မေ၂၅၊၂၀၂၅။ထားမြတ်/People’s Spring
ကိုးကန့်တပ်မတော်(MNDAA) ထိန်းချုပ်ထားသည့် အထူးဒေသ(၁)တွင် အခြေခံပညာသင်ကျောင်းများ တိုးချဲ့ဖွင့်လှစ်သွားမည်ဖြစ်ကြောင်း MNDAAကအသိပေးပြီး ပညာရေးဝန်ထမ်းများ ခေါ်ယူခဲ့သည်။
၂၀၂၅-၂၀၂၆ ပညာသင်နှစ်၊ အထူးဒေသ(၁)အတွင်းရှိ အခြေခံပညာကျောင်းများအတွက် ပညာရေးဝန်ထမ်းများခေါ်ယူခြင်း ကြေညာချက်ကို ယနေ့ (မေလ ၂၅ရက်) ထုတ်ပြန်အသိပေးခဲ့ခြင်းဖြစ်သည်။
အထူးဒေသ(၁)တွင် ၂၀၂၄-၂၀၂၅ ပညာသင်နှစ်ကစ၍ ကျောင်းနေအရွယ် ကလေးများအားလုံး ပညာသင်ယူနိုင်ရန်အတွက် အခြေခံပညာကျောင်း (၂၂) ကျောင်းဖွင့်လှစ်ခဲ့ ပြီး ၂၀၂၅-၂၀၂၆ ပညာသင်နှစ်တွင် အခြေခံပညာကျောင်းများ ထပ်မံတိုးချဲ့ဖွင့်လှစ် မည်ဖြစ်သည်ဟု ဆိုသည်။
Public Service Announcement
ထို့ကြောင့် အခြေခံပညာကျောင်းများမှ CDM ပြုလုပ်ထားသော ဆရာ၊ဆရာမများ၊ တက္ကသိုလ်တစ်ခုခုဘွဲရရှိသူများနှင့် CDM ပြုလုပ်ထားသော တက္ကသိုလ်ကျောင်းသား၊သူများအနေဖြင့် အထူးဒေသ(၁) အတွင်းရှိ အခြေခံပညာကျောင်းများတွင် တာဝန်ထမ်းဆောင်လိုပါက လျှောက်ထားနိုင်ကြောင်း အသိပေးထားသည်။
လျှောက်ထားလိုပါက https://www.surveyheart.com/form/681f04f3f061e226ef143cf4 နှင့် Telegram Channel https://t.me/thekokangnewsnetwork တွင်လည်း လျှောက်ထားနိုင်သည်ဟု ဖော်ပြထားသည်။
MNDAAသည် ၂၀၂၃ အောက်တိုဘာ ၂၇ရက်တွင် ၁၀၂၇ စစ်ဆင်ရေးဆင်နွှဲကာ လောက်ကိုင်မြို့ အပါအဝင် ကိုးကန့်ဒေသ တခုလုံးကို သိမ်းပိုက်ထိန်းချုပ်နိုင်ခဲ့သည်။
အရှေ့မြောက်ပိုင်းတိုင်းစစ်ဌာနချုပ်(ရမခ)အပါအဝင် လားရှိုးမြို့ကိုပါ သိမ်းပိုက်နိုင်ခဲ့သော်လည်း တရုတ်အစိုးရ၏ ဖိအားပေးမှုကြောင့် ၂၀၂၅ နှစ်ဆန်းတွင် စစ်ကောင်စီနှင့် အပစ်ရပ်စဲရေးလုပ်ဆောင်ကာ ဧပြီတွင် လားရှိုးမြို့ကို စစ်ကောင်စီထံ ပြန်လွှဲပေးခဲ့ရသည်။
