ဇူလိုင်-၆၊၂၀၂၃။ဇော်ရမ်း/People’s Spring
ဖားကန့်တွင်ကျေးရွာအချို့၌ တိုက်ပွဲများငြိမ်သက်နေ၍ နေရပ်ပြန်သော စစ်ဘေးရှောင်များကို စစ်ကောင်စီက ဖမ်းဆီးပြီးအမျိုးသမီးနှင့် ကလေးများအားပြန်လွှတ်သော်လည်း အမျိုးသားများအားပြန်မလွှတ်ဘဲ ဖမ်းဆီးထားကြောင်းဒေသခံအချို့ကပြောသည်။
ဖားကန့်မြို့နယ်၊ဆွတ်ငိုင်ယန်၊အမှိုက်ပုံ၊ မော်ဝမ်းလေးရွာတို့၌ ပြီးခဲ့သည့်ရက်ကတိုက်ပွဲများကြောင့် စစ်ဘေးရှောင်နေရသောဒေသခံလူငယ်၊ လူလတ်ပိုင်းအမျိုးသားများ ရွာပြန်စဥ်ဖမ်းဆီးခေါ်ဆောင်ခံထားရကြောင်း ဖားကန့်ဒေသခံတစ်ဦးကပြောသည်။
“တိုက်ပွဲဖြစ်သံမကြားရတော့လို့ပြန်ကြတာ။ ကလေးနဲ့ အမျိုးသမီးတွေပဲပြန်လွှတ်လိုက်တယ်။ လူငယ်၊ လူလတ်ပိုင်းတွေ ခေါ်ထားတယ်။ မိသားစုဝင်တွေ တငိုငိုတရီရီဖြစ်နေကြတယ်” ဟု ဖားကန့် ဒေသခံက ပြောသည်။
Public Service Announcement
စစ်တပ်ကဖမ်းခေါ်ထားသူဦးရေသည် ၅၀ဦးထက်မနည်းဘဲ တိုက်ပွဲအတွင်း လူသားဒိုင်းလုပ်ခြင်းနှင့် စစ်မှုထမ်းဥပဒေဖြင့် စစ်သားစုဆောင်းမည်ကို ဒေသခံများ စိုးရိမ်နေကြသည်။
ဆွတ်ငိုင်ယန်၊အမှိုက်ပုံ၊ မော်ဝမ်းလေးရွာတို့ကို စစ်ကောင်စီကထိန်းချုပ်ထားပြီး နေအိမ်များအားဖျက်ဆီး၍ ဝင်ရောက်နေသည်ဟုသိရသည်။ စစ်တပ်စစ်ကြောင်းတွင် ဖားကန့်ဒေသနယ်မြေကျွမ်းကျင်သည့် ပြည်သူ့စစ်အဖွဲ့များပါလာပြီး ယမန်နှစ်ကတိုက်ပွဲအတွင်း စစ်တပ်ကလက်လွတ်ထားရသည့်လှမောင်းကုန်းကို ဦးတည်စစ်ကြောင်းထိုးနေသည်ဟု KPDF ရဲဘော်တစ်ဦးကပြောသည်။
“တိုက်ပွဲက ရက်ရှည်သွားနိုင်တယ်။ ဒေသခံပြည်သူတွေအနေနဲ့ကလုံခြုံရေးပိုင်းကိုတော်တော်လေး အာရုံစိုက်ထားသင့်ပါတယ်။ စစ်ကြောင်းက မနိုင်နိုင်ရာမဲမှာပါ”ဟု KPDF ရဲဘော်ကပြောသည်။
စစ်တပ်စစ်ကြောင်းသည် ၂၀၂၄ခုနှစ်က ဆိုင်းတောင်ရွာတိုက်ပွဲ၊ ယခုနှစ် မေလက လုံးခင်းကျေးရွာအုပ်စု၌ဖြစ်ပွားသောတိုက်ပွဲများတွင် အရပ်သားပြည်သူများအားဖမ်းဆီး၍ လူသားဒိုင်းလုပ်ခဲ့ပြီး သတ်ဖြတ်မှုများလည်းကျူးလွန်ခဲ့သည်။
လက်ရှိဖြစ်ပွားနေသောတိုက်ပွဲတွင်လည်း အရပ်သားသေဆုံးမှုများရှိနေပြီး ဇူလိုင် ၅ ရက်နေ့က အေးမြသာယာရပ်ကွက်အတွင်းတိုက်ပွဲ၌ အရပ်သား ၄ ဦးသေဆုံးခဲ့ကြောင်းသတင်းရရှိသည်။
“တစ်ယောက်ကို KPDF ထောက်ပို့ဆိုပြီးပစ်သတ်သွားတာ။ဒေသခံတွေ စစ်ရေးသတင်းကိုအမြဲလေ့လာနေဖို့လိုတယ်”ဟုဖားကန့်မြို့ခံတစ်ဦးကပြောသည်။
