မေ ၃၊၂၀၂၅။မေ/People’s Spring
စစ်ကိုင်းငလျင်ကြီးကြောင့် လူဦးရေထောင်နဲ့ချီသေဆုံးထိခိုက်မှုခံစားခဲ့ရတဲ့ မန္တလေးမြို့မှာ စစ်ကောင်စီက စစ်မှုထမ်းရန်ဆိုကာ နေအိမ်တွေအထိ ဝင်ရောက်ဖမ်းဆီးမှုတွေ ပြုလုပ်နေပါတယ်။
ငလျင်လှုပ်ခတ်အပြီးတစ်လကျော်အကြာ ပြိုကျပျက်စီးမှုတွေ ရှင်းလင်းရေးမပြီးသေးခင်မှာဘဲ စစ်ကောင်စီက လူငယ်တွေကို စစ်မှုထမ်းဖို့ အတင်းခေါ်ဆောင်နေတာ ဖြစ်ပါတယ်။
မန္တလေးမြို့၊ ပြည်ကြီးတံခွန်မြို့နယ်မှာ မနေ့(မေ ၂) ညပိုင်းက စစ်မှုထမ်းစာရင်းမဲ ပေါက်ထားသူတွေရဲ့ နေအိမ်တွေကို ဝင်ရောက်ခေါ်ဆောင်တာတွေလုပ်ခဲ့လို့ လူငယ် ငါးဦးထပ်မနည်း ဖမ်းဆီးခံလိုက်ရတယ်လို့ မြို့ခံတွေက ပြောပါတယ်။
Public Service Announcement
စစ်ကောင်စီအဖွဲ့ဟာ မေလ၂ရက် ည၁၀နာရီကျော်မှာ ပြည်ကြီးတံခွန်မြို့နယ်က သင်ပန်းကုန်းအ
ရှေ့(ညည)ရပ်ကွက်၊၄၉ လမ်း၊ ၁၂၀လမ်းအနီးမှာ စစ်ကား ငါးစီးနဲ့ ဧည့်စာရင်းစစ်တယ်ဆိုပြီး ရောက်လာတာလို့ သိရပါတယ်။
အဲဒီနောက် ဧည့်စာရင်းစစ်နေရင်း မဲနံပတ်စာရင်းပေါက်ထားသူတွေကို စစ်မှုထမ်းဖို့ဆိုပြီး တခါတည်းခေါ်သွားတာလို့ မြို့ခံတစ်ဦးက ပြောပါတယ်။
“ကြိုရှောင်ချိန်မရဘူးဗျ။သူတို့က ဧည့်စာရင်းစစ်ဆိုပြီး လာတာ။အေးအေး ဆေးဆေးပဲလို့ထင်တာ။အဲတာပြီးတော့မှာ နံပတ်၁ကနေ ၅လောက်အထိ မဲကျထားတဲ့သူတွေ ခေါ်တာလို့ ပြောတယ်။စာရင်းကအကုန်သူတို့ဆီရှိပြီးသားလေ။အုပ်ချုပ်ရေးမှူးနဲ့ ရပ်ကွက်ကလူ တွေပါတော့ ဘယ်အိမ်ကဘယ်သူလည်းအကုန်သိပြီးသားလေ”လို့ သင်ပန်းကုန်းအရှေ့(ညည)ရပ်ကွက်နေပြည်သူတစ်ဦးက ပြောပါတယ်။
၎င်းနဲ့နီးစပ်ရာ လူတချို့အပါအဝင် တစ်ရပ်ကွက်ထဲမှာ ပြည်သူ ၅ဦးထပ်မနည်းဖမ်းဆီးခံလိုက်ရ ကြောင်းသိရပြီး အရေအတွက်အတိအကျကို အတည်မပြုနိုင်ဘူးလို့ ဆိုပါတယ်။
စစ်ကောင်စီက စစ်မှုထမ်းခေါ်ယူဖို့ မဲနှိုက်တာတွေကို မတ်လအတွင်းက မန္တလေးမြို့တစ်မြို့လုံးအတိုင်းအတာနဲ့ ပြုလုပ်ထားပါတယ်။
ယခုခေါ်ယူနေတဲ့ စစ်မှုထမ်းဟာ အပတ်စဉ်(၁၃)အတွက်လို့ သိရပြီး မတ်လအတွင်းက နှိုက်ထားတဲ့ မဲရလဒ်မှာ ၁ကနေ ၅အတွင်း နံပတ်ကျထားသူတွေကို ဖမ်းဆီးခေါ်နေတာ လို့သိရပါတယ်။
စစ်ကိုင်းငလျင်ကြီးကြောင့် မေလ ၁ ရက်အထိ စာရင်းအရ သေဆုံးသူ ၃,၈၃၅ ဦး၊ ထိခိုက်ဒဏ်ရာရရှိသူ ၅,၁၀၅ ဦးနဲ့ ပျောက်ဆုံးသူ ၁၀၅ ဦးရှိတယ်လို့ စစ်ကောင်စီက ထုတ်ပြန်ထားပါတယ်။ ငလျင်ဒဏ်ကြောင့် မန္တလေးမြို့မှာဘဲ သေဆုံးသူ ၂,၀၀၀ကျော်ရှိတယ် စစ်ကောင်စီက ထုတ်ပြန်ထားပါတယ်။
