ပခုက္ကူမှာ မဟာဓါတ်အားလိုင်း တိုင်တွေကျိုးလို့ မြို့နယ်လေးခု လျှပ်စစ်မီးပြတ်

မေ ၄၊၂၀၂၅။ ဇေအောင်/People’s Spring

မကွေးတိုင်း၊ ပခုက္ကူမြို့နယ်မှာ မဟာဓါတ်အားလိုင်း တိုင်နှစ်တိုင် ကျိုးလို့ ပခုက္ကူအပါအဝင် မြို့နယ်လေးခုမှာ လျှပ်စစ်ဓါတ်အားပြတ်တောက်နေတယ်လို့ ဒေသခံတွေက ပြောပါတယ်။

မနေ့က မေလ ၃ရက် ညပိုင်းကစပြီး ပခုက္ကူ၊ ရေစကြို၊ ကမ္မနဲ့ မြစ်ခြေမြို့နယ်တွေမှာ မြို့ပေါ်အပြင် ကျေးရွာတွေမှာပါ လျှပ်စစ်ဓာတ်အား ပြတ်တောက်သွားကြောင်း ဒေသခံတွေက ပြောပါတယ်။

ပခုက္ကူမြို့နယ်၊ ညောင်ပင်ကြီးကျေးရွာအနီးက ဗုဒ္ဓကုန်း မဟာဓာတ်အားလိုင်း တိုင်နှစ်တိုင် ကျိုးသွားတာကြောင့် ပြုပြင်နေပြီး ခန့်မှန်းကြာချိန် (၁၀)ရက်ကျော်နိုင်တယ်လို့ ပခုက္ကူလျှပ်စစ်ရုံးက အသိပေး ကြေညာပါတယ်။

Public Service Announcement

ဘာကြောင့် ဓာတ်အားလိုင်း တိုင်နှစ်တိုင် ကျိုးသွားတယ်ဆိုတာကိုတော့ ပခုက္ကူလျှပ်စစ်ရုံးက အသိပေးခြင်းမရှိပါဘူး။

“လေလည်းဘာလည်း မတိုက်ဘဲ ကျိုးသွားတာ။”လို့ ပခုက္ကူဒေသခံတစ်ဦးက ဆိုပါတယ်။

တမြို့လုံး မီးပြတ်သွားလို့ သောက်သုံးရေကအစ ခက်ခဲနေတယ်လို့ ပခုက္ကူမြို့ခံတွေက ပြောပါတယ်။

ပခုက္ကူမြို့မှာ ဓာတ်အားတိုင်မကျိုးခင်က ၃နာရီလာ ၅ နာရီပြတ်စနစ်နဲ့ လျှပ်စစ်မီးပေးဝေနေပြီး ရာသီဥတုပူပြင်းတာကြောင့် လျှပ်စစ်မီးကို ပိုလိုအပ်နေတယ်လို့ ဒေသခံတွေက ပြောပါတယ်။