။ စစ်ကောင်စီတပ်ဖွဲ့ဝင် ၁၂၃ဦးနှင့် မိသားစုဝင်များ လက်နက်ချအညံ့ခံခဲ့သည်ဟု CDF မင်းတပ်က ထုတ်ပြန်ထားသည်။
ထို့အပြင် စစ်ကောင်စီတပ်သား ၃၀ထက်မနည်း ထွက်ပြေးလွတ်မြောက်သွားကြောင်း ပြည်သူ့ကာကွယ်ရေးတပ်ဖွဲ့များထံမှသိရပြီး လက်ရှိတွင် ကျောက်ထုအမြောက်တပ်သို့ ထွက်ပြေးနေကြောင်း ဒေသခံအချို့က ပြောသည်။
စစ်ကောင်စီက ဒီဇင်ဘာ၂၂ရက်ညကစ၍ လက်နက်ကြီးများ အဆက်မပြတ်ပစ်ခတ်နေ၍ ဒေသခံများအား တော်လှန်ရေးတပ်ဖွဲ့များက သတိပေးထားသည်။
မင်းတပ်မြို့သိမ်းတိုက်ပွဲတွင်ပါဝင်ခဲ့သည့် ယောတပ်တော်(YA)က ယောဒေသလွတ်မြောက်ရေးအတွက်မဟာမိတ်တပ်များနှင့်ပူးပေါင်း၍ စစ်ရေးအရှိန်မြှင့် တိုက်ပွဲဝင်သွားမည်ဟု ဒီဇင်ဘာ ၂၄ရက်နေ့က ကြေညာခဲ့သည်။
ပထဝီအနေအထားအရ နယ်မြေကျောချင်းကပ် တသားတည်းဖြစ်နေသော အိမ်နီးချင်း ချင်းပြည်နယ် ၏ လွတ်မြောက်မှုသည် ယောဒေသ ပြည်သူလူထုတို့၏ လုံခြုံမှုဖြစ်ပြီး ယောဒေသ၏ လွတ်မြောက်မှုသည်လည်း အိမ်နီးချင်းမဟာမိတ်များအတွက် လုံခြုံမှုဖြစ်သည်ဟု YAက ထုတ်ပြန်ထားသည်။
ချင်းညီနောင်က ၂၀၂၄ ဇွန်လ ၂၉ ရက်နေ့တွင်မတူပီမြို့သိမ်းခဲ့ရာ တွင်လည်း စစ်သားနှင့် မိသားစု စုစုပေါင်း၆၀၀ ကျော် မကွေးတိုင်းအတွင်းသို့ထွက်ပြေးခဲ့ကြသည်။လမ်းခရီး နှင့် ရာသီတုကြမ်းတမ်းခြင်း ၊ အစာရေစာပြတ်လတ်ခြင်း၊ချင်းညီနောင်တပ်ဖွဲ့ဝင်များကလိုက်လံ တိုက်ခိုက်ရာ ထွက်ပြေးစစ်သား အများအပြားသေဆုံးခဲ့ပြီး လက်နက် တစ်ရာကျော်ရရှိခဲ့ကြောင်း ချင်းညီနောင်ကထုတ်ပြန်ခဲ့သည်။ ထိုအပြင် ထွက်ပြေးစစ်သားများထဲမှဇူလိုင် ၆ရက် နေ့တွင် ဗိုလ်မှူး ရဲမင်းထွန်းအပါဝင် အရာရှိ ၄ဦး၊ အရပ်သားတစ်ဦးနှင့် စစ်သည် အချို့ စုစုပေါင်း ၁၂ဦးသည် စစ်ကြောင်းမှ ခွဲထွက်လာပြီး ချင်းညီနောင်ထံအလင်းဝင်ခဲ့သည်။
