ဧပြီ ၂၂၊၂၀၂၅။တေဇ/People’s Spring
ပြီးခဲ့သည့် မတ်လအတွင်း စစ်ကောင်စီ၏ လူ့အခွင့်အရေးချိုးဖောက်မှု ၆၀၀ကျော်မှုရှိခဲ့ပြီး စစ်ကိုင်းတိုင်းမှာ လေကြောင်းတိုက်ခိုက်မှု အများဆုံးခံခဲ့ရကြောင်း အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာဝန်ကြီးဌာနက အသိပေးသည်။
“မတ်လအတွင်းမှာ မန္တလေးတိုင်းဟာ လူ့အခွင့်အရေးချိုးဖောက်ခံရမှု အများဆုံးဖြစ်ခဲ့ပြီး ၁၂၃ မှုထိ ရှိခဲ့ပါတယ်။ လေကြောင်းတိုက်ခိုက်ခံရမှုအကြိမ်အရေအတွက် အများဆုံးအနေနဲ့ စစ်ကိုင်းတိုင်းဟာ ၅၃ ကြိမ်အထိ တိုက်ခိုက်ခံခဲ့ရပါတယ်”ဟု အထက်ပါဝန်ကြီးဌာနက ထုတ်ပြန်သည်။
မတ်လအတွင်း တစ်နိုင်ငံလုံးအတိုင်းအတာဖြင့် လေကြောင်းတိုက်ခိုက်မှု ၂၂၄ ကြိမ်ရှိခဲ့ပြီး ပြည်သူပိုင်နေအိမ် ၇၃၇လုံး ၊ စာသင်ကျောင်း တစ်ကျောင်း ၊ ဗုဒ္ဓဘာသာ အဆောက်အဦး ၃၅လုံး ၊ ခရစ်ယာန်ဘာသာရေးအဆောက်အဦး တစ်လုံး၊ ကျန်းမာရေးအဆောက်အဦး တစ်လုံး ပျက်စီးခဲ့ကာ သေဆုံးသူ ၂၀၂ဦးနှင့် ထိခိုက်ဒဏ်ရာရရှိသူ ၃၃၇ ဦးရှိကြောင်း ထုတ်ပြန်ထားသည်။
Public Service Announcement
ထို့ပြင် မတ်လအတွင်း အစုလိုက်၊အပြုံလိုက် အသတ်ခံရသည့် ဖြစ်စဉ် ၈ ခုရှိခဲ့ပြီး သေဆုံးသူ ၁၁၈ ဦးရှိသည်ဟု ဆိုသည်။
“လူ့အခွင့်အရေးဆိုင်ရာဝန်ကြီးဌာနအနေနှင့် ပြည်သူတစ်ရပ်လုံး တန်းတူညီမျှမှုရရှိရေး၊ ငြိမ်းချမ်းရေးနှင့် တရားမျှတမှုရရှိရေးတည်းဟူသော ဦးတည်ချက်များကို ခိုင်ခိုင်မာမာလက်ကိုင်ဆွဲထား၍ အကြမ်းဖက် စစ်အုပ်စု၏ ကျူးလွန်မှုများကိုအပြစ်ပေးအရေးယူနိုင်ရေး အစွမ်းကုန်တာဝန်ယူဆောင်ရွက်သွားပါမည်”ဟု ထုတ်ပြန်ထားသည်။
