ဧပြီ-၂၆၊၂၀၂၅။ဇော်ရမ်း/People’s Spring
အာရက္ခတပ်တော်(AA)သိမ်းယူထားသောပဲခူးတိုင်း၊ ပန်းတောင်းမြို့နယ်မှညောင်ကျိုးဗျူဟာစခန်းကို ပြန်လည်ထိုးစစ်ဆင်ရေးအတွက် စစ်ကောင်စီကအင်အားဖြည့်နေပြီး တိုက်ပွဲများဆက်လက်ပြင်းထန်နိုင်၍ စစ်ရေးသတိပြုကြရန် ပြည်သူ့ကာကွယ်ရေးတပ်ဖွဲ့များက သတိပေးသည်။
ညောင်ကျိုးဗျူဟာစခန်းကုန်းကို AAက မတ်လ (၁၇) ရက်နေ့မှ စတင်ထိုးစစ်ဆင်တိုက်ခိုက်ခဲ့ပြီးဧပြီလ (၂)ရက်နေ့တွင် သိမ်းပိုက်ခဲ့ခြင်းဖြစ်သည်။
ကစဉ့်ကလျား ဆုတ်ခွာထွက်ပြေး နေသော စစ်ကောင်စီတပ်ဖွဲ့ဝင်များကို ဆက်လက်ထိုးစစ်ဆင်တိုက်ခိုက်၍ရသော အခွင့်အရေးရှိခဲ့သော်လည်းအပစ်ရပ်ကြေညာချက်ကြောင့် လိုက်လံ ချေမှုန်းခြင်းမပြုလုပ်ခဲ့ကြောင်း AAက သတင်းထုတ်ပြန်ခဲ့သည်။
Public Service Announcement
ညောင်ကျိုးဗျူဟာစခန်းကုန်းကို ပြန်တိုက်ခိုက်ရန်အတွက် စစ်ကောင်စီကဧပြီလ ၂၀ရက်မှစ၍ ပြည်၊ ပန်းတောင်းမြို့တို့မှ အင်အားအများအပြားပို့ဆောင်နေသည်ဟု သတင်းရရှိသည်။
“ပြည် ဒကစ ကိုအင်အားဖြည့်တယ်။ ဧရာဝတီနဲ့ပဲခူးတိုင်းက စစ်သင်တန်းဆင်းတွေအများဆုံးပါတယ်။ အဲဒီကနေပန်းတောင်းကိုပို့နေတယ်”ဟု ပြည်ခရိုင်မှကာကွယ်ရေးရဲဘော်တစ်ဦးကပြောသည်။
စစ်ကောင်စီသည် အပစ်အခတ်ရပ်စဲရေးကြေညာထားစဥ်ရခိုင်ပြည်နယ်၌ စစ်ရေးတိုက်ခိုက်မှု ၄၀၉ ကြိမ်ပြုလုပ်ပြီး အရပ်သားထိခိုက်သေဆုံးမှုရှိကာနိုင်ငံတကာလူသားချင်းစာနာထောက်ထားမှုဥပဒေကို ပြောင်ပြောင်တင်းတင်း ချိုးဖောက်နေကြောင်း AA၏သတင်းပြန်ကြားရေးဌာနက ဧပြီလ ၂၂ရက်တွင် ထုတ်ပြန်ခဲ့ပြီး စစ်ကောင်စီ၏ အပစ်ရပ်စဲရေးကြေညာချက်မှာ” အမည်ခံ ငလျင်အပစ်အခတ်ရပ်စဲရေး –ငလျင်အပစ်အခတ်ရပ်စဲရေး” ဟုဖော်ပြထားသည်။
ကိုယ်တိုင်ကြေညာထားသော ကြေညာချက်ကိုလေးစားခြင်းမရှိဘဲ စစ်ကောင်စီက ဧပြီလ ၂ ရက်နေ့မှ ၂၂ ရက်နေ့အတွင်း ကျောက်ဖြူ၊ တောင်ကုတ်၊ ကျောက်တော်၊ စစ်တွေ နှင့် ပေါက်တော တို့ကို ပစ်ခတ်တိုက်ခိုက်မှု ၄၀၉ ကြိမ်ပြုလုပ်ခဲ့သည်ဟု AA၏ သတင်းပြန်ကြားရေးတာဝန်ခံခိုင်သုခက ထုတ်ပြန်ထားသည်။
တိုက်လေယာဉ်၊ဒရုန်း၊စက်တပ်လေထီးဖြင့် တိုကခိုက်ခြင်းအပြင်ရေတပ်သင်္ဘောများမှ ပစ်ခတ်ခြင်းလက်နက်ကြီးများဖြင့် ပစ်ခတ်ခြင်းတို့ ပြုလုပ်ခဲ့သည်ဟုဆိုသည်။တိုက်ခိုက်မှုများအတွင်းတွင် အရပ်သား ၁ ဦး သေဆုံးပြီး၊ ၂၈ ဦး ဒဏ်ရာရကာ ဒဏ်ရာရသူများအနက် ၅ ဦးမှာ အသက် ၅ မှ ၁၄ နှစ်အကြားရှိ ကလေးများဖြစ်သည်။
လက်ရှိတွင် ဧရာဝတီတိုင်းအတွင်း ပုသိမ်-မုံရွာလမ်းနှင့် ပဲခူးတိုင်းအတွင်း ရန်ကုန်-ပြည် လမ်းပိုင်းကို အသုံးပြု၍ စစ်ကောင်စီကစစ်ရေးလှုပ်ရှားနေပြီး ပြည်သူ့ကာကွယ်ရေးပူးပေါင်းတပ်များက ပိတ်ဆို့တိုက်ခိုက်နေကြသည်။
ပြည်သူများအနေဖြင့်ပုသိမ်-မုံရွာလမ်း နှင့် ရန်ကုန်-ပြည် လမ်းပိုင်းကိုပါ ယခုရက်ပိုင်း သတိပြုသွားလာကြရန်ကာကွယ်ရေးတပ်ဖွဲ့များကသတိပေးထားသည်။
(AA ကညောင်ကျိုးဗျူဟာစခန်းကို ဧပြီ ၂ ရက်ကသိမ်းပိုက်ခဲ့စဥ်။ဓါတ်ပုံ-AA Info Desk)
