▪️မီးသတ်တပ်ဖွဲ့က ည၈ နာရီ ၅၈မိနစ်မှာ မီးငြိမ်းဟု လိမ်လည်ထုတ်ပြန်
ဖေဖော်ဝါရီ-၁၈၊၂၀၂၆။ရောင်နီ/People’s Spring
ရန်ကုန်မြို့၊ ရွှေပြည်သာမြို့နယ် ဝါးတရာစက်မှုဇုန်က အထည်ချုပ်စက်ရုံမီးလောင်မှုကို ၁၀နာရီကျော်ကြာတဲ့အထိ ငြှိမ်းသတ်နေရဆဲဖြစ်ပြီး ညဘက်ရောက်လာတာကြောင့် မီးဆလိုက်တွေထိုးကာ ငြှိမ်းသတ်နေရတယ်လို့ လူမှုကူညီရေးအသင်းတွေက အသိပေးထားပါတယ်။
” အသင်းပိုင်မီးသတ်ရေစုပ်စက်ပြန်ချပြီး ရှေ့တန်းမီးလောင်ပြင်နေရာ စာမျက်နှာဖွင့်ပြီး ပြန်ဝင်ပေးနေတယ်။ မီးခိုးကလုံးနေတော့ အထဲထိ တော်တော် တိုးနေရ” လို့ အနာဂတ်အလင်းတန်း ပရဟိတအသင်းက ည ၉နာရီကျော်မှာ ရေးသားထားပါတယ်။။
အခြားပရဟိတအသင်းတွေရဲ့ပေ့ခ်ျတွေမှာလည်း ည ၁၀နာရီကျော်သည်အထိ မီးလောင်မှုကိုငြှိမ်းသတ်နေရဆဲဖြစ်တဲ့အကြောင်း တိုက်ရိုက်လွှင့်ပြီး အသိပေးထားပါတယ်။
Public Service Announcement
အဲဒီမီးလောင်မှုကို မြေပြင်မှာ လက်ရှိအချိန်အထိ ငြှိမ်းသတ်နေရတဲဖြစ်ပေမယ့် မြန်မာနိုင်ငံမီးသတ်တပ်ဖွဲ့ရဲ့ဖေ့စ်ဘွတ်ခ်မှာတော့ ည ၈နာရီ ၅၈ မိနစ်မှာ မီးငြိမ်းသွားတယ်လို့ လိမ်လည်ထုတ်ပြန်ထားပါတယ်။
မီးသတ်တပ်ဖွဲ့က Level 2 အဆင့်မီးငြှိမ်းသတ်ယာဉ် တွေနဲ့ အနီးပတ်ဝန်းကျင်ကို မကူးစက်အောင် နေ့လည် ၁ နာရီ ၄၀မိနစ်ကတည်းက ထိန်းနိုင်ခဲ့ပေမယ့် အထည်ချုပ်စက်ရုံဖြစ်တာကြောင့် လောင်စာအားကောင်းတာဖြစ်ပါတယ်။
မီးသတ်တွေအနေနဲ့လည်း မီးခိုးတွေကြောင့် ဝင်ရောက်ငြှိမ်းသတ်ဖို့ ခက်ခဲတာတွေရှိတယ်လို့ မြေပြင်မှာရောက်နေတဲ့ လူမှုကူညီရေးအသင်း တာဝန်ရှိသူတစ်ဦးက ပြောပါတယ်။
မီးလောင်တဲ့ စက်ရုံက M-Brother ဖြစ်ပြီး အလုပ်သမားနှစ်ဦးသေဆုံးသွားတာ အတည်ပြုနိုင်တယ်လို့ ရွှေပြည်သာမြို့နယ် အထည်ချုပ်အလုပ်သမားသမဂ္ဂက ဒီနေ့ နေ့လည်က အသိပေးထားပါတယ်။
မီးလောင်ချိန်ကြာမြင့်သလို မီးငြှိမ်းတဲ့ရေတွေထဲကနေ မီးသတ်နေရတာကြောင့် မီးသတ်တပ်ဖွဲ့ဝင်တွေရဲ့ ခြေထောက်တွေ အပူလောင်တာတွေရှိတယ်လို့ မီးသတ်တစ်ဦးက ပြောပါတယ်။
ဒီနေ့(ဖေဖော်ဝါရီ၁၈) နေ့လည် ၁၂ နာရီကျော်ကတည်းက စလောင်ခဲ့တဲ့ မီးလောင်မှုမှာ မီးသတ်တွေအပါအဝင် လူမှူကူညီရေးအသင်းတွေလည်းပါဝင်ငြှိမ်းသတ်နေပြီး ပြည်သူတွေလည်း မီးလောင်မှုမှာပါဝင်ကူညီသူတွေအတွက် အစားအသောက် ၊ ရေ ၊ အချိုရည်တွေ ကူညီပေးတယ်လို့ မျှဝေထားကြပါတယ်။
(ရွှေပြည်သာမြို့နယ် ဝါးတရာစက်မှုဇုန်က အထည်ချုပ်စက်ရုံမီးလောင်မှုကိုငြှိမ်းသတ်နေစဉ်။ ဓာတ်ပုံ − MFSD)
