တာရာ/People’s Spring
စစ်ကောင်စီ က ပြည်တွင်းထုတ်ချက်ဆီဖြစ်သည့်ဓာတ်ဆီများကို( Ron-68)ဟုဆိုကာနေပြည်တော် နှင့် မန္တလေးမြို့ရှိ နိုင်ငံပိုင် စက်သုံးဆီဆိုင်များတွင် စတင်ရောင်းချနေသည်။
ထိုစက်သုံးဆီများကို ဇန်နဝါရီ ၄ ရက်က စတင်ပြီး အဆိုပါမြို့ကြီးနှစ်မြို့တွင် တစ်လီတာကို ကျပ် ၂၂၀၀နှင့် ရောင်းချပေးနေကြောင်း စစ်ကောင်စီက ထုတ်ပြန်ထားသည်။
“ဒီဆီတွေက ကားတွေမှာ သုံးလို့မရဘူး။ကားတွေမှာသုံးရင် အင်ဂျင်တွေပျက်တယ်။ ဆိုင်ကိုယ်နဲ့ သုံးဘီးဆိုင်ကယ်တွေမှာပဲ သုံးလို့ရမယ်”ဟု ယာဥ်မောင်းတဦးကပြောသည်။
Public Service Announcement
စက်သုံးဆီရောင်းချမှုကို စစ်ကောင်စီစွမ်းအင်ဝန်ကြီးဌာနက တဖြည်းဖြည်းထိန်းချုပ်ထားသည်။ ယခုအခါ ပြည်တွင်းထုတ် ချက်ဆီကိုနိုင်ငံပိုင်စက်သုံးဆီများက စတင်ရောင်းချလာပြီးဖြစ်၍ စစ်ကောင်စီက ယခင်စစ်အစိုးရများကဲ့သို့ စက်သုံးဆီကို နိုင်ငံပိုင်လုပ်ငန်းများကသာရောင်းချပြီး ဈေးကွက်ကိုထိန်းချုပ်လာမည်ကိုစိုးရိမ်ကြောင်းလုပ်ငန်းရှင် တဦးကပြောသည်။
စစ်တပ်အာဏာသိမ်းပြီးနောက်ပိုင်း ပြည်ပရင်းနှီးမြှပ်နှံမှုအများစုထွက်ခွာသွားပြီး အသစ်ဝင်ရောက်မှုနည်းပါးခြင်း ၊ကုန်သွယ်ရေးကျဆင်းခြင်း ၊နိုင်ငံတကာမှ မြန်မာနိုင်ငံသို့ အစိုးရမှတဆင့် ကူညီမှုလျော့ကျခြင်း စသည်တို့ကြောင့် စစ်အုပ်စုအတွက် ဒေါ်လာနှင့် နိုင်ငံခြားငွေ ဝင်ရောက်မှုလျော့နည်းလာသည်။ နိုင်ငံခြားငွေဝင်ရောက်မှုနည်းသော်လည်း စစ်ကောင်စီက နိုင်ငံတဝန်းတိုက်ပွဲများတွင်တိုက်ခိုက်ရန် လက်နက်ခဲယမ်းနှင့် လေယာဥ်ဆီ ကို ပိုဝယ်နေသဖြင့် နိုင်ငံခြားငွေအများစုကို ၎င်းတို့အာဏာတည်မြဲရေးအတွက် စစ်တိုက်ရန်သာ သုံးလိုပြီး နိုင်ငံသားများအသုံးပြုရန် ဒေါ်လာဖြင့်ဝယ်ရသော စက်သုံးဆီမှ စကာမဖြစ်မနေသုံးရသော ဆေးဝါးအထိ စစ်ကောင်စီက ပြည်ပမှတင်သွင်းမှုလျော့ချနေခြင်းဖြစ်သည်။
စက်သုံးဆီကိုလည်း နိုင်ငံခြားငွေ အသုံးပြုရမှူနည်းစေရန် စစ်ကောင်စီကပြည်ပမှတင်သွင်းမှုလျော့ချရန် အစီအစဥ်၏ တစိပ်တပိုင်းအဖြစ် RON-68 ဆီများထုတ်ရောင်းလာခြင်းဖြစ်သည်။
“ဒီဆီတွေ နဲ့ သင့်တော်တဲ့ ဓာတ်ဆီက အခုချိန်မှာမရှိတော့ဘူး”ဟု စက်မှုအင်ဂျင်နီယာတစ်ဦးကလည်း RON 68 ၏ ဆီအရည်အသွေးနိမ့်ပါးမှုအပေါ် မှတ်ချက်ပြုသည်။
စစ်ကောင်စီက ချက်ဆီများကို ရှမ်းပြည်နယ်နှင့်ပဲခူးတိုင်းတို့တွင်လည်း ဆက်လက်ရောင်းချမည်ဟုဆိုသည်။
ချက်ဆီများကိုစစ်ကောင်စီကသန်လျင်ရေနံချက်စက်ရုံ၊ ချောက်ရေနံချက်စက်ရုံနှင့် သံပုရာကန်ရေနံချက်စက်ရုံများတွင်ထုတ်လုပ်နေခြင်းဖြစ်သည်။
စစ်ကောင်စီလက်အောက်ခံ မြန်မာ့ရေနံထွက်ပစ္စည်းရောင်းဝယ်ရေးလုပ်ငန် (အမ်ပီပီအီး)တွင် နိုင်ငံပိုင်ဆီဆိုင် ၁၆ ဆိုင်ရှိပြီး အရပ်သားအစိုးရလက်ထက်တွင် ပုဂ္ဂလိပိုင်ပြုလုပ်ရန်စီစဉ်ထားခဲ့သောဆိုင်များဖြစ်ပြီး စစ်တပ်အာဏာသိမ်းခဲ့၍ ပုဂ္ဂုလိကသို့ လွှဲပြောင်းမပေးခဲ့ရသေးခြင်းဖြစ်သည်။
