ဧပြီ ၉၊၂၀၂၅။ဟန်နွေ/People’s Spring
ချင်းပြည်နယ်၊ တီးတိန်မြို့အခြေစိုက် ခလရ(၂၆၉)တပ်ရင်းမှ တပ်သားသစ် နှစ်ဦးသည် လက်နက်ခဲယမ်းများ ယူလာပြီး အလင်းဝင်လာကြောင်း ပြည်သူ့ကာကွယ်ရေးတပ်မတော်(PDF)-ဇိုလဲန်း(Zoland)က ထုတ်ပြန်သည်။
စစ်ကောင်စီက စစ်သားစုဆောင်းထားသည့် စစ်မှုထမ်းတပ်သားသစ်များဖြစ်သည့် တပ်သား စိုးလင်းအောင်နှင့် ဖိုးလပြည့်တို့သည် ဧပြီ ၇ရက်တွင် အလင်းဝင်လာခြင်းဖြစ်ကြောင်း အသိပေးသည်။
အလင်းဝင်လာသည့် တပ်သားများက လက်နက်ခဲယမ်းများယူဆောင်လာကြောင်းနှင့် ၎င်းတို့အား ဆုငွေပေးအပ်မှုတို့ကို PDF ဇိုလဲန်းက ဓာတ်ပုံမှတ်တမ်းဖြင့် ထုတ်ပြန်ထားသည်။
Public Service Announcement
မတ်လ ၁၉ရက်ကလည်း ခလရ(၂၆၉)တပ်ရင်းမှ စစ်ကောင်စီတပ်သားတစ်ဦးသည် PDF ဇိုလဲန်းထံ လက်နက်နှင့် အလင်းဝင်ရောက်ခဲ့သေးသည်။ မတ်လ ၃ရက်ကလည်း ခလရ(၂၆၉)တပ်ရင်းမှ တပ်သား တစ်ဦးလည်း ကျည်၊ ခဲယမ်းများ ယူလာပြီး အလင်းဝင်ခဲ့ဟု PDF ဇိုလဲန်းက အသိပေးထားသည်။
ကျန်ရှိ စစ်ကောင်စီတပ်သားများအနေဖြင့် အသက်မသေလိုပါက ပြည်သူ့ကာကွယ်ရေးတပ်တွင် အလင်းဝင်လာနိုင်ကြောင်း ZFU/PDF ဇိုလဲန်း အတွင်းရေးမှူး ကိုရောဘက်က ပြောသည်။
တီးတိန်မြို့သိမ်းစစ်ဆင်ရေး မစတင်မီ အလင်းဝင်ရန် အချိန်ရသေးသည်ဟု ၎င်းက ပြောသည်။
“အခြေအနေအမျိုးမျိုးကြောင့် စကစမှာ တာဝန်ထမ်းဆောက်လျက်ရှိသော လက်ကျန်တပ်များအနေဖြင့် အချိန်မီပါသေးတယ်လိုပဲ ပြောချင်ပါတယ်”ဟု ကိုရောဘတ်က ပြောသည်။
PDF ဇိုလဲန်းသည် ချင်းညီနောင်အဖွဲ့ဝင် ဖြစ်ပြီး ချင်းညီနောင်သည် ဧပြီ ၇ရက်တွင် ဖလမ်းမြို့ကို အပြီးသတ် တိုက်ခိုက်သိမ်းပိုက်ရရှိထားသည်။
“ချင်းညီနောင်စစ်ဆင်ရေး (ဖလမ်း) အပြီးသတ်တာပြီးရင် ချင်ပြည် မြောက်ပိုင်းမှာ တီးတိန် (ခလရ ၂၆၉) တခုတည်းကျန်တော့မှာဖြစ်တယ်”ဟု ကိုရောဘတ်က ပြောသည်။
စစ်ကောင်စီသည် နိုင်ငံတဝန်းလူငယ်များအား နည်းမျိုးစုံဖြင့် လူသစ်စုဆောင်းပြီး ရှေ့တန်းစစ်မြေပြင်များ၌ အသုံးချနေသကဲ့သို့ ထိုသို့ လူသစ်စုဆောင်းခံရသည့် စစ်မှုထမ်းများသည်လည်း တစ်ဦးခြင်းဖြစ်စေ အဖွဲ့လိုက်ဖြစ်စေ တော်လှန်ရေးတပ်ဖွဲ့များထံသို့ အလင်းဝင်ရောက် ပူးပေါင်းမှုများ မကြာခဏ ဖြစ်ပေါ်လျက်ရှိသည်။
