မင်းညို/People’s Spring
စစ်ကိုင်းတိုင်း၊ ရွှေဘိုမြို့နယ်မှာ ပျူစောထီးရွာကို အလင်းဝင်ဖို့ လက်ကမ်းစာစောင်တွေ ဒရုန်းနဲ့ ကျဲချပြီးတဲ့နောက် ပျူအဖွဲ့ဝင်တဦး လက်နက်ခဲယမ်းနဲ့တကွ ထပ်မံ အလင်းဝင်လာခဲ့ကြောင်း ရွှေဘိုမြို့နယ်ပြည်သူ့ကာကွယ်ရေးအဖွဲ့က ပြောပါတယ်။
မနေ့(မတ် ၁၁)ကရွှေဘိုခရိုင်၊ရွှေဘိုမြို့နယ်၊တိုက်နယ်(၂)နယ်မြေ၊ဇီးဖြူကုန်းပျူကျေးရွာကို ရောက်ရှိနေတဲ့ တည်သီးတောကျေးရွာက ပျူလက်နက်ကိုင်တစ်ဦးဟာကာဘိုင်(၁)လက်၊ကျည်ဘောက်(၃)ခု၊ ကာဘိုင်ကျည် (၁၅၇)တောင့်တို့ကိုယူဆောင်ပြီး အလင်းဝင်ရောက်လာတယ်လို့ရွှေဘိုပကဖအဖွဲ့က သတင်းထုတ်ပြန်ပါတယ်။
ပျူစောထီးအဖွဲ့ဝင်တွေအလင်းဝင်ဖို့တိုက်တွန်းပြီး ဆက်သွယ်ရမယ့်ဖုန်းနံပါတ်တွေကိုပါရေးပေးထားတဲ့လက်ကမ်းစာစောင်တွေကို ပျူရွာတွေမှာ ဒရုန်းတွေနဲ့ ကျဲချခဲ့ပြီးနောက်ပိုင်းအလင်းဝင်ရောက်လာတာလို့ရွှေဘိုပကဖအဖွဲ့တာဝန်ရှိသူကပြောပါတယ်။
Public Service Announcement
“ညောင်ကိုင်းကိုကျဲတယ်။ညောင်ပင်လှ ၊တည်သီးတောစတဲ့ ပျူရွာတွေက ရွာချင်းဆက် အချင်းချင်း သတင်းကူးတာ။ လက်ကမ်းစာစောင်တွေကြဲပြီးနောက်ပိုင်း အလင်းဝင်တာ ဒီတစ်ယောက်နဲ့ဆို လေးယောက်မြောက်ပါ။”လို့အထက်ပါတာဝန်ရှိသူက ပြောပါတယ်။
အလင်းဝင်ရောက်လာသူတွေကိုထိုက်သင့်တဲ့ဂုဏ်ပြုဆုငွေ ချီးမြှင့်ခဲ့ပြီး လူ့အခွင့်အရေးနဲ့အညီကောင်းမွန်စွာ ထိန်းသိမ်းပေးခဲ့ကြောင်း၊ ဒါ့အပြင် အလင်းဝင်လာသူရဲ့မိသားစုတွေကိုလည်းလူ့အခွင့်အရေးနဲ့အညီ စောင့်ရှောက်ထားတယ်လို့ သိရပါတယ်။
စစ်အာဏာရှင်အမြစ်ဖြတ်ရေး အရှိန်အဟုန်မြှင့်ဆောင်ရွက်နေလို့ စကစတပ်ဖွဲ့ဝင်တွေ၊ ပျူစောထီးတွေအနေနဲ့ အမြန်ဆုံး အလင်းဝင်ရောက်ဖို့ လိုအပ်နေတယ်လို့ ရွှေဘိုပကဖက တိုက်တွန်းပါတယ်။
ပျူစောထီးတွေအပြင် စစ်ကောင်စီလက်အောက်ခံ စစ်သားနဲ့ရဲတွေလည်း PDF တပ်ရင်းတွေနဲ့ ပကဖတွေဆီကို အလင်းဝင်နေပြီးပြီးခဲ့တဲ့ ဖေဖော်ဝါရီလအတွင်း အရာရှိအဆင့် ဗိုလ်မှူး (၁) ဦးအပါအဝင် တပ်သားနဲ့ရဲ (၆၄) ဦး ပြည်သူ့ရင်ခွင် ခိုလှုံလာတယ်လို့ အမျိုးသားညီညွတ်ရေးအစိုးရ၊ ပြည်သူ့ရင်ခွင်အကောင်အထည်ဖော်ဆောင်မှု ဗဟိုကော်မတီက အသိပေးထားပါတယ်။
