ရဲခေါင်/People’s Spring
စစ်ကိုင်းတိုင်း၊ မုံရွာမြို့နယ်၊ ညောင်ဖြူပင်ရဲစခန်း ရိက္ခာပို့သည့် စစ်ကောင်စီတပ်စစ်ကြောင်း တိုက်ခိုက်ရာ သေဆုံးထိခိုက်မှုရှိကြောင်း ချောင်းဦးမြို့နယ်ပြည်သူ့ကာကွယ်ရေးအဖွဲ့(ပကဖ) တိုက်ခိုက်ရေးတပ် CHU PDF မှ တာဝန်ရှိသူက ပြောသည်။
ယမန်နေ့(ဇန်နဝါရီ ၂၂ ရက်) နံနက် ၈နာရီခွဲခန့်က စစ်ကောင်စီ၏ ပျူစောထီးအားကောင်းရာ တောပုကျေးရွာမှ ၂၅ ဦးခန့်နှင့် ညောင်ဖြူပင်ကျေးရွာဘက်မှ ၂၅ ဦးကို မိုင်းဆွဲတိုက်ခိုက်ခဲ့သည်ဟု ဆိုသည်။
“ညောင်ဖြူပင်နဲ့အနီးဆုံး တောပုရွာက ရိက္ခာပို့ရတာပေါ့။ဒါကို ပြီးခဲ့တဲ့ လကလည်း ကျွန်တော်တို့ ဖြတ်တောက်နိုင်သလို အခုလည်း ထပ်ပြီး လာပို့တဲ့အခု ကျွန်တော်တို့ ကြိုတင်ထောင်ထားတဲ့ မိုင်းတွေနဲ့ တိုက်ခိုက်ခဲ့တယ်။ကနဦးသိရတာ ခုနစ်ဦးထိတယ်။ အဲဒီထဲက နှစ်ဦးသေတယ်”ဟု ချောင်းဦးပကဖ တာဝန်ရှိသူက လူထုနွေဦးသို့ ပြောသည်။
Public Service Announcement
သို့သော် စစ်ကောင်စီတပ်စစ်ကြောင်း ထိခိုက်မှုနှင့်ပတ်သက်ပြီးလူထုနွေဦးက သီးခြားအတည်မပြုနိုင်ပေ။
မုံရွာမြို့၏ တောင်ဘက်ခြမ်းတွင်ရှိသည့် ညောင်ဖြူပင်ရဲစခန်းတွင် ရဲနှင့် စစ်ကောင်စီတပ်သား ၅၀ခန့်ဖြင့် တပ်စွဲထားကြောင်းလည်း ၎င်းက အသိပေးသည်။
ဇန်နဝါရီ ၂၂ရက်က တိုက်ခိုက်မှုကို ချောင်းဦးမြို့နယ် ပကဖ တိုက်ခိုက်ရေးတပ် CHU PDF တပ်ဖွဲ့ (၂) နှင့်အတူ မုံရွာခရိုင်တပ်ရင်း(၂၃)၊ မုံရွာခရိုင်တပ်ရင်း(၂၅) ၊မုံရွာခရိုင်တပ်ရင်း (၂၈)၊ BLDF၊ Special Force 11နှင့် Importal Gurella Force တို့ ပူးပေါင်းလုပ်ဆောင်ခဲ့ကြောင်း သိရသည်။
ဇန်နဝါရီ ၁၈ ရက်ကလည်း စစ်ကိုင်းတိုင်း၊ ချောင်းဦးမြို့နယ်၊ မုံရွာ − မန္တလေးလမ်းပိုင်း၌ စစ်ကောင်စီတပ်အား တိုက်ခိုက်ရာ ဗိုလ်အပါအဝင် ငါးဦးထက်မနည်းသေဆုံးကြောင်း ချောင်းဦး PDFက ထုတ်ပြန်ထားသည်။
