စက်တင်ဘာ၁၉၊၂၀၂၅။မေရီ/People’s Spring
မန္တလေးတက္ကသိုလ်ရာပြည့်သဘင်ပွဲကို လုံခြုံရေးသတိနဲ့လုပ်ဖို့ စစ်ကောင်စီရဲ့ ဝန်ကြီးချုပ် ဦးမျိုးအောင်က ပွဲတော်ကျင်းပရေးကော်မတီကို သတိပေးပါတယ်။
လာမယ့်အောက်တိုဘာ ၄ ရက်နေ့မှာပြုလုပ်မယ့် မန္တလေးတက္ကသိုလ် ရာပြည့်သဘင်ပွဲတော်အတွက် အစည်းအဝေးကို မနေ့က စက်တင်ဘာ ၁၈ ရက်က စစ်အုပ်စုတွေ နေရာယူထားတဲ့ တိုင်းအစိုးရအဖွဲ့ရုံးမှာ ပြုလုပ်ခဲ့ပါတယ်။
အခမ်းအနားမှာ မန္တလေးတက္ကသိုလ်ရာပြည့်သဘင်ပွဲကို နိုင်ငံတော်အဆင့် စည်ကားသိုက်မြိုက်အောင် ကျင်းပသွားမယ်လို့ စစ်ကောင်စီရဲ့ ဝန်ကြီးချုပ် ဦးမျိုးအောင်က ပြောကြားခဲ့ကြောင်း နိုင်ငံပိုင်သတင်းစာတွေမှာ ဖော်ပြထားပါတယ်။
Public Service Announcement
ဒါ့အပြင် အဲဒီရာပြည့်သဘင်ပွဲတော်မှာ လုံခြုံရေးသတိ၊ လုံခြုံရေးအသိနဲ့ ဆောင်ရွက်သွားဖို့ဆိုပြီး ဦးမျိုးအောင်က သတိပေးပါတယ်။
ဒါအပြင် မန္တလေးတက္ကသိုလ် ရာပြည့်ပွဲကိုအာဏာသိမ်းခေါင်းဆောင်မင်းအောင်လှိုင် လာဖို့စီစဥ်နေတယ်လို့ People’s Spring ကစုံစမ်းသိရပါတယ်။အာဏာသိမ်းခေါင်းဆောင်လာရင် တက္ကသိုလ်အနီးဝန်းကျင်နဲ့ မန္တလေးမြို့မှာစစ်တပ်ကလုံခြုံရေး ပိုတင်းကျပ်ဖွယ်ရှိနေတယ်လို့ဒေသခံအချို့ကပြောပါတယ် ။ အာဏာသိမ်းခေါင်းဆောင်ဟာ စစ်တပ်စိုးမိုးထားတဲ့ဒေသတွေကိုခရီးသွားရင်တောင် လုံခြုံရေးအင်အားအများအပြားသုံးပြီးတင်းကြပ်လေ့ရှိပါတယ် ။
တော်လှန်ရေးအားကောင်းတဲ့ဒေသတွေမှာ စာသင်ကျောင်းတွေပါမကျန် လေကြောင်းကနေဗုံးကြဲ၊ ကျောင်းသားကျောင်းသူတွေကို ဖမ်းဆီးသတ်ဖြတ်တာတွေ ကိုစစ်တပ်ကဆက်တိုက်ပြုလုပ်ခဲ့နေပါတယ်။ဒီအခြေအနေမှာ စစ်ကောင်စီဟာ မန္တလေးတက္ကသိုလ်ရာပြည့်ပွဲကို စည်ကားအောင် ပြုလုပ်မယ်လို့ ပြောနေတာဖြစ်ပါတယ်။
မန္တလေးတက္ကသိုလ် ကျောင်းသားဟောင်းတဦးကတော့”သမိုင်းဝင်မယ့်ပွဲဖြစ်ပေမဲ့ အာဏာလုထားတဲ့ အချိန်ဖြစ်လို့ ဂုဏ်ပြုသဘင်မျိုး မလုပ်နိုင်တာ ဝမ်းနည်းစရာကောင်းပါတယ်။”လို့ မှတ်ချက်ပြုပါတယ်။
ပြီးခဲတဲ့ ဇူလိုင်လဆန်းကလည်း မန္တလေးတက္ကသိုလ် ရာပြည့်အကြို ဂုဏ်ပြုပွဲကို စစ်အုပ်စုက လုံခြုံရေးကြောင့် မန္တလေးတက္ကသိုလ်ထဲ လုပ်ခွင့်မပေးဘဲ သံဃာ့ဆေးရုံမှာ လုပ်ခိုင်းခဲ့ပါသေးတယ်။ ပွဲရက်နီးလာတော့မှသာ မန္တလေးတက္ကသိုလ်ထဲ ပြန်လည်လုပ်ခွင့်ပေးခဲ့တာဖြစ်ပါတယ်။
မန္တလေးတက္ကသိုလ်ဟာ ပြီးခဲ့တဲ့ မတ်လ ၂၈ ရက်က ငလျင်ကြီးမှာ အဆောက်အအုံတချို့ မီးလောင်ပြီး ပြိုကျပျက်စီးတာတွေရှိခဲ့ကာ ဆရာဆရာမအပါအဝင် ဝန်ထမ်းလေးဦးခန့် သေဆုံးခဲ့ပါတယ်။
ပြီးခဲ့တဲ့ စက်တင်ဘာ ၁၂ ရက် မနက်ပိုင်းက ရခိုင်ပြည်နယ်၊ ကျောက်တော်မြို့နယ်၊ သရက်တပင်ကျေးရွာက ပညာပန်းခင်းနဲ့ အမြင်သစ်စာသင်ကျောင်းတွေကို စစ်ကောင်စီတပ်ကနေ လေကြောင်းတိုက်ခိုက်ခဲ့လို့ အသက် ၁၅ နှစ်ကနေ ၂၁ နှစ်ကြား ကျောင်းသူကျောင်းသူ ၁၉ ဦးထက်မနည်း သေဆုံးခဲ့ရပြီး ကျောင်းသူ၊ ကျောင်းသားတွေအပါအဝင် ဒေသခံ ၂၂ ဦး ဒဏ်ရာရခဲ့ကြောင်း အာရက္ခတပ်တော် AA က ထုတ်ပြန်ခဲ့ပါတယ်။
၂၀၂၃ ခုနှစ် ဇန်နဝါရီ ၁ ရက်ကနေ ၂၀၂၅ ခုနှစ် မေလ ၁၂ ရက်နေ့အထိ စစ်ကောင်စီက နေပြည်တော်နဲ့ ရန်ကုန်ကလွဲလို့ ကျန်တိုင်းနဲ့ပြည်နယ်တွေမှာ လေကြောင်းတိုက်ခိုက်မှုပေါင်း ၂၆၇၉ ကြိမ် ပြုလုပ်ခဲ့တဲ့အနက် စာသင်ကျောင်း ၂၄၀ ကျောင်းလည်း လေကြောင်းတိုက်ခိုက်ခံခဲ့ရကြောင်း အမျိုးသားညီညွတ်ရေးအစိုးရ NUG က ထုတ်ပြန်ခဲ့ပါတယ်။
