ဧပြီ ၁၈၊ ၂၀၂၅။ People’s Spring
မန္တလေးတိုင်း၊ စဥ့်ကူးမြို့နယ် ကျည်ထောက်ပေါက် ကျေးရွာကို စစ်ကောင်စီက လေကြောင်းနဲ့ ဗုံးကြဲတိုက်ခိုက်ခဲ့တာမို့ ပြည်သူ ၆ဦးထိခိုက်ဒဏ်ရာတွေရခဲ့တယ်လို့ ပြင်ဦးလွင်ခရိုင်ပကဖသတင်းတာဝန်ခံဆီကသိရပါတယ်။
ဒီနေ့ နေ့လည် ၂နာရီခွဲအချိန်ခန့်က စစ်ကောင်စီရဲ့ မိတ္ထီလာရှမ်းတဲ လေတပ်ကတက်လာတဲ့ ဂျက်ဖိုက်တာနဲ့ ပေါင်၅၀၀ဗုံးကြဲချ တိုက်ခိုက်ခဲ့တာလို့ သိရပါတယ်။
တိုက်ခိုက်ခံရမှုမှာ ကျည်ထောက်ပေါက်ရွာ စာသင်ကျောင်းဆောင် ၃ ဆောင်နဲ့ ဈေးပျက်စီးခဲ့တယ်လို့ သိရပါတယ်။ ဒါ့အပြင် အမျိုးသား ၄ဦးနဲ့ အမျိုးသမီး ၂ဦးထိခိုက်ဒဏ်ရာတွေ ရရှိခဲ့တယ်လို့ ပြင်ဦးလွင်ခရိုင်ပကဖ သတင်းတာဝန်ခံကပြောပါတယ်။
Public Service Announcement
တော်လှန်ရေးတပ်ဖွဲ့ဝင်တွေရဲ့ ပြောကြားချက်အရ သတင်းတချို့ပေါက်ခဲ့ပြီး စစ်တပ်က အခုလို ဗုံးကြဲတိုက်ခိုက်လာတာလို့ သိရပါတယ်။
စစ်တပ်က ငလျင်ဘေးသင့်ကာလအတွင်းမှာ တော်လှန်ရေးတပ်တွေ စိုးမိုးထားတဲ့ နေရာတွေကို ဆက်တိုက် လေကြောင်းတိုက်ခိုက်တာတွေ ပြုလုပ်နေပြီး မနေ့ညကလည်း စဉ့်ကူးမြို့နယ်၊နတ်တောင်ရွာကို စစ်တပ်က ဗုံးကြဲတိုက်ခိုက်ခဲ့တာမို့ အမျိုးသမီးတစ်ဦး သေဆုံးခဲ့ပါတယ်။
သင်္ကြန်အတက်နေ့ ဧပြီ ၁၆ရက်ကလည်း စဥ့်ကူးမြို့နယ် နဂါးမောက်တောင်ဘုရားမုဒ်ဦးအနီး လေကြောင်းတိုက်ခိုက်ခဲ့တာမို့ ပြည်သူ ၈ဦး ထိခိုက်ဒဏ်ရာရခဲ့ပါတယ်။
