မြန်မာ အပါအဝင် ၄၁ နိုင်ငံကို ဗီဇာ ပိတ်ပင်မှုတွေအတွက် အမေရိကန် စဉ်းစားနေ

အမေရိကန် အစိုးရဟာ နိုင်ငံပေါင်း ၄၁ ခုရဲ့ နိုင်ငံသားတွေကို ပြည်ဝင်ခွင့် ဗီဇာ ပိတ်ဖို့ စဉ်းစားနေကြောင်း သတင်းတွေ ထွက်ပေါ်လာပါတယ်။

သမ္မတ ဒေါ်နယ်လ်ထရမ့်က စဉ်းစားနေတဲ့ ဗီဇာပိတ်ပင်ရေး အစီအမံသစ်အတွက် နိုင်ငံ ၄၁ ခုကို အုပ်စု ၃ ခုခွဲပြီး လျာထားတယ်လို့ Rueters သတင်း ဌာနက ရရှိခဲ့တဲ့ ဌာနဆိုင်ရာ အတွင်းပိုင်း ညွှန်ကြားချက် တစ်ခုမှာ ပါရှိခဲ့ပါတယ်။

ပြီးတော့ အဲဒီလို ပိတ်ပင်မှုမျိုး ရှိလာနိုင်တယ် ဆိုတာကို ဖြစ်စဉ်နဲ့ နီးစပ်တဲ့ အစိုးရ အရာရှိ တချို့ကလည်း အတည်ပြုထားပါတယ်။

နိုင်ငံတွေကို ခွဲခြား သတ်မှတ်ထားတဲ့ အုပ်စု ၃ ခုကတော့ ဗီဇာအမျိုးအစား မှန်သမျှကို ပိတ်ပင်ဖို့ ဆိုတာရယ်၊ အလည်အပတ်နဲ့ ပညာရေး အပါအဝင် ဗီဇာ အမျိုးအစား တချို့ကို ပိတ်ပင်ဖို့ ဆိုတာရယ်၊ တချို့ ကဏ္ဍတွေမှာ ပြင်ဆင်ပြောင်းလဲမှုတွေ ရှိမလာရင် ဗီဇာပိတ် အရေးယူသင့်တယ်လို့ ထောက်ခံ သတ်မှတ်ထားတဲ့ နိုင်ငံတွေရယ် ဖြစ်ပါတယ်။

Public Service Announcement

မြန်မာကတော့ ဗီဇာ အမျိုးအစားတချို့ ကန့်သတ် ပိတ်ပင်ခံရသင့်ကြောင်း စာရင်းတို့ထားတဲ့ ဒုတိယ အုပ်စုထဲမှာ အကျုံးဝင်နေပါတယ်။

အခုကိစ္စနဲ့ ပတ်သက်ပြီး ထဲထဲဝင်ဝင် သိရှိထားတဲ့ အမည်မဖော်လိုသူ အစိုးရ အရာရှိ တစ်ယောက်ကတော့ စာရင်းထဲက နိုင်ငံတွေမှာ အပြောင်းအလဲ ရှိလာနိုင်သလို နိုင်ငံခြားရေး ဝန်ကြီး မာကို ရူဘီရိုဆီက တရားဝင် အတည်ပြု အမိန့်လည်း မရှိသေးဘူးလို့ ပြောပါတယ်။

အဲဒီ နိုင်ငံတွေ စာရင်းမှာ အာဖဂန် နစ္စတန်၊ ကျူးဘား၊ အီရန်၊ လစ်ဗျား၊ မြောက်ကိုရီးယား ဆိုမာလီယာ၊ ဗင်နီဇွဲလား၊ ယီမင်၊ ဆီးရီးယားတို့ဟာ ဗီဇာ အလုံးစုံ ပိတ်ခံရဖို့ လျာထားခံရပါတယ်။

မြန်မာ၊ ဟေတီ၊ အီရီထရီးရား၊ လာအို၊ တောင်ဆူဒန် နိုင်ငံတွေကတော့ ဗီဇာ အမျိုးအစားတချို့ ကန့်သတ် ပိတ်ပင် ခံရမယ့် အခြေအနေ ရှိနေပြီး အန်ဂိုလာ၊ ဘီလားရုစ်၊ ပါကစ္စတန်၊ ဘူတန်၊ ကမ္ဘောဒီးယားစတဲ့ နိုင်ငံတွေ၊ အာဖရိက နိုင်ငံတချို့နဲ့ ကျွန်းနိုင်ငံငယ် တချို့ကတော့ ဗီဇာပိတ်ဆို့မှုအတွက် စဉ်းစားသင့်ကြောင်း ထောက်ခံဖော်ပြထားတဲ့ စာရင်းထဲ ပါဝင်နေတယ်လို့ သိရပါတယ်။

ကိုးကား – Reuters၊ ဓာတ်ပုံ – Reuters