■ရုံအချို့ကို စစ်ကောင်စီဝင်ဖမ်း၊ တရုတ်နှင့် ဗီယက်နမ်နိုင်ငံသားများ ဖမ်းမိ
ကဖေး/People’s Spring
အရှေ့မြောက်တိုင်းစစ်ဌာနချုပ်(ရမခ)ကို ယာယီအနေဖြင့် စစ်ကောင်စီဖွဲ့စည်းထားသည့် မိုင်းရယ်မြို့၌ ထားရှိရာ အဆိုပါမြို့ရှိ ကျားဖြန့်ရုံအချို့ကို စစ်ကောင်စီတပ်ကဝင်ရောက်ဖမ်းစီစဉ် အပြန်အလှန်ပစ်ခတ်မှုဖြစ်ပွားခဲ့ပြီး တရုတ်နှင့် ဗီယက်နမ်နိုင်ငံသားများအပါအဝင် ၈၀ကျော်ဖမ်းမကြောင်း သတင်းရရှိသည်။
” အဲဒီ ကျားဖြန့်ရုံတွေက မဖြစ်မနေဖို့လို့ ဝင်ဖမ်းရတာ။ လုံခြုံရေးစောင့်တဲ့ ပြည်သူ့စစ်အဖွဲ့က ပြန်ပစ်လို့တိုက်ပွဲဖြစ်သေးတယ်။ ဆူညံနေတာပဲ” ဟု မိုင်းရယ်ဒေသခံတစ်ဦးက ပြောသည်။
Public Service Announcement
မိုင်းရယ်မြို့နယ်၊ နောင်ဟန်ကျေးရွာအနီးရှိ ကျားဖြန့်ရုံအချိို့ကို ဖေဖော်ဝါရီ ၅ရက်၊ ၆ရက်နှင့် ၇ရက်တို့တွင် စစ်ကောင်စီတပ်က ဝင်ရောက်ဖမ်းဆီးခြင်း ဖြစ်သည်။ အဆိုပါ ကျားဖြန့်ရုံများအပါအဝင် မိုင်းရယ်မြို့၌ ကျားဖြန့်ရုံအများအပြားရှိနေပြီး ယာယီရမခဌာနချုပ် တိုင်းမှူးဗိုလ်ချုပ်မြင့်ကျော်ထွန်းက ခွင့်ပြုထားခဲ့သည့် လုပ်ငန်းများဖြစ်ကြောင်း ဒေသခံသတင်းရင်းမြစ်က ပြောသည်။
” ရှမ်းမြောက်ပြီးတော့ အခုမြဝတီကို ကျားဖြန့်နှိမ်နှင်းမယ်ဆိုတော့ အဖမ်းပြနေတဲ့သဘောပဲ။ တိုင်းစစ်ဌာနချုပ်တောင် ပြောင်းဖွင့်ထားတဲ့နေရာတွေဗျာ။ အပ်ကျတာကအစ ဒီကောင်တွေသိတယ်။ အခုက တရုတ်ကြီးဆီကို ဖားပြီးဖမ်းပြနေတာ”ဟု အထက်ပါသတင်းရင်းမြစ်က ပြောသည်။
သုံးရက်ဆက်ဖမ်းဆီးမှုများအတွင်း တရုတ်နိုင်ငံသား ၂၉ဦး၊ ဗီယက်နမ်နိုင်ငံသား ၁၈ ဦးနှင့် မြန်မာနိုင်ငံသား ၄၀ကျော် ဖမ်းမိထားကြောင်း သတင်းရရှိသည်။
ဖမ်းဆီးမှုများ၌ လက်နက်ခဲယမ်းများအပြင် ကျားဖြန့်လုပ်ငန်းသုံး ဖုန်း၊ လက်တော့နှင့် WiFi စက်များ သိမ်းဆည်းနိုင်ခဲ့ကြောင်း စစ်ကောင်စီကသတင်းထုတ်ပြန်ထားသည်။
တရုတ်နှင့် ဗီယက်နမ်နိုင်ငံသားများအား သက်ဆိုင်ရာ နိုင်ငံများသို့ ပြန်ပို့မည်ဟု ဆိုထား သည်။
ပြီးခဲ့သည့် ၂၀၂၄ ဇူလိုင်က လားရှိုးမြို့ကို ကိုးကန့်တပ် MNDAAက စတင်တိုက်ခိုက်ပြီး ရမခကို သိမ်းယူခဲ့သည်။ ရမခတိုင်းမှူးဗိုလ်ချုပ်စိုးတင့်ကို MNDAAက ဖမ်းဆီးခဲ့သည်။
ရမခတိုင်းမှူးအဖြစ် မူဆယ်မြို့အခြေစိုက်တပ်မ(၉၉)တပ်မမှူး ဗိုလ်ချုပ် စိုးလှိုင်ကို စစ်ကောင်စီက အစားထိုးခဲ့သည်။ ဗိုလ်ချုပ်စိုးလှိုင်သည် မူဆယ်၌ပင် ဆက်လက်ရှိနေစဉ် ၎င်းအား ထပ်မံထုတ်ပယ်ပြီး ရမခအား မိုင်းရယ်မြို့တွင် ယာယီပြန်ဖွဲ့စည်းသည်။
စစ်ကောင်စီတပ်လေ့ကျင့်ရေးအရာရှိချုပ်ရုံးမှ ဒုတိယလေ့ကျင့်ရေးအရာရှိချုပ်ဗိုလ်ချုပ်မြင့်ကျော်ထွန်းကို ရမခတိုင်းမှူးအဖြစ် တာဝန်ပေးခဲ့သည်။
မိုင်းရယ်မြို့တွင် ရမခဌာနချုပ်ယာယီဖွင့်ပြီးနောက် ကျားဖြန့်လုပ်ငန်းများပိုမိုများပြားလာပြီး ယခုအခါ တရုတ်နိုင်ငံ၏ဖိအားကြောင့် လိုက်လံဖမ်းဆီးနေခြင်းဟု ဒေသခံများက ပြောသည်။
လက်ရှိအချိန်တွင် တရုတ်နိုင်ငံသားအများအပြားရှိနေသည့် မြန်မာနှင့်ထိုင်းနယ်စပ်မှ ကျားဖြန့်လုပ်ငန်းများကို နှိမ်နင်းနိုင်ရေးအတွက် တရုတ်က ထိုင်းအစိုးရနှင့် အရှိန်မြှင့်လုပ်ဆောင်နေသည်။
“ပိုက်ဆံယူပြီး ကျားဖြန့်တရုတ်တွေ အများကြီးကို လွှတ်ပေးလိုက်တယ်။ တစ်ရာကျော်တယ်။ အခု ဖမ်းမိတယ်ဆိုပြီးပြတဲ့စာရင်းက ဖော်ရှိုး”ဟု မိုင်းရယ်ဒေသခံတစ်ဦးက ပြောသည်။
