ဧပြီ ၂၀၊၂၀၂၅။ မေ/People’s Spring
ငလျင်သတင်း ကောလာဟလတွေပြန့်ပြီးနောက် ပြည်သူတွေလမ်းပေါ်ထွက်အိပ်နေချိန် မန္တလေးမြို့ဆိပ်ကမ်းအနီးမှာ ပစ်ခတ်သံတွေဆူညံနေပြီး ပြည်သူတွေ ထိတ်လန့်နေကြတယ်လို့ ဒေသခံတွေ ပြောပါတယ်။
မနက်ဖြန် ဧပြီ ၂၁နဲ့၂၂ရက်မှာ ငလျင်ကြီးလှုပ်နိုင်တယ်ဆိုတဲ့သတင်းနဲ့ မုန်တိုင်းသတင်းတွေ ပြန့်နှံ့ပြီးတဲ့နောက် မန္တလေးမြို့ပြည်သူတွေဟာ ဒီနေ့ညမှာ လမ်းမပေါ်ပြန်ထွက်အိပ်နေကြတာလို့ မြို့ခံတွေက ပြောပါတယ်။
ဒီလို ထိတ်လန့်နေချိန်မှာ မြို့အနောက်ဘက်ခြမ်းမှာ လက်နက်ကြီးပစ်ခတ်သံတွေကြောင့် ပြည်သူတွေငုတ်တုတ်ထိုင်စောင့် နေရတယ်လို့ မြို့ခံတွေက ပြောပါတယ်။
Public Service Announcement
” သုံးချက်ရှိပြီ။တအုန်းအုန်းကြားနေရတာ ။မင်းကွန်းဘက်ကလား ၊မြစ်ဆိပ်က ပစ်နေလားမသိဘူး။အခုအကုန်အထုတ်တွေပြင်ပြီး ထိုင်စောင့်နေကြရတယ်”လို့ မြို့ခံတစ်ဦးက ပြောပါတယ်။
ကျုံးရဲ့ အနောက်ဘက်မှာနေထိုင်တဲ့ နောက်ထပ်မြို့ခံတစ်ဦးကလည်း လက်နက်သံတွေ ဆက်တိုက်ကြားနေရတယ်လို့ ပြောပါတယ်။
“မအလက တစ်မျိုး၊ငလျင်က တစ်မျိုး ဒီညမအိပ်ရ တော့ဘူး”လို့ ပြောပါတယ်။
ဒီနေ့ညမှာ မန္တလေးမြို့ခံအများအပြားဟာ လမ်းမဘေးပေါ် ထွက်အိပ်နေကြရတယ်လို့ မြို့ခံတွေက ပြောပါတယ်။
ယခုရက်ပိုင်းအတွင်း မန္တလေးတိုင်းက တောင်သာ၊ မတ္တရာ၊စဉ့်ကူး၊သပိတ်ကျင်းမြို့နယ်တွေကို စစ်ကောင်စီက လေကြောင်းကနေ ဗုံးကြဲတိုက်ခိုက်နေပြီး ပြည်သူ ၅၀နီးပါး သေဆုံးထားပါတယ်။
