မေ ၂၆၊၂၀၂၅။ကဖေး/People’s Spring
ဖားကန့်မြိုနယ်၊ လုံးခင်းကျေးရွာရဲစခန်းကုန်း၌ လက်နက်ကြီးများတပ်ဆင်ထားသည့်နေရာများကို ကချင်လွတ်လပ်ရေးတပ်မတော် (KIA) ပူးပေါင်းတပ်က ယနေ့(မေလ ၂၆ရက်) နံနက်အစောပိုင်းတွင် တိုက်ခိုက်ခဲ့သည်။
လုံးခင်းရွာရဲစခန်းမှ လက်နက်ကြီးကုန်းကို နံနက် ၃နာရီကျော်တွင် စတင်တိုက်ခိုက်ခြင်းဖြစ်ကြောင်း KIAနှင့် နီးစပ်သည့် သတင်းရင်းမြစ်ကပြောပြီး တိုက်ခိုက်မှုပုံစံ အသေးစိတ်ကို မပြောလိုဟု ဆိုသည်။
” တိုက်ခိုက်မှုက နာရီဝက်ခန့်ကြာခဲ့ပါတယ်။အပြန်အလှန်ပစ်ခဲ့ကြပြီး လုံးခင်းရဲစခန်းကုန်းက ရမ်းသမ်းပစ်နေလို့ ဒေသခံတွေထိမှာစိုးလို့ ရပ်ပစ်ခဲ့တယ်”ဟု ၎င်းက ပြောသည်။
Public Service Announcement
လက်နက်ကြီး၊လက်နက်ငယ် ပစ်ခတ်သံများကြားခဲ့ရပြီး လုံခင်းရဲစခန်းတိုက်ခိုက်ခံရခြင်းဟု ဖားကန့်ဒေသခံများက ပြောသည်။
” ပထမတော့ စကစစစ်ကြောင်း လုံးခင်းနားအထိရောက်လာတာလားပေါ့။ အဲ့လိုမဟုတ်ဘူး။ လုံးခင်းရဲစခန်းလက်နက်ကြီးကုန်းကို ချတာ။ စစ်ကောင်စီစစ်ကြောင်းက နမ့်တိန်းမှာပဲ ရှိသေးတယ်”ဟု ဖားကန့်ဒေသခံတစ်ဦးက ပြောသည်။
စစ်ကောင်စီ၏ လက်နက်ကြီးပစ်ခတ်မှုကြောင့် ဒေသခံနေအိမ်အချို့ပျက်စီးခဲ့ပြီး အသေးစားဒဏ်ရာရသူများလည်းရှိခဲ့သည်ဟု လုံးခင်းဒေသခံတစ်ဦးက ပြောသည်။
ကချင်လွတ်လပ်ရေးတပ်မတော်(KIA)ပြောခွင့်ရ ဗိုလ်မှူးကြီးနော်ဘူက စစ်ကောင်စီစစ်ကြောင်းသည် ၎င်းတို့လက်လွှတ်ခဲ့ရသည့် စခန်းများ၊ဒေသများကို ပြန်လည်ထိန်းချုပ်နာရီထိုးစစ်ဆင်လာ၍ ခုခံတိုက်ခိုက်နေပြီး ယနေ့(မေလ ၂၆ရက်) နံနက်အစောပိုင်းက လုံးခင်းရဲစခန်းအနီး တိုက်ပွဲဖြစ်ပွားခဲ့သည်ဟု ပြောသည်။
ဒေသခံပြည်သူများအနေဖြင့် စစ်ရေးသတင်းများအဆင်မပြတ်နားစွင့်နေရန် ဗိုလ်မှူးကြီးနော်ဘူက တိုက်တွန်းသည်။
ဖားကန့်မြို့ကို စစ်ကောင်စီက အပြည့်အဝထိန်းချုပ်ထားနိုင်ခြင်းမရှိသော်လည်း ဖားကန့်ဗျူဟာကုန်း၊မဇွပ်ယာန်အချုပ်ထောင်၊ လုံးခင်းဗျူဟာကုန်း၊ လုံးခင်းရဲစခန်း၊ ကံဆီးဗျူဟာကုန်းနှင့်ဖားကန့်မြို့မရဲစခန်း၌ တပ်စွဲထားပြီး လက်နက်ကြီးများတပ်ဆင်ထားသည်။ တိုက်ပွဲဖြစ်ရာနေရာများသို့ အဆိုပါနေရာများမှနေ၍ စစ်ကောင်စီက လက်နက်ကြီးများဖြင့် ပစ်ကူပေးနေခြင်းဖြစ်သည်။
စစ်ကောင်စီတပ်သည် မိုးကောင်း-ကာမိုင်း-နမ့်ယား- လုံးခင်း-ဖားကန့်လမ်းနှင့် မြစ်ကြီးနား-နမ္မတီး-လက်ဝါး-တနိုင်း- ဖားကန့်လမ်းတို့မှတဆင့် အင်အားအများအပြားဖြင့် ဧပြီ၂၃ရက်ကစကာ စစ်ကြောင်းထိုးလာပြီး ယခုအခါ ဖားကန့်မြို့နှင့် ၁၀မိုင်ခန့်အကွာ နမ့်တိန်းကျေးရွာသို့ ရောက်ရှိနေကြောင်း စစ်ရေးသတင်းရင်းမြစ်များထံမှ သိရသည်။
နမ့်တိန်းနှင့် လုံးခင်းကျေးရွာကြား၌ ၇မိုင်၊၆မိုင်၊၅မိုင်၊ကျောက်ဖျာ၊လယ်ပြင် ကျေးရွာတို့ ရှိနေသေးသည်။စစ်ကြောင်းထိုးလာသည့် စစ်ကောင်စီတပ်၊ ရှမ်းနီ(SNA)နှင့်ပြည်သူ့စစ်ပူးပေါင်းအဖွဲ့များသည် မြေပြင်တွင်အထိနာနေသော်လည်း လေကြောင်းပစ်ကူ၊ လက်နက်ကြီးပစ်ကူဖြင့် ရှေ့တိုးလာနေခြင်းဖြစ်သည်။
