အောက်တိုဘာ-၁၆၊၂၀၂၅။မိုမို/People’s Spring
ပဲခူးတိုင်း၊လက်ပံတန်မြို့နယ်မှာ စစ်ကောင်စီတပ် စစ်ကြောင်းတစ်ခုလုံးပြုတ်အောင် တော်လှန်ရေးတပ်တွေက တိုက်ခိုက်ရာ စစ်သား ၂၀ကျော်သေဆုံးပြီး အရှင်ဖမ်းဆီးရမိသူ ၁၀ဦးကျော်ရှိတယ်လို့ စစ်ရေးသတင်းရင်းမြစ်တွေနဲ့ တပ်ရင်းတာဝန်ရှိသူတွေက လူထုနွေဦးကို ပြောပါတယ်။
အောက်တိုဘာ ၁၅ ရက်မှာ လက်ပံတန်းမြို့နယ်၊သရက်ချောင်းကျေးရွာကို စစ်ကြောင်းထိုးလာတဲ့စစ်ကောင်စီတပ်နဲ့ တော်လှန်ရေးတပ်ဖွဲ့တွေ တိုက်ပွဲဖြစ်ခဲ့တာလို့ ဆိုပါတယ်။
“အသေ၂၀ ကျော်ရသလို အရှင် ၁၀ဦးထက်မနည်းပေါ့”လို့ ပဲခူးအနောက်ခြမ်း စစ်ရေးသတင်းရင်းမြစ်က ပြောပါတယ်။
Public Service Announcement
ဒါ့အပြင် လက်နက်အလက် ၂၀ဝန်းကျင်နဲ့ စစ်သုံးပစ္စည်းတွေ သိမ်းရတယ်လို့ သိရပါတယ်။
စစ်ကောင်စီတပ်သား သေဆုံးမှုတွေနဲ့ အရှင် ဖမ်းမိရတာတွေကို သာယာဝတီခရိုင် တပ်ရင်း (၃၈၀၂)တပ်ခွဲ ၂ နဲ့ တပ်ခွဲ ၅က အတည်ပြုပါတယ်။
“ကျွန်တော်တို့ သတင်းထုတ်ပြန်ပြီမှ ဖြေကြားလို့ ရပါမယ်”လို့ တပ်ရင်း (၃၈၀၂)တပ်ခွဲ ၂ တာဝန်ရှိသူက ပြောပါတယ်။
အောက်တိုဘာ ၁ ရက်ကလည်း လက်ပံတန်းမြို့နယ်၊ မှော်အင်းအုပ်စု၊ ကမ်းပြိုကြီးကျေးရွာမှာ စစ်မှုထမ်းကြေးကောက်ပြီး ထွက်ခွာလာတဲ့ အင်အား ၂၀ကျော်ပါ စစ်သားနဲ့ ရဲတွေကို တိုက်ခိုက်မှုမှာ စစ်အုပ်စုဘက်က နှစ်ဦးသေပြီး သေနတ်နှစ်လက်နဲ့ ခဲယမ်းအချို့ရရှိခဲ့ပါတယ်။
