ဇွန်-၂၈၊ ၂၀၂၅။ မေ/People Spring
မန္တလေးတိုင်း၊ ငါန်းဇွန်မြို့နယ်ကို စစ်တပ်က လေကြောင်းတိုက်ခိုက်ခဲ့တာမို့ အမျိုးသား ၁ဦးသေဆုံးပြီး ပြည်သူ ၆ဦး ထိခိုက်ဒဏ်ရာတွေရရှိခဲ့တယ်လို့ ဒေသခံတွေက ပြောပါတယ်။
ဒီနေ့ မနက် ၁၁နာရီ ၂၀ မိနစ်အချိန်မှာ ငါန်းဇွန်မြို့နယ် ယိုးဒယားရွာသစ်ရွာ ရေဆိပ်အနီးကို စစ်တပ်က ဂျက်ဖိုက်တာနဲ့ ဗုံးကြဲတိုက် ခိုက်ခဲ့တာလို့ သိရပါတယ်။
လေကြောင်းတိုက်ခံရမှုမှာ နေအိမ် ၅လုံးပျက်စီးပြီး အသက် ၆၉နှစ်အရွယ် ဦးပြား သေဆုံးခဲ့ပြီး ဦးဘိုးညို(၃၇)နှစ်၊ ကိုရဲနောင်မိုး (၃၈)နှစ်၊ ဦးကျော်လွင်(၃၆)နှစ်၊ မတင်မိုး(၄၅)နှစ်၊ ဒေါ်ခင်ဌေးဦး (၃၉)နှစ်၊ဒေါ်မူယာဌေး(၄၃)နှစ်တို့ ထိခိုက်ဒဏ်ရာတွေရခဲ့တယ်လို့ ဆိုပါတယ်။
Public Service Announcement
“တိုက်ပွဲလည်းမရှိဘူးဗျ။ သပ်သပ်ကိုလာပစ်သွားတာ။ ဗုံး ၃လုံး ကြဲချသွားတယ်”လို့ ဒေသခံတစ်ဦးက ပြောပါတယ်။
စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ မန္တလေးတိုင်းအတွင်းက မြို့နယ်တွေကို လေကြောင်းတိုက်ခိုက်မှုပြုလုပ်နေပြီး မနေ့ကလည်း တောင်သာမြို့နယ်ထဲက ငွေသောင်ကျေးရွာကို စက်တပ် လေထီး(Paramotor)သုံးစီးနဲ့ လေကြောင်းတိုက်ခိုက်မှု ပြုလုပ်ခဲ့တယ်လို့ သိရပါတယ်။
