စက်တင်ဘာ−၁၇၊ ၂၀၂၅။ ထားမြတ်/People’s Spring
တနင်္သာရီတိုင်း၊ ထားဝယ်မြို့နယ် ပကာရီကျေးရွာတိုက်ပွဲအတွင်း အထိနာသည့် စစ်ကောင်စီတပ်က ကျေးရွာကို လေကြောင်း ဗုံးကြဲတိုက်ခိုက်ခဲ့ကြောင်း ကရင်အမျိုးသားအစည်းအရုံး(KNU) မြိတ်-ထားဝယ်ခရိုင်က သတင်းထုတ်ပြန်သည်။
စက်တင်ဘာ ၁၄ရက်က စစ်ကောင်စီတပ်ကို KNLA ပူးပေါင်းတပ်က ကြားဖြတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၀ဦးသေဆုံးပြီး ၁၅ဦးခန့် ဒဏ်ရာရရှိကာလက်နက်၁လက်နှင့် ခဲယမ်းအချို့သိမ်းရဟုဖော်ပြသည်။
စစ်ကောင်စီတပ်က ကျောက်မဲတောင်စခန်းမှ ထားဝယ်မြို့သို့ စစ်ကြောင်းချိန်းပြန်လာနိုင်ရန် ထားဝယ်မြို့မှ တက်လာသည့် စစ်ကူအင်အား ၁၀၀ခန့်ကို KNLA တပ်မဟာ(၄)၊ တပ်ရင်း(၁၂)တော်လှန်ရေးပူးပေါင်းတပ်ဖွဲများ၊ ပြည်သူ့ကာကွယ်ရေးတပ်ဖွဲများက ကြားဖြတ်တိုက်ခိုက်ခဲ့ခြင်းဖြစ်သည်ဟု အသိပေးသည်။
Public Service Announcement
စစ်ကောင်စီလေကြောင်းတိုက်ခိုက်မှုကြောင့် ပျက်စီးခဲ့ရသော ထားဝယ်မြို့နယ် ပကာရီကျေးရွာမြင်ကွင်း။ ဓာတ်ပုံ − KNU စစ်ကောင်စီလေကြောင်းတိုက်ခိုက်မှုကြောင့် ပျက်စီးခဲ့ရသော ထားဝယ်မြို့နယ် ပကာရီကျေးရွာမြင်ကွင်း။ ဓာတ်ပုံ − KNU စစ်ကောင်စီလေကြောင်းတိုက်ခိုက်မှုကြောင့် ပျက်စီးခဲ့ရသော ထားဝယ်မြို့နယ် ပကာရီကျေးရွာမြင်ကွင်း။ ဓာတ်ပုံ − KNU ဓာတ်ပုံ − KNU
” စစ်ကြောင်းက စစ်ကူတက်လာတယ်။ ဟိုဘက် ကျောက်မဲတောင်ကလည်း ထားဝယ်ကို ပြန်လှည့်လာမယ်ဆိုတော့ တိုက်ပွဲဖြစ်ဖို့အခြေအနေရှိတယ်လို့တော့ ခန့်မှန်းရတာပေါ့”ဟု KNLA သတင်းရင်းမြစ်တဦးက ဒေသတွင်း စစ်ရေး အခြေအနေကို ပြောသည်။
ထိုသို့ တိုက်ခိုက်ခံရ၍ စစ်ကောင်စီတပ်က တိုက်ပွဲနှင့်သက်ဆိုက်မှု မရှိသော ပကာရီကျေးရွာ အတွင်းသို ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ ဘုန်းကြီးကျောင်း (၁) ကျောင်း အပါအဝင် ပြည်သူလူထု နေအိမ်အချို့ ထိခိုက်ပျက်စီးခဲ့ကြောင်း KNU မြိတ်-ထားဝယ်ခရိုင်ကထုတ်ပြန်ကာ ထိခိုက်ပျက်စီး မှတ်တမ်းဓာတ်ပုံများ ဖော်ပြသည်။
ပကာရီကျေးရွာကို စစ်ကောင်စီက လေကြောင်းမှဗုံးကြဲ၍ ပြည်သူ ၂ဦးထိခိုက်ဟု ကြားသိရကြောင်း KNLA သတင်းရင်းမြစ်က ပြောသည်။
“စကစကတော့ သူအထိနာနေတော့ တိုက်ပွဲနဲ့မသက်ဆိုင်တဲ့ ပြည်သူလူထုကိုသူတို့ချမှာပဲ။ပြည်သူလူထုရွာထဲဗုံးကြဲတာတို့ပညာရေးစာသင် ကျောင်းဗုံးလာကြဲတာတို့ ရည်ရွယ်ချက်ရှိရှိ တနိုင်ငံလုံးအတိုင်းအတာ နေ့တိုင်းနီးပါး လုပ်တယ်လို့ ပြောလို့ရတယ် ။ ကျနော်တို့ တနင်္သာရီတိုင်းမှာလည်း ပြည်သူလူထုကို ပစ်မှတ်ထားပြီး ရန်သူသဖွယ်သဘောထားပြီးလုပ်တာ။” ဟု KNLA သတင်းရင်းမြစ်က ပြောသည်။
KNLA ပူးပေါင်းတပ်သည် စက်တင်ဘာ ၁၁ရက်ကလည်း ထိုင်း-မြန်မာနယ်စပ် မောတောင်နယ်စပ်လမ်းပိုင်း တနင်္သာရီမြို့နယ် သိန်ခွန်းကျေးရွာ အနီးတွင်လည်း စစ်ကောင်စီတပ်ကို တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၀ဦးထက်မနည်း ထိခိုက်သေဆုံးကာ လက်နက် ၃လက်နှင့် ခဲယမ်းကျည်များစွာ သိမ်းရခဲ့သည်။
စက်တင်ဘာ ၁၂ရက်ကလည်း တိုက်ပွဲဖြစ်နေသည့် မောတောင်လမ်း သိန်ခွန်းကျေးရွာအနီးကိုလည်း စစ်ကောင်စီက လေယာဉ်ဖြင့် ဗုံးလာကြဲရာ KNLA တပ်မဟာ(၄)နှင့် ပူးပေါင်းတပ်က ပစ်ခတ်ခဲ့ပြီး လေယာဉ်ထိခိုက်မှုရှိခဲ့ကြောင်း KNU မြိတ်-ထားဝယ်ခရိုင်က ထုတ်ပြန်ထားသည်။
