ဒီဇင်ဘာ-၂၂၊၂၀၂၅။အိမ်သွင်/People’s Spring
စစ်ရေးတင်းမာနေတဲ့ စစ်ကိုင်းတိုင်း၊ ကောလင်းမြို့နယ်မှာ တိုက်ပွဲနဲ့မသက်ဆိုင်တဲ့နေရာတွေကို စစ်ကောင်စီက လေကြောင်းကနေ ဗုံးကြဲတိုက်ခိုက်ရာ ဗုံးခိုကျင်းအတွင်းပုန်းအောင်းနေတဲ့ ကလေးမိခင်တစ်ဦး နှလုံးရပ်သေဆုံးပြီး ပြည်သူ ၆ဦးထက်မနည်း ဒဏ်ရာရခဲ့ပါတယ်။
(၃၅)နှစ်ခန့်အရွယ် ကလေးမိခင်တစ်ဦး နှလုံးရပ်ပြီးသေဆုံးမှုမှာ ဒီဇင်ဘာ ၂၁ ရက်မှာ ကောလင်းမြို့နယ် မုတ်ဝကျေးရွာကို ဗုံးကြဲတိုက်ခိုက်မှုမှာ သေဆုံးခဲ့တာပါ။
” လေယာဉ်နဲ့ ဗုံးလာကြဲတော့ ကျဉ်းထဲကိုဝင်ပုန်းနေတာ။ ပစ်ချတဲ့အချိန်မှာ နှလုံးရပ်သွားတာ။ ကလေးတွေကျန်ခဲ့တယ်”လို့ ကောလင်းမြို့ခံတစ်ဦးက ပြောပါတယ်။
Public Service Announcement
ဒီနေ့ ညနေပိုင်းမှာလည်း ကောလင်းမြို့နယ်နောက်ခြမ်းက နတ်အင်းကျေးရွာ စာသင်ကျောင်းကို စစ်ကောင်စီက လေကြောင်းကနေ ဗုံးကြဲလို့ အရပ်သား ၆ဦးဒဏ်ရာရခဲ့တယ်လို့ ကောလင်းခရိုင်တပ်ရင်း(၂)က ထုတ်ပြန်ထားပါတယ်။
ကောလင်းမြို့နယ်က စစ်ကောင်စီရဲ့ အဓိကစခန်းတချို့ကို PDFတပ်ရင်းတွေနဲ့ ပူးပေါင်းတပ်တွေ ဒီဇင်ဘာ ၁၉ရက်မှာ စတင်တိုက်ခိုက်နေပါတယ်။အဓိက စခန်းတစ်ခုဖြစ်တဲ့ သစ်ဖုလတောင်စခန်းကို တော်လှန်ရေးတပ်ဖွဲ့တွေက သိမ်းယူထားပါတယ်။
လက်ရှိမှာ ကောလင်းမြို့နယ်နဲ့ ဝန်းသိုမြို့နယ်စပ်မှာ စစ်ရေးဆက်လက်တင်းမာနေပြီး ဒေသတွင်းဆက်စပ်မြို့နယ်တွေဖြစ်တဲ့ ကန့်ဘလူ၊ တန့်ဆည်မြို့နယ်တွေကိုလည်း စစ်ကောင်စီက လေကြောင်းကနေ ဗုံးကြဲနေပါတယ်။
စစ်ကောင်စီက တိုက်ပွဲနဲ့မသက်ဆိုင်တဲ့နေရာတွေ ဗုံးကြဲနေလို့ လေကြောင်းရန်သတိပြုကြဖို့ တော်လှန်ရေးအင်အားစုတွေက သတိပေးထားပါတယ်။
