အကယ်ဒမီရုပ်ကမ်ပိန်းအတွက် တစ်တော့ပ်အကောင့်ဖြင့်ငွေလိမ်ကောက်ခံနေ

ဆဏ်း / People’s Spring

စစ်ရှောင်တွေကို ကူညီဖို့အတွက်ပြုလုပ်နေတဲ့ တော်လှန်အနုပညာရှင် ပိုင်ဖြိုးသုရဲ့ အကယ်ဒ မီရုပ်ကမ်ပိန်းကို တစ်တော့ပ်အကောင့်အတုနဲ့ လိမ်လည်နေတယ်လို့ Artists’ Shelter ကအသိ ပေးထားပါတယ်။

“အကယ်ဒမီရုပ်”ကမ်ပိန်းအတွက် မည်သူတဦးတယောက်ကိုမှ Tiktok မှာ ငွေကောက်ခံဖို့ခွင့်ပြုထားခြင်းမရှိပါဘူး။ အောက်ဖော်ပြပါ Linkမှာရှိတဲ့ နိုင်ငံတကာက Fundraiser များထံမှသာလျှင် ယုကြည်စိတ်ချစွာဖြင့် ပါဝင်ထောက်ပံ့နိုင်မှာဖြစ်ပါတယ်။” လို့ Artists’ Shelter က ဖေဖော်ဝါရီ ၁၃ ရက်မှာ ကြေညာထားတာပါ။

တစ်တော့ပ်အကောင့်နာမည်ကို ပိုင်ဖြိုးသုနာမည်ကိုသုံးပြီး ပရိုဖိုင်ကို အကယ်ဒမီရုပ်ကမ်ပိန်းက ဓာတ်ပုံကိုယူသုံးထားတာဖြစ်ပါတယ်။ အကောင့်မှာ Follower ၈သောင်းခန့်ရှိပြီး Like ပြုလုပ်ထားသူ ၇သိန်းခွဲကျော်ရှိပါတယ်။(@paingphyoethu007)

Public Service Announcement

အဲဒီ့တစ်တော့ပ်အကောင့်မှာ အကယ်ဒမီရုပ်ကမ်ပိန်းက ဓာတ်ပုံနဲ့ဗီဒီယိုတွေကို ယူသုံးထားပြီး ဖေဖော်ဝါ ရီ ၁၂ ရက်မှာ စတင်ခဲ့တာဖြစ်ပါတယ်။

အဲဒီ့တစ်တော့ပ်အကောင့်ကို အသုံးပြုသူက အလှူပါဝင်ချင်ရင် တစ်တော့ပ်အကောင့်ရဲ့ မက်ဆေ့ခ်ျကိုလာဖို့ မှတ်ချက်ပေးထားတာတွေ့ရပါတယ်။

ပိုင်ဖြိုးသုရဲ့ အကယ်ဒမီရုပ်ကမ်ပိန်းကို ဖေဖော်ဝါရီ ၁ ရက်ကနေ ၂၀ ရက်အထိပြုလုပ်နေတာဖြစ်ပြီး လက်မှတ်ဝယ်ယူနိုင်မယ့် နေရာတွေကို ဒီလင့်ခ်(https://www.facebook.com/share/p/18Wuqm5gZj/) မှာကြည့်ရှုနိုင်ပါတယ်။

လက်မှတ်တန်ဖိုးသတ်မှတ်ထားတာမရှိပဲ ကိုယ်တတ်နိုင်တဲ့ပမာဏနဲ့ ပါဝင်နိုင်ပြီး ဖေဖော်ဝါရီ ၂၁ ရက်မှာ ပိုင်ဖြိုးသုကိုယ်တိုင်မဲနှိုက်ရွေးချယ်ပေးမှာပါ။

ဆုတွေအနေနဲ့ ပထမဆုကို ‌ရွှေတစ်ကျပ်သားကြယ်ပါဝင်တဲ့ ပိုင်ဖြိုးသုရဲ့ အကယ်ဒမီရုပ်ထု၊ ဒုတိယဆုကို ပိုင်ဖြိုးသုရဲ့လက်မှတ်ပုံပါတဲ့ရွှေဆွဲကြိုးနဲ့ တတိယဆုကို တွယ်ချိတ်ပုံရွှေနားကပ် သုံးဆု ပေးအပ်သွားမှာဖြစ်ပါတယ်။

ဒီကမ်ပိန်းကရရှိလာတဲ့ငွေတွေကို စစ်ဘေးရှောင်တွေအတွက် ကူညီပေးသွားမှာဖြစ်ပြီး လက်ရှိမှာတော့စင်ကာပူနိုင်ငံက လက်မှတ်ဝယ်ယူမှုအများဆုံးဖြစ်တယ်လို့သိရပါတယ်။