နိုဝင်ဘာ-နိုဝင်ဘာ၅၊၂၀၂၅။ရောင်နီ/People’s Spring
ရန်ကုန်မြို့၊ သာကေတမြို့နယ်မှာ ပံ့သကူပစ်တဲ့ အဖွဲ့ကိုရှောင်ရင်း လမ်းဘေးမှာရပ်နေတဲ့ အမျိုးသမီးတစ်ဦး ကားတိုက်ခံရလို့ ကွယ်လွန်သွားတယ်လို့ ရှင်သန်ရေးကူညီမှုအသင်းက အသိပေးထားပါတယ်။
“ အသက်တစ်ချောင်းက တန်ဘိုးကြီးပါတယ်၊လမ်းမရဲ့အလယ် ပန့်တကူငွေကောက်နေတဲ့အဖွဲ့ကိုရှောင်ရင်း လမ်းဘေးမှာရပ်ကြည့်နေတဲ့သူ ယာဥ်တိုက်ခံရမှုဖြစ်ပွား။လမ်းကူးသူဘဲ ဖြစ်ဖြစ်၊ယာဥ်မောင်းသူဘဲဖြစ်ဖြစ် သတိကပ်ကြပါခင်ဗျာ။” လို့ ရှင်သန်ရေး ကူညီမှူအသင်းရန်ကုန် က အခင်းနေရာက ဓာတ်ပုံတွေနဲ့ အတူထုတ်ပြန်ထားတာပါ။
နိုဝင်ဘာ ၅ ရက် ည ၇နာရီခွဲ ခန့်မှာ သာကေတမြို့နယ်၊ ရှုခင်းသာလမ်းမကြီးပေါ်မှာ အသက်(၄၅)နှစ်အရွယ် အမျိုးသမီး ကားတိုက်ခံရတာလို့ ဆိုပါတယ်။
Public Service Announcement
“ ဆေးရုံရောက်ပြီးခဏတွင် ကွယ်လွန်သွားခဲ့သည်။ကူညီပေးသူများကိုလည်း ကျေးဇူးတင်ရှိအပ်ပါသည်။” လို့ရှင်သန်ရေး လူမှုကူညီရေးအသင်းက အသိပေးထားပါတယ်။
တန်ဆောင်မုန်းလပြည့်နဲ့ လပြည့်ကျော် ၁ရက် ညတွေမှာ ရန်ကုန်အပါအဝင် မြို့အများစုမှာ ပံ့သကူကောက်တဲ့အနေနဲ့ ကားတွေကို ပိုက်ဆံတောင်းကြတာပါ။
ဒီဖြစ်စဉ်ကြောင့် တန်ဆောင်မုန်းလပြည့်ညကလည်း ပျဉ်းမနားမြို့မှာ ဆိုင်ကယ်တိုက်မှု ၊ ကားတိုက်မှုဖြစ်ခဲ့ပြီး ထိခိုက်ဒဏ်ရာရရှိတဲ့ဖြစ်စဉ်တွေရှိခဲ့ပါတယ်။
ပံ့သကူဆိုတဲ့အတိုင်း အရင်ကာလက ဘယ်သူမှ မသိအောင် စွန့်ပစ်ထားတဲ့ ပစ္စည်းတွေ ငွေတွေကို လိုက်လံရှာဖွေကြတာ ဖြစ်ပေမယ့် အာဏာသိမ်းကာလမှာတော့ လမ်းမပေါ်တွေမှာ ကားတွေကနေ ပိုက်ဆံကြဲဲတဲ့ အလေ့အထ ဖြစ်လာခဲ့တာပါ။
ဒီလိုလုပ်ဆောင်မှုတွေက အန္တရာယ်များကြောင်း ဝေဖန်ပြောဆိုမှုတွေ ရှိပေမယ့်လည်း အများစုကဆက်လက်လုပ်ဆောင်နေကြတာပါ။
