ပေါက်မြို့နယ်အ​​ရှေ့ပိုင်းကိုစစ်တပ်ဗုံးကြဲစစ်ရှောင် ၁ ဦး နှင့် ​တော်လှန်​ရေးရဲ​ဘော် ၁ ဦး​သေဆုံး

ဇွန်-၂၅၊၂၀၂၅။ရဲခေါင်/People’s Spring

မကွေးတိုင်း၊ပေါက်မြို့နယ်အ​ရှေ့ပိုင်းကိုစစ်ကောင်စီကလေ ကြောင်းမှ ဗုံးကြဲရာ စစ်ရှောင်တစ်ဦး နှင့် ရဲဘော်တစ်ဦး သေဆုံးခဲ့ပြီး၁၀ဦးခန့်ဒဏ်ရာရခဲ့သည်။

ဇွန် ၂၅ ရက် ၊နံနက် ၆ နာရီငါးမိနစ်ကစ၍ တံတားဦးလေဆိပ်မှတက်လာသည့် Y 12 လေယာဥ်ဖြင့် မိနစ် ၃၀ ကျော်ကြာဗုံးများကြဲခဲ့သည်ဟု ဒေသခံစစ်​ရေးသတင်းအရင်းအမြစ်အချို့က​ပြောသည်။

၁၁ ကြိမ် ဗုံးကြဲရာတွင် ဗုံးအလုံးရေ ၃၄ လုံးအသုံး ပြုခဲ့ကြောင်းလည်း ပေါက်မြို့နယ်စစ်ရေး သတင်းရင်းမြစ်က အသိပေးသည်။

Public Service Announcement

“ပေါက်မြို့အရှေ့ဘက်က ပျဥ်ချောင်းအုပ်စုလှည်းဝိုင်ရွာက စစ်ရှောင်သားအဖနှစ်ဦးထိမှန် ။အဖေ ဖြစ်သူသေဆုံး။တိုက်ခိုက်ရေးရဲဘော်ငါးဦးထိတယ်။ရဲဘော်တစ်ဦးသေဆုံးသွားတယ်။နေအိမ်တစ်လုံးပေါ်ကျတဲ့ဗုံးကြောင့်မိသားစုလည်း ထိခိုက်ထားတယ်။ထိခိုက်မှုများပါတယ်”ဟု ၎င်းက ပြောသည်။

ဇွန် ၂၃ ရက်နံနက်ပိုင်းကလည်း ပေါက်မြို့နယ်တောင်ပိုင်းကျေးရွာများကိုစစ်ကောင်စီက လေ ကြောင်းမှ ဗုံးကြဲ တိုက်ခိုက်ရာ ၅ ဦး သေဆုံးပြီး ကလေးငယ်နှင့်ပြည်သူ ၁၀ ဦးကျော်ဒဏ်ရာရရှိခဲ့သည်။

ပခုက္ကူမြို့နယ် နှင့် ကမ္မမြို့ မှတက်လာသည့် အင်အား ၅၀၀ ဝန်းကျင်နှင့် ယာဥ်အစီးရေ ၁၀၀ ခန့်ပါ စစ်ကောင်စီစစ်တပ်စစ်ကြောင်း ရွေ့လျားနိုင်ရန် လေကြောင်းတိုက်ခိုက်မှုများဆက်တိုက်ပြုလုပ်နိုင်ကြောင်း တော်လှန်ရေးတပ်ဖွဲ့များက အသိ ပေးသည်။

“ဒီနေ့ မနက်ဗုံးကြဲသွားတဲ့နေရာတွေနဲ့ လက်ရှိ စစ်ကောင်စီစစ်ကြောင်းရောက်နေတဲ့နေရာနဲ့က သုံး မိုင်လောက်ပဲဝေးတယ်”ဟုအညာမြေတပ်ပေါင်းစုမှတာဝန်ရှိသူကလူထုနွေဦးသို့ပြောသည်။

လက်ရှိ စစ်တပ်စစ်ကြောင်းသည် မန်းကျည်းသုံးပင်ကျေးရွာသို့ရောက်ရှိနေကာ ထိုမှတဆင့် သာကြီးတောင်၊ တပ်မတောင် ကိုကျော်ဖြတ်ပြီးပေါက်မြို့နယ် ရေပြာသို့ ဝင်ကာ ရေပြာမှတဆင့် ပေါက်ကပစ(၂၄)ထိသွားနိုင်ကြောင်းတော်လှန်ရေးတပ်ဖွဲ့များက ခန့်မှန်းသည်။

စစ်တပ်စစ်ကြောင်းသွားရာ လမ်းကြောင်းရှိ ကျေးရွာများအားလုံးသည် ဘေးလွတ်ရာသို့ တိမ်းရှောင်နေကြရသည်မှာ ရက်ပေါင်း၂၀ ကျော်ကြာမြင့်လာပြီဖြစ်ပြီးအရေးပေါ်ရိက္ခာများကူညီပေးရန်လည်း မေတ္တာရပ်ခံထားသည်။

ကားဖြင့် သုံးနာရီဝန်းကျင်ခရီးသာရှိသည့်ပခုက္ကူ-ပေါက် လမ်းပိုင်းကို ဇွန်လ ၁ ရက်နေ့ကတည်း က ထွက်လာသည့် စစ်ကောင်စီစစ်ကြောင်းသည် ရက်ပေါင်း ၂၅ ရက်ကြာသည်အထိ ​ပေါက်သို့မ​ရောက်​သေး​ပေ။

ဒေသတွင်းတပ်ပေါင်းစုက ကြားဖြတ်ပိတ်ဆို့တိုက်ခိုက်မှုကြောင့် တိုက်ပွဲများလည်း မကြာခဏ ဖြစ်နေကာ နှစ်ဖက်ထိခိုက်မှုရှိသည်။

ယခုစစ်ကြောင်းသည် ပေါက်မြို့နယ် ကာကွယ်ရေးပစ္စည်းစက်ရုံကို အားဖြည့်ခြင်းအပြင် သီးခြားစစ်ရေးရည်မှန်းချက်များရှိနေကြောင်း သုံးသပ်မှုအချို့ရှိသည်။

အာရက္ခတပ်တော် AA နှင့် ဒေသတွင်းတပ်ပေါင်းစုများ၏ စစ်ရေးအရှိန်ကို ကြိုတင်ကာကွယ်ရန်အတွက်ကပစ-၂၄ ကို အားဖြည့်ရန်ကြိုစားခြင်းဖြစ်နိုင်​ကြောင်းသုံးသပ်မှုများလည်းရှိသည်။