ဒီဇင်ဘာ-၁၆၊ ၂၀၂၅။မေရီ/People’s Spring
မန္တလေးတိုင်း၊ မိတ္ထီလာခရိုင်၊ မလှိုင်မြို့နယ်မှာ စစ်အုပ်စုက လူငယ်တွေကို ဖမ်းဆီးပြီး တစ်ဦးကို ကျပ် ၁၀သိန်းနဲ့ ပြန်ရွေးခိုင်းနေကြောင်း ဒေသခံတွေက ပြောပါတယ်။
ဒီဇင်ဘာ ဒုတိယပတ်အတွင်းက မလှိုင်မြို့ပေါ်မှာ လူငယ် ၇ ဦး စစ်အုပ်စုရဲ့ ဖမ်းဆီးခြင်းခံရပြီး တစ်ဦးကို ကျပ် ၁၀သိန်းပေးမှ ပြန်လွှတ်ပေးခဲ့ကြောင်း၊ ဒီဇင်ဘာ ၁၄ ရက်ညကလည်း မလှိုင်မြို့ပေါ် အမှတ် (၉)ရပ်ကွက်က လူငယ်တွေကို စစ်ကောင်စီလက်အောက်ခံ ပျူစောထီး သိန်းတန်ဆိုက ဦးဆောင်ဖမ်းဆီးသွားကာ ငွေညှစ်နေကြောင်း ဒေသခံတွေက ပြောပါတယ်။
ယခင်ရက်ပိုင်းကလည်း မလှိုင်နယ် မြောက်ဖက် ကျေးရွာတွေနဲ့ နွားထိုးကြီး၊ မြင်းခြံ၊ တောင်သာနယ်များမှ ခရီးသွားလူငယ်တွေ အဖမ်းခံရပြီး ထောက်ပို့နဲ့ PDFလို့ အမည်တပ်ကာ ဖမ်းဆီးခံရတာတွေရှိနေကြောင်း လူထုသတင်းကွန်ယက်-မလှိုင်ရဲ့ တာဝန်ရှိသူက ပြောပါတယ်။
Public Service Announcement
“ဖမ်းနေတာတော့ ၁၁လပိုင်း ကုန်ခါနီးကတည်းကပဲ။ ခရီးသွား ကားပေါ်ပါ ဆွဲချတာမျိုး တယောက်စ၊၂ယောက်စ ဖမ်းနေတော့ သိပ်မသိကြဘူး။”လ်ို့ ၎င်းက ပြောပါတယ်။
တောင်သာ၊ မြင်ခြံ၊ နွားထိုးကြီးမြို့နယ်တွေက ခရီးသွားပြည်သူတွေအနေနဲ့ ဂရုစိုက်သွားလာကြဖို့ လိုအပ်နေပြီး မလှိုင်မြို့နယ်အတွင်း ရှောင်ကွင်းသွားလာကြဖို့ လူထုသတင်းကွန်ယက်-မလှိုင်မြို့က သတိပေးထားပါတယ်။
မလှိုင်မြို့နယ်ဟာ မိတ္ထီလာခရိုင်အတွင်း တော်လှန်ရေးအားကောင်းတဲ့ဒေသတစ်ခုဖြစ်ပြီး စစ်အုပ်စုရဲ့ အကြမ်းဖက်ဖိနှိပ်မှုတွေ ရင်ဆိုင်နေရပါတယ်။
