ဇူလိုင်-၁၃၊၂၀၂၅။ထားမြတ်/People’s Spring
ကရင်ပြည်နယ်၊မြ၀တီမြို့နယ်ရှိ စစ်တပ်၏ဝေါလေဗျူဟာစခန်း၏ လက်နက်တိုက်ကို ဒရုန်းဖြင့် တိုက်ခိုက်ဖောက်ခွဲခဲ့ကြောင်း Force for Federal Democracy(FFD)က ယနေ့ ဇူလိုင် ၁၃ရက်တွင် ရုပ်သံမှတ်တမ်းထုတ်ပြန်သည်။
ဝေါလေဗျူဟာလက်နက်တိုက်ကို FFD ဒရုန်း တပ်ဖွဲ့နှင့် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၆)ဒရုန်း တပ်ဖွဲ့တို့ပူးပေါင်းတိုက်ခိုက် ဖောက်ခွဲခဲ့ခြင်းဖြစ်ကြောင်းဖော်ပြသည်။
https://www.facebook.com/LuduNwayOo/videos/1417457709524704
Public Service Announcement
တိုက်ခိုက်မှု ဖြစ်စဉ် အသေးစိတ် ဖော်ပြမထားသော်လည်း ရုပ်သံမှတ်တမ်းတွင်ကြီးမားသည့် ပေါက်ကွဲမှု ဖြစ်ပေါ်ခဲ့သည်ကို တွေ့ရသည်။
အဆိုပါ တိုက်ခိုက်မှု အခြေအနေများနှင့်ပတ်သက်ပြီး မေးမြန်းရန်FFD ဒုတာဝန်ခံ ကိုအောင်အောင်ထံသို့ဆက်သွယ်ထားဆဲဖြစ်သည်။
KNU ပူးပေါင်းတပ်က ၀ိုင်းပတ်ပိတ်ဆို့တိုက်ခိုက်နေသည့် ဝေါလေဗျူဟာတွင် ဇူလိုင် ၁၁ရက်က ပြင်းထန်သည့်ပေါက်ကွဲမှု ဖြစ်ပွားခဲ့ရာ ထိုင်နိုင်ငံဘက်မှ အဆိုပေါက်ကွဲမှုကို မှတ်တမ်းတင်ထားသောရုပ်သံမှတ်တမ်းများစတင်ထွက်ပေါ်ခဲ့သည်။
ယင်းပေါက်ကွဲမှုမှာ တော်လှန်ရေးပူးပေါင်းတပ်ဘက်က ဒရုန်းဖြင့်တိုက်ခိုက်ခဲ့၍ ဖြစ်သည်ဟု KNU သတင်းရင်းမြစ်ကဇူလိုင် ၁၂ရက်တွင် ပြောပြထားသည်။
“ကျနော်တိုဘက်က ချတာ။ဒီဘက်ကတော့ တဆင့်ခြင်းတဆင့်လေ။ ဝိုင်းပတ်ပိတ်ဆိုထားပြီးဒရုန်းနဲ့ပဲစစ်ဆင်တာပေါ့။ ဒရုန်းက အခုက အလေးချိန်က တော်တော်ကြီးတဲ့ အလေးချိန်ဆိုတော့ပေါက်ကွဲမှုကလည်း အားပြင်းတာပေါ့။ အဲဒီလိုမျိုး”ဟု KNU သတင်းရင်းမြစ်ကပြောထားသည်။
အဆိုပါပေါက်ကွဲမှု ဖြစ်ပွားခဲ့သည့်အပြင် ဝေါလေဗျူဟာ၏ ကာကင်းစခန်းကြီးဖြစ်သော ဥကရစ်ထ တပ်စခန်းကို KNU/PDF ပူးပေါင်းတပ်ကဇူလိုင် ၁၂ရက်တွင်သိမ်းပိုက်နိုင်ခဲ့သည်။ကျန်နေသည့် ဝေါလေဗျူဟာကိုလည်း ဆက်လက်သိမ်းပိုက်နိုင်ရန် တိုက်ခိုက်နေကြောင်း KNU သတင်းရင်းမြစ်က ယနေ့ ပြောပြသည်။
“ဘာဖြစ်လိုလည်းဆိုတော့ သူတိုစခန်းတွေကဘာမှမရှိတော့ဘူး။နောက်ပြီးတော့ဟိုတနေ့က သူများသူ့ကို ဒရုန်းသွားချတာသူတိုစခန်းတော်တော်ပျက်နေပြီ။ပျက်နေပြီဆိုတော့သူတိုလည်းတော်တော်ကြောက်လန့်နေပြီ”ဟုKNUသတင်းရင်းမြစ်ကပြောသည်။
KNU နှင့် PDF ပူးပေါင်းတပ်များသည် မြ၀တီမြို့နယ်အတွင်း မြန်မာ-ထိုင်းနယ်စပ်တလျောက်ရှိ စစ်ကောင်စီစခန်းများကို တခုပြီးတခု သိမ်းပိုက်လျက်ရှိရာ ပြီးခဲ့သည့် တလခွဲကျော်အတွင်း ဘလယ်ဒို၊ ကနဲလေး၊ ရွှေအေးမြိုင်၊ ဘုရင့်နောင်၊ မော်ခီး၊သေ့ဘောဘိုး၊ ထိကပလယ်၊ ဥကရစ်ထ စခန်းများသိမ်းပိုက်ထားနိုင်ခဲ့ပြီး ဝေါလေနှင့်တိသဲလယ် စခန်းတို့သာ ကျန်တော့သည်။
ရုပ်သံ-FFD
