ထရမ့် ကျမ်းသစ္စာကျိန်ဆိုပြီး နာရီပိုင်းအကြာမှာ ရှီနဲ့ ပူတင် အွန်လိုင်းကနေ ချိတ်ဆက်ဆွေးနွေး

အမေရိကန် သမ္မတအဖြစ် ဒေါ်နယ်လ်ထရမ့် ကျမ်းသစ္စာ ကျိန်ဆိုပြီးတဲ့နောက် အမေရိကန်ရဲ့ ပြိုင်ဘက် စူပါပါဝါ နှစ်နိုင်ငံ ခေါင်းဆောင်တွေ ဗီဒီယိုဖုန်း ခေါ်ဆိုပြီး အွန်လိုင်းကနေ ချိတ်ဆက် အစည်းအဝေး လုပ်ခဲ့ကြပါတယ်။

တရုတ် သမ္မတ ရှီကျင့်ဖျင်နဲ့ ရုရှား သမ္မတ ဗလာဒီမာ ပူတင်တို့ဟာ ဇန်နဝါရီ ၂၀ ရက်နေ့တုန်းက ဝါရှင်တန် ဒီစီမြို့တော်မှာ ထရမ့်က အမေရိကန်ရဲ့ ၄၇ ဆက်မြောက် သမ္မတအဖြစ် ကျမ်းသစ္စာကျိန်ဆိုပြီးတဲ့နောက် နာရီပိုင်း အကြာမှာ အွန်လိုင်းကနေ ချိတ်ဆက် အစည်းအဝေး လုပ်ခဲ့တာ ဖြစ်ပါတယ်။

နှစ်နိုင်ငံစလုံးရဲ့ အစိုးရ မီဒီယာတွေက အဲဒီ ဆွေးနွေးမှုအတွင်း တရုတ်-ရုရှား ပူးပေါင်း ဆောင်ရွက်မှုတွေမှာ ပိုမို ကောင်းမွန် မြင့်မားတဲ့ အခြေအနေဆီ မြှင့်တင်ဖို့ အသီးသီး ကတိပြုခဲ့ကြတယ်လို့ ဖော်ပြသွားပါတယ်။

ရှီက ပူတင်ကို ခင်မင်ရင်းနှီးတဲ့ မိတ်ဆွေကောင်း တစ်ဦးလို့ ညွှန်းဆိုခဲ့ပြီး တရုတ်-ရုရှား ဆက်ဆံရေးဟာ ခင်မင်မှု၊ အပြန်အလှန် ယုံကြည်မှုနဲ့ ထောက်ခံ အားပေးမှုတွေအပေါ် အခြေတည် တည်ဆောက်ထားတာလို့ ပြောကြားခဲ့ပါတယ်။

Public Service Announcement

ထရမ့်ဟာ ကျမ်းသစ္စာ ကျိန်ဆိုတဲ့နေ့မှာပဲ တရုတ်အပေါ် ကုန်သွယ်ရေးဆိုင်ရာ အခွန်အသစ်တွေ စည်းကြပ်ဖို့ စဉ်းစားနေကြောင်း ပြောကြားခဲ့သလို ယူကရိန်းစစ်ပွဲ အမြန်ဆုံး ရပ်ဆိုင်းရေး မညှိနှိုင်းရင် ရုရှားဟာ ပြဿနာ အကြီးကြီး တက်လိမ့်မယ်လို့ သတိပေးခဲ့ပါတယ်။

အမေရိကန်ဟာ ယူကရိန်း စစ်ပွဲမှာ ရုရှားအတွက် လိုအပ်တဲ့ စစ်လက်နက်တွေ ထုတ်လုပ်နိုင်ဖို့ အပိုပစ္စည်း အစိတ်အပိုင်းတွေ ထောက်ပံ့ပေးနေကြောင်း အမေရိကန်ရဲ့ စွပ်စွဲမှုကိုလည်း ခံထားရပါတယ်။

ရှီနဲ့ ပူတင်တို့ရဲ့ ဆွေးနွေးမှုဟာ အချိန် တစ်နာရီခွဲလောက် ကြာခဲ့ပြီး တောင်ကိုရီးယား နိုင်ငံရေး အရှုပ်အထွေး၊ ထိုင်ဝမ်အရေး၊ အရှေ့အလယ်ပိုင်း ပဋိပက္ခတွေကိုပါ ထည့်သွင်း အမြင်ဖလှယ်ခဲ့ကြတယ်လို့ ရုရှားဖက်က ထုတ်ပြန်ခဲ့ပါတယ်။

တရုတ် အစိုးရ မီဒီယာကတော့ မရေရာတဲ့ ပြည်ပ သက်ရောက်မှုတွေ ကြုံလာရင် ပူတင်နဲ့ လက်တွဲ တုံ့ပြန်ဖို့ သမ္မတ ရှီက လိုလိုလားလား လမ်းဖွင့်ပေးခဲ့ကြောင်း ဖော်ပြပေမယ့် အသေးစိတ် အကြောင်းအရာတွေကိုတော့ မှတ်ချက်မပေးခဲ့ကြောင်း သိရပါတယ်။

ကိုးကား: BBC