စက်တင်ဘာ−၂၀၊ ၂၀၂၅။ ထားမြတ်/People’s Spring
ကချင်လွတ်လပ်ရေးတပ်မတော်(KIA) သိမ်းပိုက်ထားသည့် ဆော့လော်မြို့နယ်၊ လန်ဆယ်ဒေသကို စစ်ကောင်စီတပ်နှင့် ပြည်သူ့စစ်များက အင်အားအလုံးအရင်းဖြင့် ထိုးစစ်ဆင်လာ၍ တိုက်ပွဲဖြစ်ပွားလျက်ရှိဟု ကချင်စစ်ရေး သတင်းရင်းမြစ်က ပြောသည်။
၂၀၂၄ နှစ်ကုန်ပိုင်းက KIA ပူးပေါင်းတပ်၏ ထိုးစစ်အတွင်း လန်ဆယ်အပါအဝင် စစ်ကောင်စီ လက်အောက်ခံ ပြည်သူ့စစ်နှင့် နယ်ခြားစောင့်တပ်များ ထိန်းချုပ်ထားသည့် ကချင်အထူးဒေသ(၁)ဟု ခေါ်ဆိုသည့် ဒေသတခုလုံးကို သိမ်းပိုက်နိုင်ခဲ့ခြင်းဖြစ်သည်။
အဆိုပါ လက်လွှတ်ဆုံးရှုံးထားရသည့် နယ်မြေဒေသများ ပြန်ရရေး စစ်ကောင်စီတပ်နှင့် ပြည်သူ့စစ်က အင်အားစုဖွဲ့ပြီး ထိုးစစ်ဆင်ရန် လုပ်ဆောင်လျက်ရှိရာ စက်တင်ဘာ ၁၉ရက်တွင် လန်ဆယ်ဒေသ ထိုးစစ်ကို ပြုလုပ်လာခြင်းဟု ဆိုသည်။
Public Service Announcement
ပူတာအိုမြို့က ပြည်သူ့စစ်နှင့် စစ်ကောင်စီတပ် အင်အား ၄၀၀ကျော်သည် လန်ဆယ်ဘက် ဆင်းလာခြင်းဖြစ်သည်ဟု ကချင်စစ်ရေးသတင်းရင်းမြစ်က ပြောသည်။
“ လန်ဆယ် မရောက်သေးဘူး လမ်းမှာ တိုက်ပွဲဖြစ်နေတယ်။ လန်ဆယ်မရောက်ခင် တထုံကျင်မာ ဖြစ်တာ။ လန်ဆယ်ရောက်ဖို့ အဝေးကြီးလိုသေးတယ်။ ဒီမနက်လည်း ၅နာရီ အချိန်မှာ တိုက်ပွဲဖြစ်နေတယ် အခုထိ” ဟု ကချင်စစ်ရေးသတင်းရင်းမြစ်က ယနေ့ စက်တင်ဘာ ၂၀ရက် မနက် ၇နာရီခွဲခန့်တွင် ပြောသည်။
အခြားသတင်းရင်းမြစ်တဦးကလည်း “မနေ့က လန်ကျသွားတဲ့ကောင်တွေ လူပြန်စုနေကြတယ်။ ဒီမနက်အထိတော့ အခြေအနေ မသိရသေးဘူး” ဟု ပြောသည်။
လန်ဆယ်ဒေသသည် ရွှေထွက်အား ကောင်းသည့် ဒေသဖြစ်ပြီး မြေရှားသတ္ထုလည်း ထွက်ရှိကြောင်း သတင်းရင်းမြစ်က ဒေသ၏ အရေးပါမှု အခြေအနေကို ပြောသည်။
လန်ဆယ်ဒေသ တိုက်ပွဲအခြေအနေကို KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်သည်။
စစ်ကောင်စီတပ်သည် ၀ိုင်းမော်မြို့နယ်တွင်လည်း စစ်ကောင်စီနှင့် ပြည်သူ့စစ် ပူးပေါင်းအင်အားများဖြင့် ထိုးစစ်ဆင်လျက်ရှိရာ KIAနှင့် တိုက်ပွဲများ ပြင်းထန်လျက်ရှိသည်။ စစ်ကောင်စီတပ်နှင့် ပြည်သူ့စစ်က ၎င်းတို့ ဆုံးရှုံးထားသည့် နယ်မြေများ ပြန်ရရေး လေကြောင်း ပစ်ကူ သုံး မြေပြင်မှ ထိုးစစ်ဆင်လျက်ရှိ၍ စစ်ရေး တင်းမာနေဟု KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ယမန်နေ့တွင် ပြောထားသည်။
KIAနှင့် စစ်ကောင်စီတပ်တို့သည် ဖားကန့်မြို့နယ်အတွင်း၌လည်း တိုက်ပွဲများ ပြင်းထန်နေပြီး ဗန်းမော်တွင်လည်း စစ်ကောင်စီက လေကြောင်း တိုက်ခိုက်မှု၊ လက်နက်ကြီး ပစ်ခတ်မှုများ ပြုလုပ်နေသည်ဟု ဆိုသည်။
