ဇူလိုင်-၁၄၊၂၀၂၅။ထားမြတ်/People’s Spring
ကချင်ပြည်နယ်၊ဖားကန့်မြို့နယ်တွင် စစ်ကောင်စီတပ်က ကချင်နှစ်ခြင်းခရစ်ယာန်ဘုရားကျောင်းဝင်ရောက်ကာ ဘာသာရေးဆရာများအပါအဝင် လူဦးရေ ၂၀ ခန့်ကို ဖမ်းဆီးထားကြောင်း ကချင်သတင်းရင်းမြစ်က ပြောသည်။
ဇူလိုင် ၁၃ရက် ည ၇နာရီခန့်မှစ၍ ဖားကန့်မြို့နယ် မှော်ဝမ်းဒေသရှိ ဘုရားကျောင်းသို့ ဝင်ရောက် တပ်စွဲထားပြီး ယနေ့ (ဇူလိုင် ၁၄ရက်) နံနက်အထိ စစ်ကောင်စီတပ်များ ဘုရားကျောင်း၌ဆက်ရှိနေသည်ဟု ဆိုသည်။
“မှော်ဝမ်း ဘုရားကျောင်း အဖမ်းခံရတဲ့ မှတ်တမ်းပြုစုခံရတဲ့ ဓမ္မအမှုဆောင်စာရင်း”ဟုကချင်သတင်းရင်းမြစ်က ဖမ်းဆီးခံထားရသူများအနက် ၁၅ဦး၏ အမည်စာရင်းပါ စာရွက်ကို ပြသ ပြောပြသည်။
Public Service Announcement
“သူတို့နဲ့ ဆိုင်မှ မဆိုင်တာ။ စကစ ကာဗာယူတာ သက်သက်။ ဘုရာကျောင်းထဲက မထွက်လာကြသေးဘူး စကစတွေ။ ဖမ်းခံထားရတာက ၂၀ ဝန်းကျင်ရှိတယ်”ဟု ကချင်သတင်းရင်းမြစ်က ပြောသည်။
လက်ရှိ အခြေအနေမှာ စစ်ရေးတင်းမာနေဆဲဖြစ်ပြီး ဖားကန့်၌ တိုက်ပွဲဆက်ရှိနိုင်ဟု ၎င်းက ဆိုသည်။
စစ်ကောင်စီတပ်နှင့် ပြည်သူ့စစ်ပူးပေါင်းတပ် သည် ဖားကန့်ဒေသ ပြန်လည်ထိန်းချုပ်နိုင်ရေး အတွက် စစ်ရေးလှုပ်ရှားနေ၍ ကချင်လွတ်လပ်ရေးတပ်မတော်(KIA) ပူးပေါင်းတပ်နှင့် တိုက်ပွဲများ နေ့စဉ်နီးပါး ဖြစ်ပွားလျက်ရှိသည်။
အခြားသတင်းတရပ်မှာ ဖားကန့်မြို့နယ် ခွန်စိုင်ယန်ဒေသ၌ အင်အား ၈ဦးရှိသည့် KIA ရှေ့တန်းစခန်း တစ်ခုကို စစ်ကောင်စီ လက်အောက်ခံ မင်းဇေသန့် (ဝါရာဇွပ် ပြည်သူ့စစ်)အဖွဲ့က အင်အားအလုံးအရင်းဖြင့် တိုက်ခိုက်ခဲ့ရာ KIAအရာရှိတစ်ဦး ဖမ်းဆီးခံခဲ့ရဟု ကချင်စစ်ရေးသတင်းရင်းမြစ်တစ်ဦးက ပြောသည်။
ဖမ်းဆီးခံရသည့် KIAအရာရှိ ဗိုလ်ကြီး ဖန်းတန်အား ဆေးကုသပေးနေသည့် ရုပ်သံရိုက်ကူးပြီးနောက် ယင်းနေရာ၌ပင် နှိပ်စက်သတ်ဖြတ်ခဲ့ကြောင်း သတင်းရင်းမြစ်က ပြောသည်။
ဗိုလ်ကြီးဖန်းတန်ကို ဆေးကုသပေးနေသည့် ရုပ်သံကို ဝါရာဇွပ်ပြည်သူ့စစ်အဖွဲ့က တယ်လီဂရမ်မှ ထုတ်ပြန်ထားသည်ကို တွေ့ရသည်။
အလားတူ ဝါဒဖြန့် ရုပ်သံရိုက်ကူးပြီးနောက် သတ်ဖြတ်ခံရသည့် ဗိုလ်ကြီးဖန်းတန်၏ ရုပ်အလောင်း မှတ်တမ်း ဓာတ်ပုံကိုလည်း ကချင်သတင်းရင်းမြစ်တို့က ဝါဒဖြန့် ရုပ်သံနှင့်အတူတွဲ၍ ဖော်ပြကာ စစ်ကောင်စီ လက်အောက်ခံ ပြည်သူ့စစ်တပ်ဖွဲ့၏ လုပ်ရပ်ကို အသိပေးထားသည်။
“အဲဒါအမှန်ပါ။ မနေ့က(ဇူလိုင် ၁၂ရက်က)”ဟု ကချင်စစ်ရေးသတင်းရင်းမြစ်က ပြောသည်။
ခွန်စိုင်ယန်၌တပ်စွဲထားသည့် စစ်ကောင်စီတပ်အား KIAပူးပေါင်းတပ်က ဇူလိုင် ၁၀ရက်တွင် တိုက်ခိုက်ခဲ့ပြီးနောက် မင်းဇေသန့် ပြည်သူ့စစ် အဖွဲ့က အင်အားအလုံးအရင်းဖြင့် ပြန်လည် တိုက်ခိုက်လာခြင်းဖြစ်သည်ဟု ဆိုသည်။
လက်ရှိတွင် အဆိုပါ ဒေသ၌ စစ်ရေးတင်းမာနေဟု ကချင်သတင်းရင်းမြစ်က ပြောသည်။
