ဒီဇင်ဘာ-၂၅၊၂၀၂၅။အိမ်သွင်၊မိုမို/People’s Spring
စလင်းမြို့နယ်၊ ဆင်ဖြူကျွန်းမြို့က စစ်တပ်စခန်းတွေကို အပြီးသတ် တိုက်ခိုက်သိမ်းယူမှာမို့လို့ မြို့နေလူထုအနေနဲ့ စလင်းမြို့နယ်ဘက်ကိုတိမ်းရှောင်ဖို့ စလင်းမြို့နယ်ပြည်သူ့ကာကွယ်ရေးအဖွဲ့က သတင်းထုတ်ပြန်ပါတယ်။
“ စစ်ရေး အရေးပေါ်သတိပေးထုတ်ပြန်ချက်” အဖြစ်ဒီဇင်ဘာလ ၂၅ ရက် မနက် ၇နာရီခန့်မှာ ထုတ်ပြန်တာဖြစ်ပါတယ်။
မနက် ၈နာရီ ညနေ ၆နာရီ အတွင်း စလင်းမြို့နယ်ဘက်သို့သွားလာနိုင်ကြောင်းအသိပေးထားပါတယ်။
Public Service Announcement
ပြည်သူတွေအနေနဲ့ စစ်ကောင်စီကားတွေနဲ့ အနီးကပ်သွားလာတာကိုရှောင်ကြဉ်ကြဖို့လည်း သတိပေးထားပါတယ်။
စလင်းနဲ့ ဆင်ဖြူကျွန်းမြို့နယ်ထဲကနေရာတချို့မှာလည်း စစ်ရေးတင်းမာနေပြီးစစ်တပ်က လေကြောင်းကနေ ဗုံးကြဲနေလို့တော်လှန်ရေးတပ်တွေက သတိပေးချက်တွေထုတ်ထားပါတယ်။
စခန်းသိမ်းတိုက်ပွဲအပြီးသတ်တိုက်တော့မှာမို့လို့ ဒေသခံတွေရဲ့လုံခြုံရေးအတွက် သတိပေးချက်ထုတ်တာလို့ကာကွယ်ရေးရဲဘော်တဦးကပြောပါတယ်။
ဒီဇင်ဘာ ၂၃ ရက်ကစပြီး ဆင်ဖြူကျွန်းမြို့က စစ် ကောင်စီဂိတ်စခန်းတွေကို တော်လှန်ရေးတပ်ဖွဲ့တွေ ဝင်ရောက်စီးနင်းခဲ့ပြီး မနေ့က(ဒီဇင်ဘာ ၂၄ ရက်)အထိ မြို့တွင်းတိုက်ပွဲတွေဖြစ်နေတာလို့ သ တင်းရင်းမြစ်တွေက ပြောပါတယ်။
“ စစ်ကောင်စီရဲ့ ဂိတ်စခန်းတချို့ စီးနင်းထားနိုင်တယ်။အပေါင်းလက္ခဏာ ရှိတယ်” လို့ ဆင်ဖြူကျွန်း မြို့မြေပြင်တိုက်ပွဲမှာရှိနေတဲ့ သတင်းရင်းမြစ်က ပြောပါတယ်။
ဆင်ဖြူကျွန်းမြို့တိုက်ပွဲမှာစစ်တပ်ကလေကြောင်း၊ရေယာဥ်တွေနဲ့ ခုခံနေပြီးမြေပြင်အင်အားတွေပါ ဖြည့်တင်းထားတယ်လို့သိရပါတယ်။
“ ဆင်ဖြူကျွန်းနဲ့ စလင်းလမ်းပိုင်းကို ဒီမနက်ဖွင့်လိုက်ပြီ။တော်တော်များများရွှေ့နေကြပြီ” လို့ ဆင်ဖြူကျွန်းဒေသခံတစ်ဦးက ပြောပါတယ်။
စလင်းမြို့ နဲ့ ဆင်ဖြူကျွန်းမြို့ က အိမ်စီးကားတွေ အားလုံးမှန်ချမောင်းဖို့ နဲ့လုံခြုံရေးအရမှန်ချမ မောင်းတဲ့ယာဉ်တွေကို စစ်ရေးအရ တာဝန်ယူမှာ မဟုတ်ဘူးလို့ စလင်းပကဖ က သတိပေးပါတယ်။
ဒီဇင်ဘာလ၂၄နေ့ညကလည်းဆင်ဖြူကျွန်းမြို့နယ်ထဲက စလင်းချောင်းနဲ့ ဧရာဝတီမြစ်ကြောင်း တလျှောက်ကို စစ်ကောင်စီကလေကြောင်းကနေ ဗုံးအလုံး ၄၀ ကျော်ကြဲသွားပါတယ်။
“ စစ်ရေးက သိတဲ့အတိုင်း မှန်းမရဘူး။ စခတွေကို PDFတွေက တိုက်တော့မှာ။ အခုကျွန်တော်တို့လည်းပြေးနေပြီ။ ပျော်လည်းပျော်တယ်။ ပွဲပြီးမှအေးမှာ” လို့ မြို့ခံတစ်ဦးကပြောပါတယ်။
ဆင်ဖြူကျွန်းမြို့မှာ လူဦးရေ ၆,၈၀၀ ဝန်းကျင်ရှိတယ်လို့ ၂၀၁၉ ခုနှစ် စလင်းမြို့နယ်လူဦးရေးစာရင်းမှာ ဖော်ပြထားပါတယ်။
အခုနှစ် ဇူလိုင်လက စလင်းမြို့နယ်၊တညောင်တိုက်နယ်က ရဲစခန်းကို ကာကွယ်ရေးတပ်တွေ သိမ်းပိုက်ထားပါတယ်။
တော်လှန်ရေးအင်အားစုတွေ ထိန်းချုပ်ထားတဲ့ စလင်း-ဆင်ဖြူကျွန်း-တညောင်လမ်းပိုင်းကို စစ်တပ်က အခုနှစ်စပိုင်းကတည်းက အင်အားရာချီသုံးပြီး စစ်ကြောင်းထိုးခဲ့ပါတယ်။
အဲဒီစစ်ကြောင်းတွေမှာ ပခုက္ကူမြို့အခြေစိုက်တပ်မ (၁၀၁) လက်အောက်ခံတပ်တွေနဲ့ မကွေးမြို့အခြေစိုက် ခလရ (၂၅၃၊၂၅၄ နှင့်၂၅၅) တပ်ရင်းတွေ ပါဝင်ပါတယ်။
စလင်းမြို့နယ်က မကွေးတိုင်းအနောက်ဘက်ခြမ်းမှာရှိပြီး ဆော၊ဆိပ်ဖြူ၊ချောက်၊ရေနံချောင်း၊ပွင့်ဖြူ နဲ့ စေတုတ္တရာမြို့နယ်တွေနဲ့ ထိစပ်နေပါတယ်။
