ဧပြီ – ၃ ၊ ၂၀၂၅ /People’s Spring
မန္တလေး မှာ ငလျင်လှုပ်ခတ်ပြီး အခုဆိုရင် ၈ ရက်တာကြာမြင့်လာပါပြီ။
နှစ်ပေါင်းတစ်ရာ အတွင်း ဖျက်အားပြင်း ငလျင်ကြီးကြောင့်မြို့လုံးကျွတ်နီးပါး ထိခိုက်ပျက်စီးပြီလူ့အသက်ပေါင်းများစွာ ဆုံးရှုံးလိုက်ရတဲ့ မန္တလေးမြို့ ဆီ သွားရောက်လှုဒါန်းကြသူတွေ လည်းရှိနေပါတယ်။
မန္တလေးမြို့ရဲ့ မြေပြင်မှာ အမှန်တကယ်လိုအပ်တဲ့ ထောက်ပံ့ရေး ပစ္စည်းတွေ ဘာတွေဖြစ်မလဲဆိုတာကို မြေပြင်မှာ ကူညီရေးလုပ်ဆောင်နေသူတွေ ၊ မြို့ခံတွေကို မေးမြန်းထားပါတယ်။
Public Service Announcement
* သောက်သုံးရေ *
ငလျင်ကြောင့် လျှပ်စစ်မီးပြတ်တောက်တာ ၊ရေတွင်း ရေကန်တွေ ထိခိုက်ပျက်စီးသွားတာ ကြောင့် သန့်ရှင်းတဲ့သောက်ရေ ၊ သုံးရေ ရဖို့ ခက်ခဲနေပါတယ်။
*အစားအစာ*
အိုးအိမ်တွေ ပျက်စီးသွားတဲ့အခါ အိုး၊ခွက်၊ပန်းကန် တွေပါ ပါသွားတဲ့အတွက် နေ့တဓူဝ စားရေးသောက်ရေး အတွက် ချက်ပြုတ်ဖို့ အဆင်မပြေတာကြောင့် လွယ်လင့်တကူ အသင့်စား အစားအစာတွေလည်းလိုအပ်ပါတယ်။
အခုအခါမှာတော့ ထမင်း ၊ ဟင်း လာရောက်လှုဒါန်းကြသူတွေလည်းရှိနေပါတယ်။ တဖက်မှာလည်း ချက်ပြုတ်စားသောက်ဖို့အတွက် အိုး၊ခွက် ၊ပန်းကန်၊ မီးဖို စတဲ့ မီးဖိုချောင်သုံးပစ္စည်းတွေထောက်ပံ့ဖို့ လိုအပ်နေပါတယ်။
*အဝတ်အထည်*
ငလျင်ဘေးကနေ အဝတ်တထည် ကိုယ်တခုနဲ့ထွက်ပြေးလွတ်မြောက်လာကြရတဲ့အတွက် အဝတ် အစားတွေ လိုအပ်နေပါတယ်။
*အမိုးအကာ*
ယာယီရွက်ဖျင်တဲတွေ အများအပြားလိုအပ်ပါတယ်။ ငလျင်ကြောင့် အိုးအိမ် ဆုံးရှုံးသွားသူတွေ ၊ နောက်ဆက်တွဲ ငလျင်ဒဏ်ကို စိုးရွံကြသူတွေ ဟာ အိမ်အပြင်ဘက်တွေ ၊ ကွက်လပ်တွေ ၊ ပလက်ဖောင်းတွေ ပေါ်မှာ အဆင်သင့်သလို နေထိုင်နေကြပါတယ်။
တဆက်တည်းမှာပဲ အမိုးအကာခေါင်းစဉ်အောက်မှာ ခြင်ထောင် ၊ အပေ့ါအပါး ၊ အလေးစွန့်ဖို့ ရွေ့ပြောင်း အိမ်သာတွေ လည်း လိုအပ်နေတယ်လို့မြေပြင်မှာ အကူအညီပေးနေသူတွေကအသိပေးပါတယ်။
*ဆေးဝါး*
ပူပြင်းလှတဲ့ ရာသီကြောင့် ဓာတ်ဆားရည် ၊ ခြင်မကိုက်ဆေးရည် ၊ ခြင်ဆေးခွေ ၊ လက်သန့်ဆေးရည် တို့ လိုအပ်ပါတယ်။
*ငွေကြေး*
အခုချိန်မှာ ငလျင်ဒဏ်သင့်ပြည်သူတွေကို ငွေကြေးထောက်ပံ့ပေးမှုကလည်း အရေးကြီးပါတယ်။
*အပျက်အစီးရှင်းလင်းရေး*
ရက်သတ္တပတ်တစ်ပတ်ကျော်လာချိန်မှာ အပုပ်နံတွေ ထွက်လာတဲ့နေရာတွေက ရုပ်အလောင်းတွေကို သယ်ထုတ်နိုင်ဖို့ ပြိုကျပျက်စီးနေတဲ့အဆောက်အဦးတွေကို ရှင်းလင်းရေးလုပ်ဆောင်ဖို့ လိုအပ်နေပါတယ်။ ဒါကြောင့် စက်ယန္တယားတွေ ၊ ကွန်ကရစ်ဖောက်စက်တွေ ၊ ဖြတ်စက်တွေ အပြင် အလောင်းထုတ်ပိုးဖို့အိတ်တွေပါ လိုအပ်ပါတယ်။
