ဇန်နဝါရီ၃၊၂၀၂၆။ ဇေအောင်/People’s Spring
စစ်ကိုင်းတိုင်း၊ မုံရွာမြို့နယ်၊ ညောင်ပင်ကျေးရွာက ရေတွင်းမှာ ဒေသခံပြည်သူတွေရေချိုးနေချိန် စစ်ကောင်စီတပ်က လေကြောင်းတိုက်ခိုက်လို့ ကလေးတစ်ဦးသေဆုံးကာ ခုနစ်ဦးထက်မနည်း ဒဏ်ရာရခဲ့ပါတယ်။
ဇန်နဝါရီ ၂ရက် ညနေ ၄နာရီခန့်က မုံရွာမြို့နယ် အရှေ့တောင်ခြမ်းမှာရှိတဲ့ ညောင်ပင်ကျေးရွာက ရေတွင်းမှာ ပြည်သူတွေရေချိုးနေချိန် အနောက်မြောက်တိုင်းစစ်ဌာနချုပ်(နမခ)ကနေ ဂျိုင်ရိုကော်ပတာ ၂စီးနဲ့ လေကြောင်းတိုက်ခိုက်ခဲ့တာလို့ ဒေသခံတွေက ပြောပါတယ်။
အဲဒီလေကြောင်းတိုက်ခိုက်မှုကြောင့် (၁၂)နှစ် အရွယ် ကလေးတစ်ဦး လည်ပင်းဗုံးစထိမှန်သေဆုံးခဲ့ပြီး အမျိုးသမီး ခုနစ်ဦးထက်မနည်း ထိခိုက်ဒဏ်ရာရရှိခဲ့ကြောင်း မုံရွာကင်းထောက် များအဖွဲ့က ပြောပါတယ်။
Public Service Announcement
” ခွေးတွေချတာက စာသင်ကျောင်းကိုချတာ။စာသင်ကျောင်းပေါ်မကျဘဲနဲ့ ကျောင်းနားက ရွာကရေချိုးကြတဲ့ရေတွင်းနား နှစ်လုံးညှပ်ကျတာဗျာ။ ချတာလည်းနှစ်လုံးပဲ။ စိုးရိမ်ရတဲ့လူတွေလည်းရှိတယ်။ ကလေးတစ်ယောက်ကတော့ အဲနားမှာတင်ပဲဆုံးသွားတာ လည်ချောင်းနဲ့ရင်အုံ အစမှန်ပြီး။ ရေချိုးချိန်ဆိုတော့ အထိများတာပေါ့” လို့ ဒေသခံအမျိုးသားတစ်ဦးက ပြောပါတယ်။
ထိခိုက်ဒဏ်ရာရသူတွေဟာ ပေါင်၊ ကျော၊ လက်တို့မှာ ဒဏ်ရာရထားပြီး ဆေးကုသနေရကြောင်း စုံစမ်းသိရှိရပါတယ်။
စစ်ကောင်စီဟာ ၎င်းတို့လုပ်မယ့်ရွေးကောက်ပွဲလုပ်မယ့် ဒီဇင်ဘာအတွင်းမှာ ပြည်သူတွေကို လေကြောင်းတိုက်ခိုက်မှုတွေ ဆက်တိုက် ပြုလုပ်နေပြီး ဒီဇင်ဘာတစ်လတည်း စစ်တပ်ရဲ့ လေကြောင်းတိုက်ခိုက်မှုကြောင့် ဒေသခံပြည်သူ ၁၅၀ကျော် သေဆုံးခဲ့ပြီး အနည်းဆုံး ၁၈ဝကျော် ထိခိုက်ဒဏ်ရာရခဲ့ပါတယ်။
