ဖေဖော်ဝါရီ-၁၈၊၂၀၂၆။ရောင်နီ/People’s Spring
ရန်ကုန်မြို့၊ ရွှေပြည်သာမြို့နယ် ဝါးတရာစက်မှုဇုန်က အထည်ချုပ်စက်ရုံမီးလောင်မှုမှာ အလုပ်သမား ၂ဦး သေဆုံးတယ်လို့ ရွှေပြည်သာမြို့နယ် အထည်ချုပ်အလုပ်သမားသမဂ္ဂက ထုတ်ပြန်ပါတယ်။
မီးလောင်တဲ့ စက်ရုံမှာ M-Brother ဖြစ်ပြီး စက်ရုံတစ်ခုလုံး လောင်ကျွမ်းကာ အလုပ်သမား ၂ဦးသေဆုံးတာ အတည်ပြုနိုင်တယ်လို့ ဆိုပါတယ်။
ဒီကနေ့ ဖေဖော်ဝါရီ ၁၈ရက် နေ့လည် ၁၂ နာရီကျော်မှာ မီးလောင်မှုစတင်ခဲ့တာဖြစ်ပြီး အထည်လိပ်တွေ မီးလောင်နေတာကြောင့် မီးများခဲ့တယ်လို့ သွားရောက်မီးငြှိမ်းသတ်နေသူတွေက ပြောပါတယ်။
Public Service Announcement
မီးလောင်မှုကို Level-2 အဆင့်မီးငြှိမ်းသတ်ယာဉ်တွေနဲ့ ငြှိမ်းသတ်နေတာဖြစ်ပြီး နေ့လည် ၁ နာရီ ၄၀မိနစ်မှာ မီးထိန်းနိုင်ခဲ့ပေမယ့် ဆက်လက်မီးငြှိမ်းသတ်နေရဆဲဖြစ်တယ်လို့ ဒေသခံတွေနဲ့ မီးသတ်တွေက ဆိုပါတယ်။
အထည်ချုပ်စက်ရုံရဲ့ နှစ်ထပ်ဆောင် အောက်ထပ်မှာလောင်နေတာဖြစ်ပြီး မီးခိုးတွေလည်းများတာကြောင့် မီးသတ်တွေဝင်ရောက်ငြှိမ်းသတ်ဖို့ ခက်ခဲခဲ့တယ်လို့လည်း သိရပါတယ်။
မီးသတ်တပ်ဖွဲ့ကတော့ မီးလောင်မှုနဲ့ ပတ်သက်ပြီး မီးငြှိမ်းသတ်နိုင်တဲ့အချိန်ကို လက်ရှိအချိန်အထိ ထုတ်ပြန်ထားတာမရှိသေးပါဘူး။
(M-Brother စက်ရုံမီးလောင်နေတာကို တွေ့ရစဉ်။ ဓာတ်ပုံ − ရွှေပြည်သာအရန်မီးသတ်)
