ဇွန်-၂၈၊၂၀၂၅။ဇေအောင်၊ဇော်ရမ်း/People’s Spring
မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)မှ ပါရာမော်တာနှစ်စီးက ဆားလင်းကြီးမြို့နယ်အတွင်း ဗုံးကြဲတိုက်ခိုက်ရာ အရပ်သားလေးဦးသေဆုံးသွားသည်။
“သတင်းကြားကြားချင်း ကယ်ဆယ်ရေးလုပ်ဖို့ပြေးသွားတော့ အားလုံးအသက်မဲ့နေပါပြီ။ တော်တော်ကိုရက်ရက်စက်စက်လုပ်တာပါ”ဟု ဆားလင်းကြီးမြို့ခံတစ်ဦးကပြောသည်။
နမခမှ တက်လာသည့် ပါရာမော်တာနှစ်စီးကဆားလင်းကြီးမြို့နယ်မှ သရက်ကိုင်းကျေးရွာအတွင်းသို့ဇွန်လ ၂၈ရက် နံနက် ၉နာရီခန့်တွင်ဗုံးကြဲချသောကြောင့် ကျေးရွာမှ အမျိုးသား ၄ ဦး သေဆုံးခဲ့ခြင်းဖြစ်ကြောင်းအညာပစ်တိုင်းထောင်လေးများအဖွဲ့ နှင့် ချင်းတွင်းမြစ်ကမ်းဘေးကျေးရွာများသပိတ်ကော်မတီတို့ကထုတ်ပြန်ထားသည်။
Public Service Announcement
ဇွန်လ (၂၈)ရက်မနက်ပိုင်းက ဆင်ဖြူရှင်တံတားမှ စစ်သင်္ဘော (၃)စီး ၊ဖလပ်ယာဥ် ၈ စီးသည်ချင်းတွင်း မြစ်ကြောင်းအတိုင်းဆန်တက်လာသည်။ထိုသို့ဆန်တက်လာချိန် စစ်သင်္ဘောပေါ်မှ မြစ်ကမ်းဘေးဝဲ၊ယာက ကျေးရွာတွေကို လက်နက်ကြီးများဖြင့် ပစ်ခတ်ခဲ့ပြီး နမခ မှတက်လာသော ပါရာမော်တာ၂စီးဖြင့် ဗုံးသီးများချခဲ့ခြင်းဖြစ်ကြောင်း ချင်းတွင်းမြစ်ကမ်းဘေးကျေးရွာများသပိတ်ကော်မတီက ပြောပါသည်။
“သင်္ဘောတွေသွားလို့ရအောင် ပါရာမိုတာနဲ့ချပြီး ကာဗာပေးတာ။ သေဆုံးတာက ၃၀ ကျော်၄၀နီးပါးက၃ယောက် ၊ ၂၅ဝန်းကျင်က တစ်ယောက်။သေဆုံးတဲ့သူတွေကို ကိစ္စပြီးဆုံး(နာရေးလုပ်ပြီး)တာ ဒီညနေက။”ဟု ချင်းတွင်းမြစ်ကမ်းဘေးကျေးရွာများသပိတ်ကော်မတီမှ ကိုအောင်ခန့်ဇော်က ပြောသည်။
“ကျနော်တို့နယ်ကို နှစ်ရက်ဆက်ကြဲတာပါ။ မနေ့က ဘုတလင်နယ်ထဲ ကြဲတယ်။ လူမထိခဲ့ဘူး။ဒီနေ့ ဆားလင်းကြီးနယ်ကို ကြဲတာပါ။ ဒီနေ့က အမျိုးသမီး သုံးယောက် အမျိုးသားတစ်ယောက်သေဆုံးပါတယ်” ဟု ဒေသခံတစ်ဦးကလည်းပြောသည်။
ထို့အပြင် လက်နက်ကြီးဖြင့်ပစ်ခတ်ခဲ့သောကြောင့် လည်းထိခိုက်မှုများရှိနိုင်သော်လည်း ယခုချိန်ထိ သတင်းမရသေးဟု ကိုအောင်ခန့်ဇော်ကဆက် ပြောသည်။
ထို့အပြင် ချင်းတွင်းမြစ်ကြောင်းအတိုင်းဆန်တက်လာသည့် စစ်ကောင်စီရေယာဉ် ၁၁ စီးသည် မုံရွာမြို့သို့ရောက်ရှိလာပြီး ဆာလင်းကြီးမြို့နယ်အပါအဝင် အထက်ပိုင်းဒေသများကိုဆက်တက်နိုင်သည်ဟု ပြည်သူ့ကာကွယ်ရေးအဖွဲ့များကသတိပေးထားသည်။
ထိုစစ်သင်္ဘောများသည် လက်ရှိ မုံရွာ၊ အလုံမင်းဒေါင့်ဆိပ်ကမ်းတွင် ညအိပ်ရပ်နားထားကြောင်း သိရသည်။
စစ်ကောင်စီရေယာဉ် ၁၁ စီးတွင် စစ်သင်္ဘော ၃ စီး ၊ ဖလပ် ၉ စီးပါဝင်သည်။စစ်ကောင်စီသည် ချင်းတွင်းမြစ်အပြင် ဧရာဝတီမြစ်ကြောင်းမှလည်း စစ်ရေယာဉ်များ အထက်ပိုင်းသို့ ဆန်တက်နေပြီး ယနေ့တွင် မန္တလေးတိုင်း တံတားဦးမြို့နယ်အတွင်းရောက်ရှိနေကြောင်းသတင်းရရှိသည်။
(ချင်းတွင်းမြစ်အတွင်းမှစစ်သင်္ဘောများအား တွေ့ရစဥ်။ ဓာတ်ပုံ-အောင်ခန့်ဇော်၊ ချင်းတွင်းမြစ်ကမ်းဘေးကျေးရွာများသပိတ်ကော်မတီ ၊အညာပစ်တိုင်းထောင်ကလေးများ )
