ရိုဟင်ဂျာ လက်နက်ကိုင်တပ်ဖွဲ့တွေ နဲ့ အဆက်အစပ်ရှိကြောင်း စွပ်စွဲချက်တွေကို ဘင်္ဂလားဒေ့ရှ် နယ်ခြားစောင့်တပ် (BGB)က ငြင်းဆန်သွားခဲ့ပါတယ်။
အာရက္ခတပ်တော် (AA)က BGBဟာ မြန်မာ-ဘင်္ဂလားဒေ့ရှ် နယ်စပ်မှာ လှုပ်ရှားနေတဲ့ အာရကန်ရိုဟင်ဂျာ ကယ်တင်ရေးတပ် (ARSA) ၊ ရိုဟင်ဂျာ သွေးစည်း ညီညွတ်ရေးအဖွဲ့ (RSO)တို့ကို အားပေး ထောက်ခံနေတယ်လို့ စွပ်စွဲခဲ့တဲ့အပေါ် BGBက တုံ့ပြန်ခဲ့တာပါ။
BGBက AAရဲ့ စွပ်စွဲချက်တွေဟာ အရှိတရားကနေ သွေဖယ်စေကြောင်း၊ BGBဟာ ARSA၊ RSOတို့နဲ့ ဘာပတ်သက်မှုမှ မရှိကြောင်း ပြောပါတယ်။
Public Service Announcement
ပြီးတော့ ဘင်္ဂလားဒေ့ရှ် ပိုင်နက်ထဲမှာ အဲဒီ အဖွဲ့နှစ်ခုရဲ့ လှုပ်ရှားမှုတွေကို တိုက်ဖျက်နေပြီး ARSAရဲ့ အဓိက အကြီးအကဲ အတူလာ ဂျူနူနီ အပါအဝင် ခေါင်းဆောင်ပိုင်း တချို့ကိုလည်း ဖမ်းဆီးခဲ့ကြောင်းလည်း BGBက ဖြေရှင်းချက် ပေးခဲ့ပါတယ်။
ဘင်္ဂလားဒေ့ရှ် စစ်တပ်ရဲ့ အရန်အင်အားစု တစ်ခုအဖြစ် လှုပ်ရှားနေတဲ့ BGBက အဖွဲ့အစည်းအတွက် ပေးအပ်ထားတဲ့ တာဝန်တွေဖြစ်တဲ့ နယ်စပ် လုံခြုံရေး၊ တရားဥပဒေ စိုးမိုးရေး ကဏ္ဍတွေကို မမှိတ်မသုန် ကျေပြွန်နေဆဲဖြစ်ပြီး ရိုဟင်ဂျာ ဒုက္ခသည် တစ်သန်းလောက် ခိုလှုံနေခြင်းနဲ့ ဆက်နွှယ်တဲ့ လုံခြုံရေးဆိုင်ရာ စိန်ခေါ်မှုတွေကိုလည်း ကိုင်တွယ်နေရတယ်လို့ ပြောပါတယ်။
၂၀၂၃ နှစ်ကုန်ပိုင်းက မြန်မာနိုင်ငံ အနောက်ဖက်ခြမ်း၊ ရခိုင်ပြည်နယ်မှာ အပစ်အခတ် ရပ်စဲမှု သဘောတူညီချက် ပျက်ပြယ်ပြီး တိုက်ပွဲတွေ ပြန်စလာ ကတည်းက BGBဟာ နတ်မြစ်ရိုး တလျှောက်နဲ့ ကော့စ်ဘဇား ဒေသမှာ လုံခြုံရေးအတွက် ကင်းလှည့်မှုတွေကို တိုးမြှင့် လုပ်ဆောင်နေခဲ့တယ်လို့လည်း BGBက ဆိုပါတယ်။
နောက်ပြီး ရခိုင်ပြည်နယ်ဖက်ကို ဝင်ရောက် လှုပ်ရှားနေတယ်ဆိုတဲ့ ရိုဟင်ဂျာ လက်နက်ကိုင် အဖွဲ့အစည်းတွေဟာ မြန်မာဖက်ခြမ်းမှာ ရှိနေခဲ့တာဖြစ်ပြီး ဘင်္ဂလားဒေ့ရှ်ဖက်မှာ ခြေကုပ်ယူထားတာ မဟုတ်ဘူးလို့ ဘင်္ဂလားဒေ့ရှ် ထောက်လှမ်းရေးက အတည်ပြု တွေ့ရှိထားတယ်လို့လည်း BGBက ဖြေရှင်းထားပါတယ်။
နောက်ပြီး AAဟာ တပ်ဖွဲ့ဝင်တွေ ထွက်ပြေးတာ၊ ရိက္ခာပြတ်လပ်တာ၊ စိတ်ဓာတ်ကျဆင်းတာတွေ အပါအဝင် အတွင်းပိုင်း ပြဿနာတွေနဲ့ ရုန်းကန်နေရတယ်လို့လည်း BGBက ပြောပါတယ်။ ဒါ့အပြင် AAဟာ ရိုဟင်ဂျာ လူ့အဖွဲ့အစည်းတွေအပြင် တခြားလူနည်းစု တိုင်းရင်းသား မျိုးနွယ်တချို့အပေါ်မှာလည်း ဖိနှိပ်မှုတွေ လုပ်ဆောင်နေတယ်လို့ ထည့်သွင်း စွပ်စွဲထားပါတယ်။
BGBက ရိုဟင်ဂျာ လက်နက်ကိုင် အဖွဲ့အစည်းတွေကို ကူညီနေတယ်ဆိုတဲ့ AAရဲ့ စွပ်စွဲချက်ဟာ AAကိုယ်တိုင်က ကျူးလွန်နေတဲ့ လုပ်ရပ်တွေကို ဖုံးဖိ အာရုံလွှဲဖို့ တမင်ကြံစည်ထားတာသာ ဖြစ်တယ်လို့ BGBက ကြေညာခဲ့ပါတယ်။
ကိုးကား – Dhaka Tribune
