နိုဝင်ဘာ-၁၀၊၂၀၂၅။ဇော်ဝင်း/People’s Spring
မကွေးတိုင်း၊ထီးလင်းမြို့နယ်ကို စစ်ကောင်စီက ဒီကနေ့မှာ လေကြောင်းကနေ သုံးကြိမ်ထက် မနည်း ဗုံးကြဲတိုက်ခိုက်ခဲ့တယ်လို့ ဒေသခံစစ်ရေးသတင်းရင်းမြစ်အချို့က ပြောပါတယ်။
ဒီကနေ့(နိုဝင်ဘာ ၁၀ ရက်)နေ့လယ် ၁နာရီခွဲခန့်မှာ တံတားဦးလေတပ်ကနေတက်လာတဲ့ ဂျက်ဖိုက်တာတစ်စီးက ပုံညာတောင်အနောက်ဖက်ခြမ်းဗုံးကြဲတိုက်ခိုက်ခဲ့တာလို့ ဆိုပါတယ်။
“ ထိခိုက်မှုတော့ မသိရသေးဘူး။ပွိုင့်အိတ်၊ ရောကတ်တို့နဲ့ပစ်တာတဲ့။ တိုက်ပွဲကြောင့် မဟုတ်ဘူး။ဒီအတိုင်းလာကြဲတာ” လို့ ထီးလင်းမြို့ခံတစ်ဦးက ပြောပါတယ်။
Public Service Announcement
ပုံညာတောင်အနီးတဝိုက်မှာ အကြည်ဘန်း၊အလယ်ဘန်း၊အညာဘန်း၊ စို့ပြား၊ ပြင်ဘစတဲ့ ကျေးရွာတွေရှိပြီး တောင်အနောက်ဘက်ခြမ်းမှာ ကျင်းရွာရှိတယ်လို့ သိရပါတယ်။
“ ခဏခဏ တိုက်ခိုက်နေတာ။ ရက်ခြားပဲ။အရင် ရက်က Y12 နဲ့လာကြဲတယ်” လို့ ထီးလင်းအခြေစိုက် စစ်ရေးသတင်းရင်းမြစ်က ပြောပါတယ်။
စစ်ကောင်စီရဲ့လေကြောင်းတိုက်ခိုက်မှုတွေက ထီးလင်းမြို့နယ်အတွင်း နယ်မြေကြိုတင် ရှင်းလင်းတာ ဒါမှမဟုတ် ကျောက်ထုနဲ့ ပေါက်မြို့နယ်မှာရှိနေတဲ့ ကာကွယ်ရေးပစ္စည်းစက်ရုံတွေ ကို တော်လှန်ရေးအင်အားစုတွေ ချဥ်းကပ်မလာအောင်ဖြစ်နိုင်တယ်လို့ ၎င်းက သုံးသပ်ပါတယ်။
ဒါ့အပြင် အခုနှစ်စက်တင်ဘာကစပြီး စစ် ကောင်စီက ပေါက်မြို့ ကပစ(၂၄)ကို အင်အား ထောင်ချီဖြည့်ပြီး စက်ရုံအနီးတစ်ဝိုက် နယ်မြေရှင်းလင်းတာနဲ့ ထီးလင်းမြို့နယ်ဘက်ကို စစ်ကြောင်းထိုးတာ တွေရှိပါတယ်။
ပေါက်မြို့နယ် ရေဖြူနဲ့ ကျောက်တံခါးကျေးရွာ ကနေ စစ်ကြောင်းနှစ်ခုနဲ့ ထီးလင်းဘက်ကို ထိုးစစ်ဆင်နေတာကြောင့် ဒေသတွင်းတော်လှန်ရေးတပ်တွေကြား တိုက်ပွဲဖြစ်နေတာ သုံးလ ဝန်းကျင်ရှိပြီလို့ သိရပါတယ်။
၂၀၁၉ ခုနှစ်က မိတ္ထီလာတပ်နယ်(မုန်တိုင်) မှာ ပြုလုပ်တဲ့ စစ်ရေးလေ့ကျင့်ခန်းမှာ ရုရှားထုတ် MiG -29 တိုက်လေယာဉ်နှစ်စင်းကိုတွေ့ရပုံ
