အောက်တိုဘာ-၈၊ ၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU)၊တပ်မဟာ(၃) ညောင်လေးပင်(ခလယ်လွီထူ)ခရိုင်မှာ အာဏာသိမ်းစစ်ကောင်စီတပ်က အရပ်သား ပြည်သူများနေထိုင်ရာကို လေကြောင်းတိုက်ခိုက်တာ၊ လက်နက်ကြီးနဲ့ ပစ်ခတ်တာတွေကြောင့် ပြည်သူ၃ ဦးသေဆုံးပြီး ၅ ဦးဒဏ်ရာရခဲ့ကြောင်း KNU ဗဟိုက ထုတ်ပြန်ပါတယ်။
စက်တင်ဘာလကုန်ပိုင်းနဲ့ အောက်တိုဘာ လဆန်းအတွင်းစစ်တပ်ရဲ့တိုက်ခိုက်မှုကြောင့် ညောင်လေးပင်ခရိုင်အတွင်းက မြို့နယ်တွေမှာ ပြည်သူတွေ ထိခိုက်သေဆုံးမှုအခြေအနေကို အသိပေး ဖော်ပြထားတာဖြစ်ပါတယ်။
KNU ညောင်လေးပင်ခရိုင်၊ရွှေကျင်မြို့နယ်မှာ အောက်တိုဘာ၂ ရက်နေ့လည်က စစ်ကောင်စီရဲ့ ခလရ(၅၇)တပ်ရင်းမှ ပျဉ်ရေကျေးရွာအတွင်း ဒရုန်းနဲ့ တိုက်ခိုက်ခဲ့လို့ အမျိုးသမီး ၂ဦး ဒဏ်ရာရခဲ့ပြီး နေအိမ် တလုံးထိခိုက်ခဲ့ပါတယ်။ အောက်တိုဘာ ၁ရက်မှာလည်း တော်ဝိကျေးရွာရှိ ခလရ(၂၀)မှစစ်သားတွေက လက်နက်ကြီး ပစ်ခတ်ခဲ့လို့ ကွင်းဒလကြီးရွာက (၅၄)နှစ်အရွယ် အမျိုးသမီး ၁ဦး သေဆုံးခဲ့ပါတယ်။
Public Service Announcement
ဒါ့အပြင်စက်တင်ဘာ ၂၇ရက်ကလည်း စစ်တပ်က ရွှေကျင်နယ် ၀ိုင်ကျေးရွာကို Y12 လေယာဉ်နဲ့ ဗုံးကြဲခဲ့လို့ (၅၂)နှစ်အရွယ်အမျိုးသမီး ၂ဦး သေဆုံးကာ (၁၈)နှစ်အရွယ် မိန်းကလေးတဦး ဒဏ်ရာရှိခဲ့ပြီး ဘုန်းကြီးကျောင်းလည်း ထိမှန်ပျက်စီးခဲ့ပါတယ်။
ဒါ့အပြင် မုန်းမြို့နယ်ကိုလည်း စစ်ကောင်စီက လက်နက်ကြီးနဲ့ ပစ်ခတ်ခဲ့လို့ စစ်ရှောင်နေတဲ့ အသက် (၁၃)နှစ်အရွယ် မိန်းကလေးငယ် ၁ဦးနဲ့ (၄၃)နှစ်အရွယ် အမျိုးသမီး ၁ဦးတို့ ဒဏ်ရာရခဲ့ပါတယ်။
စစ်ကောင်စီတပ်က ပြည်သူလူထုတွေကို ပစ်မှတ်ထားပြီး တိုက်ခိုက်နေတာကြောင့် အရပ်သား ပြည်သူတွေနေ့စဉ် နဲ့အမျှ ထိခိုက်သေဆုံးနေရပြီး စိုးရိမ်ထိတ်လန့် စွာဖြင့် အသက်ရှင်နေထိုင်နေကြရကြောင်း KNUက ထုတ်ပြန်ပါတယ်။
၂၀၂၅ ဇန်နဝါရီမှ ဩဂုတ်လကုန်ပိုင်းအထိ KNUအုပ်ချုပ်နယ်မြေအတွင်း စစ်ကောင်စီက လေကြောင်းတိုက်ခိုက်မှု အကြိမ်ပေါင်း ၄၀၀ နီးပါး ပြုလုပ်ခဲ့ရာ ၆၄ ဦး သေဆုံးခဲ့ပါတယ်။ဒါအပြင်၁၉၀ကျော်ဒဏ်ရာရရှိခဲ့ပြီးနေအိမ်ကျောင်း၊ ဘုန်းကြီးကျောင်းများစွာပျက်စီးခဲ့တယ်လို့ KNU ကထုတ်ပြန်ထားပါတယ် ။
ဒါ့အပြင် လက်နက်ကြီး အကြိမ်ရေ ၇၀၀နီးပါး ပစ်ခတ်ခဲ့လို့ ပြည်သူ ၅၆ ဦးသေဆုံးခဲ့သလို ၂၀၀ ဦးကျော်ဒဏ်ရာခဲ့ပါတယ်။ဒရုန်းနဲ့တိုက်ခိုက်တာ၊ အကြောင်းမဲ့ ဖမ်းဆီးသတ်ဖြတ်တာ၊ စစ်တပ်ထောင်ထားတဲ့ မိုင်းနင်းမိလို့ ပြည်သူ သေဆုံးထိခိုက်တာတွေလည်းရှိခဲ့ပါတယ်။
