အိမ်သွင်/People’s Spring
ရွှေဘိုမြို့နယ်၊ကံကြီးတောကျေးရွာ၊ လုဒ်မယ်တော်သခင်မဘုရားကျောင်းမှ ကျောင်းထိုင်ဘုန်းကြီးဖြစ်သူ Father Donald Martin ရဲနိုင်ဝင်းအား သတ်ဖြတ်ခဲ့သည်ဟု သံသယရှိသော ဒေသကာကွယ်ရေး (Local PDF) တပ်ဖွဲ့ဝင်ဆယ်ဦးကို ရွှေဘိုခရိုင်တပ်ရင်း(၅)ကဖမ်းဆီးစစ်ဆေးနေကြောင်း သတင်းရရှိသည်။
Father Donald Martin ရဲနိုင်ဝင်းသည် ဖေဖော်ဝါရီလ ၁၄ရက်နေ့တွင် ဓားဒဏ်ရာများဖြင့်သေဆုံးနေခြင်းဖြစ်ပြီး ကျူးလွန်သူဟုသံသယရှိသောဒေသကာကွယ်ရေးအဖွဲ့ခေါင်းဆောင်ဖြစ်သူအပါအဝင်တပ်ဖွဲ့ဝင်ဆယ်ဦးကို ဖေဖော်ဝါရီလ၁၅ရက်နေ့တွင် ဖမ်းဆီးပြီးစစ်ဆေးနေကြောင်း ပြည်သူ့ ကာကွယ်ရေးတပ်ဖွဲ့ဝင်တစ်ဦးကပြောသည်။
“သတ်ဖြတ်မှုကျူးလွန်တဲ့အဖွဲ့က MOD အောက်ကအဖွဲ့မဟုတ်ဘူး။ ဒါကို ခရိုင်ရင်းက စစ်ဆေးနေပါတယ်။ တရားဥပဒေအတိုင်း စစ်ဆေးနေတာပါ။ ကျနော်တို့ကလည်း ဥပဒေအတိုင်း ထိထိရောက်ရောက်ဖြစ်ဖို့ မျှော်လင့်နေပါတယ်” ဟု ရွှေဘိုမြို့မှ ပြည်သူ့ကာကွယ်ရေးရဲဘော်တဦးကပြောသည်။
Public Service Announcement
ရွှေဘိုမြို့နယ်ပြည်သူ့ကာကွယ်ရေးတပ်ဖွဲ့ထံ ဆက်သွယ်မေးမြန်းရာ ခရိုင်တပ်ရင်း(၅)က စစ်ဆေးနေသည်မှာမှန်ကန်ကြောင်း ပြောသည်။
Father Donald Martin ရဲနိုင်ဝင်းသည် အသက်၄၄ နှစ်အရွယ်ရှိပြီဖြစ်သည်။ မန္တလေး ကက်သလစ် ဂိုဏ်းချုပ်သာသနာမှ ဘုန်းတော်ကြီးဖြစ်ပြီး ရွှေဘိုမြို့နယ်ကံကြီးတောကျေးရွာတွင် လာရောက်ကျောင်းထိုင်နေသူဖြစ်သည်။
လက်နက်ကိုင်လူတစ်စု၏ရက်စက်စွာ အသတ်ခံရကြောင်း ကြားသိခဲ့ရပြီး ထိုသတင်းကြောင့် အံ့ဩတုန်လှုပ် ခြင်းဖြင့် ကြေကွဲဝမ်းနည်းရကြောင်း မြန်မာနိုင်ငံလုံးဆိုင်ရာကက်သလစ်ဆရာတော်ကြီးများအဖွဲ့ချုပ်(CBCM)က ထုတ်ပြန်သည်။
Father Donald Martin ရဲနိုင်ဝင်း အပေါ်ကျူးလွန်ခဲ့သော မတရားမှုသည် အလွယ်တကူ မေ့ပျောက်သင့်သောအရာတစ်ခုမဟုတ်ပါ။ ထို့ကြောင့် နောက် နောင် ဤကဲ့သို့အမှုမျိုး ထပ်မံမဖြစ် စေရေးအတွက် တာဝန်ယူမှုပြည့်ဝစွာဖြင့် ကျူးလွန်သူတို့အား ထိုက်သင့်သောအရေးယူခြင်းနှင့် တရားမျှတမှုကို ဖေါ်ဆောင်ပေးကြပါရန် တာဝန်ရှိသူတို့အား တိုက်တွန်းသည်ဟု CBCMက ထုတ်ပြန်ထားသည်။
Father Donald Martin ရဲနိုင်ဝင်း၏ ဈာပနကိုပြင်ဦးလွင်မြို့တွင် ဖေဖော်ဝါရီ ၁၆ ရက်ညနေပိုင်း၌ ပြုလုပ်ခဲ့ကြောင်းသတင်းရရှိသည်။
