အမေရိကန် သမ္မတ ဒေါ်နယ်လ်ထရမ့်ရဲ့ အမျိုးသား လုံခြုံရေး မဟာဗျူဟာ မူဝါဒ အသစ်ဟာ ရုရှားရဲ့ သဘောထား အမြင်၊ အတွေးအခေါ်တွေနဲ့ အများကြီး ကိုက်ညီကြောင်း ရုရှား အစိုးရက ချီးကျူး ပြောဆိုလိုက်ပါတယ်။
ရုရှား သမ္မတ အိမ်တော်ဖြစ်တဲ့ ကရင်မလင်နန်းတော်က သဘောထား မှတ်ချက် ပေးခဲ့ရာမှာတော့ ဒီဇင်ဘာ ၅ ရက်နေ့မှာ အိမ်ဖြူတော်ဆီကနေ ထွက်ပေါ်လာတဲ့ မူဝါဒ သဘောထားတွေကို ထောက်ခံ ကြိုဆိုထားခဲ့တာ ဖြစ်ပါတယ်။ အဲဒီ သဘောထား မှတ်ချက်တွေမှာတော့ အမေရိကန်ဟာ မဟာမိတ် ဥရောပ သမဂ္ဂ (EU)ကို ဝေဖန်ထားခဲ့ပြီး ရုရှားနဲ့ ဆက်ဆံရေး မြှင့်တင်လိုတဲ့ သဘောထားတွေကို သိသိသာသာ ပြသထားခဲ့ပါတယ်။
စာမျက်နှာ ၃၃ မျက်နှာ ပါဝင်တဲ့ အမျိုးသား လုံခြုံရေး မဟာဗျူဟာ အသစ်ဟာ သမ္မတ ထရမ့်က ကမ္ဘာကြီးအပေါ် ရှုမြင်ပုံတွေနဲ့ ကမ္ဘာ့ အခင်းအကျင်းတွေကို စီမံကိုင်တွယ်ရာမှာ အမေရိကန်ရဲ့ စစ်ရေးနဲ့ စီးပွားရေး အင်အားကို သူက ဘယ်လို အသုံးချဖို့ ရည်ရွယ်သလဲ ဆိုတာတွေကို ထုတ်နုတ်ပြထားတာ ဖြစ်ပါတယ်။
ထရမ့်က အဲဒီ မဟာဗျူဟာ အခင်းအကျင်းတွေဟာ လူ့သမိုင်းမှာ အထူးကဲဆုံးနဲ့ အအောင်မြင်ဆုံး နိုင်ငံအဖြစ် အမေရိကန်ရဲ့ ရပ်တည်မှုကို ဆက်လက် တည်တံ့စေမယ့် လမ်းပြမြေပုံလို့လည်း ညွှန်းဆိုခဲ့ပါတယ်။
Public Service Announcement
သူ့ရဲ့ မူဝါဒတွေထဲမှာ အနောက်နိုင်ငံတွေရဲ့ ဝိသေသတွေကို ပြန်လည် ဖော်ဆောင်ဖို့၊ နိုင်ငံခြား လွှမ်းမိုးမှုတွေကို တိုက်ဖျက်ဖို့၊ အလွန်အကျွံ ရွှေ့ပြောင်း အခြေချနေတာတွေကို တားဆီးဖို့၊ မူးယစ်ဆေးဝါး မှောင်ခိုဂိုဏ်းတွေကို ဖြိုခွင်းတာ အပါအဝင် အမေရိကန် အကျိုးစီးပွားကို ဗဟိုပြုတဲ့ လုပ်ငန်းစဉ်တွေမှာ ပိုပြီး အားထည့်လုပ်ဆောင်ဖို့ ဆိုတာတွေ ပါဝင်ပါတယ်။ ပြီးတော့ EUရဲ့ လက်ရှိ လုပ်ထုံးလုပ်နည်းတွေအတိုင်း ဆက်သွားနေမယ်ဆိုရင် နောက်ထပ် နှစ် ၂၀ အတွင်း ဥရောပဟာ မမှတ်မိနိုင်လောက်အောင် ပြောင်းလဲသွားလိမ့်မယ်လို့ ထရမ့်က ဝေဖန်ခဲ့ပါတယ်။ အကျိုးဆက် အနေနဲ့ ဥရောပရဲ့ ယဉ်ကျေးမှု ထုံးစံတွေ ပျက်သုဉ်းပျောက်ကွယ်သွားတာမျိုးပါ ဖြစ်နိုင်တယ်လို့ ထရမ့်က ဆိုပါတယ်။
ထရမ့်ရဲ့ မူဝါဒ အသစ်တွေနဲ့ ပတ်သက်ပြီး ဥရောပဖက်ကတော့ မကျေမနပ် တုံ့ပြန်တဲ့ သဘောထားမှတ်ချက်တချို့ ထွက်ပေါ်ခဲ့ပြီး ဂျာမနီ နိုင်ငံခြားရေး ဝန်ကြီး ဂျိုဟန်း ဝေ့ဒ်ဖူလ်က ဂျာမနီရဲ့ မူဝါဒတွေနဲ့ ပတ်သက်လို့ ဘယ်လိုပြင်ပ အကြံပေးချက်မှ မလိုဘူးလို့ တုံ့ပြန်ခဲ့ပါတယ်။
ဒါပေမဲ့ ရုရှားကတော့ ထရမ့်ရဲ့ အဲဒီ အမျိုးသား လုံခြုံရေး မဟာဗျူဟာကို ချီးကျူးခဲ့ပြီး အမေရိကန်ရဲ့ မူဝါဒ ပြင်ဆင် ပြောင်းလဲလာမှုတွေ အများအပြားဟာ ရုရှားက လက်ခံထားတဲ့ သဘောတရားတွေနဲ့ အများကြီး ကိုက်ညီတယ်လို့ ယုံကြည် လက်ခံထားကြောင်း ကရင်မလင် နန်းတော် ပြောရေးဆိုခွင့်ရ အရာရှိ ဒီမစ်ထရီ ပက်စ်ကော့ဗ်က မှတ်ချက်ပေးခဲ့ပါတယ်။
ရုရှားနဲ့ ယူကရိန်းကြားက စစ်ပွဲကို ရပ်ဆိုင်းစေဖို့ အမေရိကန် အစိုးရက ကြားဝင် စေ့စပ်ပေးနေတဲ့ အချိန်မှာ အမေရိကန်ရဲ့ မူဝါဒ အပြောင်းအလဲကို ရုရှားက ထောက်ခံကြောင်း ထုတ်ဖော် ကြေညာခဲ့တာပါ။ ယူကရိန်း သမ္မတ ဗိုလိုဒီမာ ဇီလန်စကီးကတော့ ဒီဇင်ဘာ ၈ ရက်နေ့ကျရင် လန်ဒန်မှာ ဗြိတိန်၊ ပြင်သစ်၊ ဂျာမနီ ခေါင်းဆောင်တွေနဲ့ တွေ့ဆုံဆွေးနွေးဖို့ စီစဉ်ထားကြောင်း သိရပါတယ်။
ကိုးကား: Guardian
