စက်တင်ဘာ-၂၅၊ ထားမြတ်/People’s’ Spring
တနင်္သာရီတိုင်း၊သရက်ချောင်းမြို့နယ်မှာကရင်အမျိုးသားလွတ်မြောက် ရေးတပ်မတော် (KNLA) တပ်မဟာ(၄)က တပ်ဖွဲ့ဝင် ၄ဦး စစ်ကောင်စီတပ်ထံ ဘက်ပြောင်းသွားတယ်လို့ KNLA သတင်းရင်းမြစ်က ပြောပါတယ်။
ဘက်ပြောင်းသွားသူ ၄ဦးဟာ စစ်တပ်အဖွဲ့ဝင် ဟောင်းတဦးနဲ့ KTLA တပ်ဖွဲ့ဝင်ဟောင်း ၃ဦးတို့ ဖြစ်တယ်လို့ ရှင်းပြပါတယ်။
ကမ်းရိုးတန်းဒေသတိုင်းစစ်ဌာနချုပ် ကို အလင်းဝင်လာတဲ့ PDF ၄ဦး လက်နက်တွေနဲ့အတူ အလင်းဝင်လာလို့ စက်တင်ဘာ ၂၄ရက်မှာ အလင်းဝင်သူတွေကို မိဘအုပ်ထိန်းသူတွေဆီ လွှဲပြောင်းခဲ့တယ်လို့ စစ်ကောင်စီက ဝါဒဖြန့်ခဲ့ပေမယ့် အဲဒီ ၄ဦးဟာ အရင်က စစ်ကောင်စီတပ်သား ဟောင်း ၁ဦးနဲ့ KTLA တပ်ဖွဲ့ဝင်ဟောင်း ၃ဦး ဖြစ်တယ်လို့ KNLA သတင်းရင်းမြစ်က ပြောပြပါတယ်။
Public Service Announcement
” အလင်းဝင်သွားတဲ့ လေးဦးက အစတုန်းက KTLA အဖွဲ့တွေ ။ နောက်ဆုံး KNLAနဲ့ ပြန်ပေါင်းတယ် တနှစ်ကျော်။ နောက် စကစ တပ်ဆီကို အလင်းဝင်သွားတာ။စကစ ဘက်ကို အလင်းဝင်သွားတဲ့ လေးဦးက တဦးကတော့ စကစရဲ့အဖွဲ့ဝင်ဟောင်းပေါ့နော်။ ကျန်တဲ့ သုံးယောက်ကအရင်က KTLAဘက်ကနေ ပြီးတော့ KNLAနဲ့လာပူးပေါင်းတယ်။ အခုတော့ သူတို့ လေးဦးစလုံးက အာဏာရှင်နဲ့သွားပေါင်းလိုက်တယ်” လို့ KNLA သတင်းရင်းမြစ်က ပြောပါတယ်။
KNUတပ်မဟာ(၄)နယ်မြေမှာဗိုလ်အယ်ခွီး ခေါ် ဗိုလ်ကော်လာဖိုး ဦးဆောင်တဲ့ KTLA တပ်ဖွဲ့ရှိပြီး အဲဒီ တပ်ဟာ KNLA တပ်မဟာ(၄)ကို တိုက်ခိုက်မှုတွေ လုပ်ဆောင်လျက်ရှိပါတယ်။ ဗိုလ်အယ်ခွီးဟာဆိုရင်လည်း အရင် စစ်အစိုးရ လက်ထက်မှာ ၂ကြိမ်တိုင်တိုင် စစ်ကောင်စီထံ အလင်းဝင်ခဲ့သူဖြစ်ပြီးအာဏာသိမ်းပြီးနောက်ပိုင်းKNLA တပ်မဟာ (၄)နယ်မြေမှာ ပြန်လည်ပေါ်ပေါက်လာကာ တပ်မဟာ(၄)နဲ့ အဆင်မပြေမှုတွေ မကြာခဏ ရှိနေခဲ့တာပါ။
အာဏာသိမ်းစစ်ကောင်စီတပ်သားတွေ အများအပြား တော်လှန်ရေးတပ်ဖွဲ့တွေနဲ့ ပူးပေါင်းတာ၊ လက်နက်ချ အလင်းဝင်တာတွေ ဆက်တိုက်ရှိနေတဲ့ အခြေအနေမှာစစ်ကောင်စီဟာလည်း သူတို့ ဘက်ကို အလင်းဝင် ပူးပေါင်းလာသူတွေရှိကြောင်း အခုလို ဝါဒဖြန့် သတင်းတွေ ဆက်တိုက်ပြုလုပ်နေတာလည်းဖြစ်ပါတယ်။
ကရင်အမျိုးသားအစည်းအရုံး(KNU) မြိတ်-ထားဝယ်ခရိုင် တိုက်ပွဲတွေမှာကရင်အမျိုးသားလွတ်မြောက်ရေးတပ်မတော်(KNLA)ဆီကို အလင်း ဝင်ပူးပေါင်းလာတဲ့ တပ်ဖွဲ့ဝင်တွေဟာ အခု စက်တင်ဘာလအတွင်းမှာပဲ အနည်းဆုံး ၁၃ဦး ရှိပါတယ်။
အခု ၂၀၂၅ ဇန်နဝါရီကနေ စက်တင်ဘာ တတိယပတ်အထိ စစ်ကောင်စီဘက်ကဗိုလ်ကြီးအဆင့်အပါအဝင် ၃၃ ဦးထက်မနည်း KNLA တပ်မဟာ (၄)ဆီကို အလင်းဝင် ဘက်ပြောင်းခိုလှုံတာတွေရှိခဲ့ကြောင်းလည်း KNLA သတင်းရင်းမြစ်က အသိပေးထားပါတယ်။
