■ကူတော်ရဲစခန်းမှ စစ်ကောင်စီတပ်သားများစခန်းကိုစွန့်ခွာထွက်ပြေးဟုကနဦးသတင်းရရှိ
ဘုတလင်မြို့နယ်တွင် တကျော့ပြန်စစ်ကြောင်းထိုးလာသည့် စစ်ကောင်စီတပ်ကဖမ်းဆီးထားသည့် အသက်၂၀ကျော်အရပ်သားလူငယ်တဦးကို သေနတ်ဖြင့်ပစ်ခတ်သတ်ဖြတ်သွားသည်။
အင်အား ၁၀၀ ကျော်ပါဝင်သည့်စစ်ကောင်စီစစ်ကြောင်းသည် ဘုတလင်မြို့နယ်အတွင်း ဒီဇင်ဘာလ၁၉ရက်မှစ၍ လှည့်လည်၍စစ်ကြောင်းထိုးနေခြင်းဖြစ်သည်။ အဆိုပါစစ်ကြောင်းသည် ဒေသခံ၁၀၀ ကျော်ကိုလည်းဖမ်းဆီးထားသည်။
ဇန်နဝါရီ ၁ ရက်နံနက်ပိုင်းတွင် စစ်ကောင်စီပစ်ခတ်သွားသည့် လူငယ်တဦး၏ရုပ်အလောင်းကို ဘုတလင်မြို့၊ ခုံမင်းကြီးရပ်တွင် တွေ့ရှိခြင်းဟု ဒေသခံတစ်ဦးကပြောသည်။
Public Service Announcement
“ထွက်ပြေးလို့ ပစ်သတ်သွားတာလို့ယူဆတယ်။ ခေါင်းကိုပစ်ထားတာ ကျည်ဆံတွေပါတွေ့တယ်” ဟု ဒေသခံတဦးကပြောသည်။
သေဆုံးသူသည် အသက် ၂၂ ခန့် အမျိုးသားတစ်ဦးဖြစ်သည်။ ၎င်းနှင့်ပတ်သက်သော အသေးစိတ်အချက်အလက်ကိုမသိရသေးပေ။
စစ်ကောင်စီစစ်ကြောင်းသည် ဇန်နဝါရီ ၁ ရက်ညနေပိုင်းတွင် ဘုတလင်မြို့ပေါ်နှင့် ကူတော်ရဲစခန်းဝန်းကျင်၌ ရှိနေသည်။
ဇန်နဝါရီ ၁ ရက်ညတွင် ထပ်မံရရှိသောသတင်းအရ တော်လှန်ရေးတပ်များကအကြိမ်ကြိမ်တိုက်ခိုက်ခဲ့သော ကူတော်ရဲစခန်းမှ စစ်သားနှင့်ရဲများသည် စခန်းကို စွန့်ခွာထွက်ပြေးသွားပြီဖြစ်ကြောင်း မုံရွာခရိုင် အမှတ် (၂၀)တပ်ရင်း (BOB)က ထုတ်ပြန်အသိပေးထားသည် ။အသေးစိပ်အချက်အလက်များကို People’s Spring စုံစမ်းနေဆဲဖြစ်ပါသည်။
ပြီးခဲ့သည့်စက်တင်ဘာလ၃၁ရက်နေ့ကတော်လှန်ရေးတပ်များ၏ တိုက်ခိုက်ခံရသော ကူတော်ရဲစခန်းသို့ စစ်ကူသွားပြီးနောက် ပြန်လာသည့် အင်အား ၈၅ဦးပါ စစ်ကောင်စီတပ် စစ်ကြောင်းကို ပြည်သူ့ကာကွယ်ရေးတပ်ဖွဲ့များက တိုက်ခိုက်ခဲ့ရာ စစ်ကြောင်းတခုလုံးပျက်စီးသွားပြီးနောက် စစ်ကောင်စီက လေကြောင်းတိုက်ခိုက်မှုများ၊ မြေပြင်စစ်ကြောင်းထိုးမှုများပြုလုပ်ခဲ့သည်။ စစ်ကြောင်းထိုးစဉ် ဒေသခံ၂၄ဦးထက်မနည်းကို သတ်ဖြတ်ပြီး ဒေသခံများ၏ နေအိမ် ၇၀၀ထက်မနည်းကို မီးရှို့ဖျက်ဆီးအကြမ်းဖက်ခဲ့သည်။
ထိုစစ်ကြောင်းသည် နိုဝင်ဘာလ ၁၄ရက်တွင် မုံရွာမြို့ရှိအနောက်မြောက်တိုင်းစစ်ဌာနချုပ်သို့ ပြန်လည်ဝင်ရောက်သွားခဲ့ပြီး ဒီဇင်ဘာလ၁၉ရက်တွင် တကျော့ပြန်ရောက်ရှိလာခြင်းဟု သိရသည်။
