နိုဝင်ဘာ-၁၂၊၂၀၂၅။People’s Spring
အွန်လိုင်းငွေလိမ်လုပ်ငန်း (ကျားဖြန့်)မြို့တော်တစ်ခုအဖြစ် သတ်မှတ်ခံရတဲ့ ရွှေကုက္ကို မြို့သစ် စီမံကိန်းမှာ အဓိက ရင်းနှီးမြှုပ်နှံသူ စီးပွားရေး လုပ်ငန်းရှင် တရုတ်-ကမ္ဘောဒီးယား နိုင်ငံသား ရှီကျီကျန်းကို ဒီနေ့ (နိုဝင်ဘာ ၁၂ ရက်) ညနေပိုင်းမှာ ထိုင်းအာဏာပိုင်တွေက တရုတ်ဆီ ပြန်လွှဲပေးဖို့ စီစဉ်ထားပါတယ်။
ရှီကျီကျန်းဟာ ရွှေကုက္ကိုလ်မြို့သစ်ကို ကရင်နယ်ခြားစောင့်တပ်-BGF ခေါင်းဆောင် စောချစ်သူနဲ့အတူ တည်ထောင်ခဲ့တာဖြစ်ပြီး သူတို့ဟာစီးပွားဖက်တွေဖြစ်ကြပါတယ်။၎င်းတို့ကို အမေရီကန် နဲ့ ဗြိိတိန်က အရေးယူဒဏ်ခတ်ထားပါတယ်။
အသက် ၄၃ နှစ်အရွယ် ရှီကို ထိုင်းအထူးရဲတပ်ဖွဲ့ဝင်တွေက ချုပ်နှောင်ပြီး နေရာရွှေ့နေတဲ့ ဓာတ်ပုံတွေကို ထိုင်းသတင်းဌာန တချို့က ဖော်ပြခဲ့ပါတယ်။ ရှီကို တင်ဆောင်သွားမယ့် လေယာဉ်ဟာ ဘန်ကောက်မြို့၊ သုဝဏ္ဏဘူမိ လေဆိပ်ကနေ ထိုင်းစံတော်ချိန် ညနေ ၄း၂၀ နာရီမှာ ထွက်ခွာဖွယ် ရှိတယ်လို့ သတင်းတွေက ဆိုပါတယ်။
Public Service Announcement
ဓါတ်ပုံ – The Reporter ဓါတ်ပုံ – Thai PBS ဓါတ်ပုံ – Thai PBS ဓါတ်ပုံ – Thai PBS ဓါတ်ပုံ – Thai PBS ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter ဓါတ်ပုံ – The Reporter
တရားမဝင် အွန်လိုင်း လောင်းကစား လုပ်ငန်းတွေနဲ့ ဆက်နွှယ်တဲ့ စွပ်စွဲချက်တွေအတွက် အလိုရှိကြောင်း တရုတ်ရဲတပ်ဖွဲ့က အပြည်ပြည်ဆိုင်ရာ မှုခင်း ရဲတပ်ဖွဲ့ကနေတဆင့် ဆက်သွယ်ခဲ့တဲ့နောက် ဘန်ကောက်မှာ ရှိနေတဲ့ ရှီကို ထိုင်းရဲတပ်ဖွဲ့က ၂၀၂၂ ခုနှစ်၊ ဩဂုတ်လမှာ ဖမ်းဆီးခဲ့ပါတယ်။
အဲဒီအချိန်ကစလို့ သူဟာ ဘန်ကောက်မှာ ချုပ်နှောင် ခံထားရပြီး သူ့ရဲ့ ရှေ့နေတွေက တရုတ်ဆီ ပြန်လွှဲပြောင်းမှုကို တားဆီးနိုင်ဖို့ ၃ နှစ်လုံးလုံး အစွမ်းကုန် ကြိုးစားခဲ့ပါတယ်။ အထူးသဖြင့် ရှီဟာ ကမ္ဘောဒီးယား နိုင်ငံသား ပတ်စ်ပို့တ် ကိုင်ဆောင်ထားတာကြောင့် တရုတ်ဆီ လွှဲပြောင်းပေးတာမျိုး မဖြစ်သင့်ဘူးလို့သူ့ရဲ့ရှေ့နေတွေကခုခံ လျှောက်လဲခဲ့ပေမယ့် အဆုံးမှာတော့ အရာမထင်ခဲ့ပါဘူး။
အယူခံ ကိစ္စတွေ အားလုံး အရာမထင်တော့တာ သေချာသွားတဲ့နောက် ရှီကို တရုတ်ဆီ လွှဲပြောင်းပေးတော့မယ်လို့ ထိုင်းအာဏာပိုင်တွေက နိုဝင်ဘာ ၁၀ ရက်နေ့မှာ ကြေညာခဲ့ပါတယ်။
ရှီနဲ့ပတ်သက်တဲ့ စွဲချက်တွေထဲမှာတော့ လည်ပတ် ငွေလုံးငွေရင်း ဘတ် ၁၂.၆၃ ထရီလီယံ၊ တစ်နည်းအားဖြင့် ဒေါ်လာ ၃၈၅ ဘီလီယံလောက်ထိ ရှိနိုင်တဲ့ လောင်းကစားဝက်ဘ်ဆိုက် ၂၃၉ ခုကို ထိန်းချုပ်ထားတယ် ဆိုတာလည်း ပါဝင်ပါတယ်။
မြန်မာနိုင်ငံဖက်ခြမ်း၊ ကရင်ပြည်နယ်၊ မြဝတီမြို့က ရွှေကုက္ကို မြို့သစ် စီမံကိန်းမှာလည်း သူ့ရဲ့ Yatai International ကုမ္ပဏီက ကြီးကြီးမားမား ရင်းနှီးမြှုပ်နှံထားသလို ရွှေကုက္ကိုမှာ ရှီရဲ့ ကာစီနိုရုံကြီးနှစ်ခု တည်ထားကြောင်း စွပ်စွဲခံခဲ့ပါတယ်။
ထိုင်းမှာ စုံစမ်းစစ်ဆေးမှုတွေကို ရင်ဆိုင်နေရတဲ့ ကာလတလျှောက် ရှီက သူဟာ ဘယ်လို အမှားမှ ကျူးလွန်မထားကြောင်း အစဉ်တစိုက် ငြင်းဆိုခဲ့ပါတယ်။ ရှီအပေါ် စွပ်စွဲချက်တွေဟာတရုတ်က နိုင်ငံရေး အခြေပြု စေ့ဆော်မှုတွေနဲ့ထောင်ချောက်ဆင်ထားတာသာဖြစ်တယ်လို့သူ့ရဲ့ရှေ့နေတွေကလည်း ပြောပါတယ်။
ရွှေကုက္ကိုဟာ အွန်လိုင်း ကာစီနိုတွေအပြင် ဒစ်ဂျစ်တယ် ငွေကြေးလိမ်လည်မှု (ကျားဖြန့်) လုပ်ငန်းတွေ၊လူမှောင်ခိုနဲ့ တခြားရာဇဝတ်မှု ကျူးလွန်တဲ့ ဂိုဏ်းတွေ ကျင်လည်ကျက်စားရာ ဒုစရိုက် မြို့တော် တစ်ခုအဖြစ်လည်း နာမည်ဆိုးနဲ့ ကျော်ကြားပါတယ်။ စက်တင်ဘာလမှာတော့ အမေရိကန် ဘဏ္ဍာရေး ဝန်ကြီးဌာနဟာ ရွှေကုက္ကိုအပြင် အနီးတဝိုက် ကျားဖြန့်လုပ်ငန်းတွေနဲ့ ဆက်စပ်တဲ့ ကုမ္ပဏီ ၉ ခုကို နာမည်ပျက် စာရင်းသွင်းပြီး ပိတ်ဆို့ အရေးယူကြောင်း ကြေညာခဲ့ပါတယ်။
စစ်တပ် နဲ့ BGF က လေးကေ့ကော်ဒေသက KK Park ကိုကျားဖြန့်နှိမ်နင်းရေးလုပ်တယ်ဆိုပြီး လုပ်ကိုင်နေသူတွေကို ပြန်ခိုင်းပြီး အဆောက်အအုံ ၁၀၀ ကျော်ကို ဗုံးခွဲဖျက်ဆီးပြနေပါတယ်။ဒါပေမယ့် ရွှေကုက္ကို မြို့သစ် ၊ကျောက်ခတ် အပါအဝင် အခြားကျားဖြန့်လုပ်ငန်းတွေများစွာရှိတဲ့နေရာတွေကို အခုချိန်ထိ မတိုမထိသေးပါဘူး ။
ကိုးကား-Thai PBS
