ဇေအောင်/People’s Spring
ဘုတလင်မြို့နယ်အတွင်းရောက်ရှိနေသော စစ်ကောင်စီတပ်စစ်ကြောင်းသည် ဒီဇင်ဘာ ၂၈ ရက်က ကူတော်ရွာသို့ထွက်ခွာလာစဥ် ကင်းစမ်းကျေးရွာအနောက်ဘက်တွင် တော်လှန်ရေးရဲဘော်တစ်ဦးအား ဖမ်းဆီးသတ်ဖြတ်သွားကြောင်း ဒေသခံများက ပြောသည်။
“ရပ်ကျေးရဲဘော်တစ်ဦးပါ။ နာမည်က ရှမ်းပုတ်တဲ့။ အသက်ကတော့ ၂၀ ပါ။”ဟု အဆိုပါဒေသရှိ တော်လှန်ရေးရဲဘော်တစ်ဦးက ပြောသည်။
အဆိုပါ စစ်ကြောင်းအား တော်လှန်ရေးအဖွဲ့များက ပစ်ခတ်တိုက်ခိုက်မှုများ ပြုလုပ်ခဲ့ပြီး စစ်ကောင်စီတပ် ထိခိုက်မှုရှိနိုင်သည်ဟု တော်လှန်ရေးအင်အားစုများက ဆိုသည်။
Public Service Announcement
ကျဆုံးရဲဘော်၏ ရုပ်အလောင်းအား မီးလောင်ကျွမ်းလျက်တွေ့ရှိရပြီး မီးရှို့သတ်ဖြတ်ခြင်းဟုတ်၊မဟုတ် အတည်ပြုနိုင်ခြင်း မရှိသေးပေ။
စစ်ကောင်စီတပ် စစ်ကြောင်းသည် မုံရွာမြို့ အနောက်မြောက်တိုင်းစစ်ဌာနချုပ်(နမခ)မှ ထွက်ခွာလာခြင်းဖြစ်ပြီး ဒီဇင်ဘာ ၂၅ ရက်ကတည်းက မုံရွာ-ဘုတလင်လမ်းတလျှောက် ကျေးရွာများအား စစ်ကြောင်းထိုးနေခြင်းဖြစ်ကြောင်း၊ ဒေသခံပြည်သူများအား လူသားဒိုင်းအဖြစ် ဖမ်းဆီးနေ၍ ကျေးရွာ ၁၀ရွာထက်မနည်း ထွက်ပြေးတိမ်းရှောင်နေရကြောင်း သိရသည်။
ယနေ့ (ဒီဇင်ဘာ ၃၀ ရက်) နေ့လယ်ပိုင်းတွင် အဆိုပါစစ်ကြောင်းသည် ဖမ်းဆီးထားသော ဓားစာခံပြည်သူများအားခေါ်ဆောင်ကာ ဘုတလင်မြို့ဘက်သို့ ဦးတည်နေကြောင်း သိရသည်။
စစ်ကောင်စီတပ်သည် အောက်တိုဘာအတွင်းက ဘုတလင်မြို့နယ်အတွင်းရှိ ကျေးရွာများအား စစ်ကြောင်းထိုး မီးရှို့ပြီး ပြည်သူ ၂၀ထက်မနည်း ဖမ်းဆီးသတ်ဖြတ်ခဲ့သည်။ ထို့အပြင် စီပါရွာတွင်မူ ရုပ်အလောင်းများအား တစ်စစီခုတ်ထစ်ဖြတ်တောက်၍ ခြံစည်းရိုးဝင်းပေါ်တွင် တင်သွားခဲ့ဖူးသည်။
အလားတူ ဒီဇင်ဘာ ၁၉ ရက်ကလည်း ဘုတလင်မြို့နယ်၊ အင်တိုင်းကျေးရွာကို စစ်ကောင်စီက လေကြောင်းတိုက်ခိုက်ရာ အသက် (၈)နှစ်အရွယ်ကလေး အပါအဝင် ပြည်သူ ၂ဦး ထိခိုက်ဒဏ်ရာရရှိခဲ့ပြီး စာသင်ကျောင်းနှင့် ဘုန်းကြီးကျောင်း ပျက်စီးခဲ့သည်။
