■အမေရီကန်ကစစ်ကောင်စီကိုပဲပုပ်ဖတ်ရောင်းချမှုအပေါ် ပြည်သူတွေဝေဖန်
■ယခုကုန်သွယ်မှုက တရုတ်အစိုးရကိုဒေါသထွက်စေနိုင်ဟုရှမ်းပြည်နယ်မှကုန်သည်တဦးပြော
ဖေဖော်ဝါရီ-၂၆၊၂၀၂၆။နေ့သစ်/People’s Spring
အာဏာသိမ်းစစ်တပ်လက်အောက်ခံ အသင်းအဖွဲ့များမှလုပ်ငန်းရှင်များက အမေရီကန်နိုင်ငံမှ ပဲပုပ်ဖတ်တင်သွင်းရန်စီစဥ်ခြင်းမှာ စီးပွားရေးထက် အမေရီကန်အစိုးရရဲ့အာရုံစူးစိုက်မှုရအောင်စစ်အုပ်စုရဲ့ကြိုးပမ်းမှုဖြစ်တယ်လို့လုပ်ငန်းရှင်တွေကသုံးသပ်ကြပါတယ် ။
Public Service Announcement
စစ်ကောင်စီကဘဒေါ်လာရှားပါးမှုအကြောင်းပြချက်နဲ့ ဆေးဝါးမှအစ သွင်းကုန်အားလုံးတင်းကြပ်ထားလို့ ပြည်တွင်းမှာ သွင်းကုန် အားလုံးရှားပါးပြတ်လပ်နေချိန်မှာ အမေရီကန်မှ တိရစ္ဆာန်အစာ ပဲပုပ်ဖတ်ကိုတကူးတက တင်သွင်းမှုအပေါ်ပြည်သူတွေက ဝေဖန်နေကြပါတယ် ။
မြန်မာနိုင်ငံသို့ ပဲပုတ်ဖတ်ရောင်းချရန် အမေရိကန်တင်ပို့ရောင်းချသူနဲ့ မြန်မာဝယ်ယူသူများအကြား သဘောတူညီချက်အသစ် လက်မှတ်ရေးထိုးပွဲကို အမေရိကန်သံရုံးမှ မျက်မြင်တွေ့ကြုံခွင့်ရခဲ့တဲ့အတွက် ဝမ်းမြောက်ကြောင်း ရန်ကုန်ရှိအမေရီကန်သံရုံးက ဖေဖော်ဝါရီ ၂၅ ရက်မှာထုတ်ပြန်ပါတယ်။အခုလို မိတ်ဖက်ပူးပေါင်းဆောင်ရွက်မှုတွေက အမေရိကန်လယ်သမားတွေအတွက် ဈေးကွက်သစ်များ ဖော်ဆောင်ပေးတဲ့အပြင် ဒေသတွင်းမှာ ခိုင်မာတဲ့ ထောက်ပံ့ရေးကွင်းဆက်တွေနဲ့ ရေရှည်စီးပွားရေး အဆက်အသွယ်တွေကိုလည်း ပိုမိုအားကောင်းစေမယ်လို့ဖေည်ပြထားပါတယ် ။စီးပွားရေးတိုးတက်မှုကို အထောက်အကူပြုပြီး ထုတ်လုပ်သူတွေနဲ့ ဝယ်ယူသူတွေအတွက် အခွင့်အလမ်းသစ်များ ဖန်တီးပေးမယ့် ကုန်သွယ်ရေးအစီအစဉ်တွေကိုကြိုဆိုတယ်လို့လည်းအမေရီကန်သံရုံးကဆိုပါတယ်။
“စစ်အုပ်စုက သူတို့ကို အသိအမှတ်ပြုအောင်လို့ နည်းအမျိုးမျိုးနဲ့ချည်းကပ်နေတာ”လို့ သံရုံးရဲ့အောက်မှာ ပြည်သူတဦးကမှတ်ချက်ပြုပါတယ်။
“တရားမဝင် အာဏာသိမ်းထားတဲ့ အကြမ်းဖက် လူသတ် စစ်တပ် လက်အောက်ခံ ဝန်ကြီးဌာနတွေ/လူပုဂ္ဂိုလ်တွေနဲ့ လုပ်ငန်း တွဲလုပ်တော့မှာလား သိပါရစေခင်ဗျ”လို့ ပြည်သူတဦးကလည်း သံရုံးအောက်မှာမေးခွန်းထုတ်ထားပါတယ်။
ပဲပုတ်ဖတ်တင်သွင်းတာဟာ အမေရီကန်အစိုးရရဲ့ဒဏ်ခတ်ပိတ်ဆို့မှုခံထားရတဲ့ စစ်အုပ်စုက အမေရီကန်အစိုးရဆီက အာရုံစူးစိုက်မှုရအောင်လုပ်တာဖြစ်နိုင်တယ်လို့ ပို့ကုန်သွင်းကုန်လုပ်ငန်းရှင်တဦးကသုံးသပ်ပါတယ် ။
“လမ်းကြောင်းရှည်တဲ့ ကုန်သွယ်မှုမှာ ကွန်တိန်နာ စ ရိတ်စက အရမ်းဈေးကြီးတယ်။အခု ကုန်သွယ်မှုက ဒေါ်လာသန်းဆယ်နဲ့ချီရှိလို့ ဖြစ်ကောင်းဖြစ်နိုင်သလို အမေရိကန် အာရုံ စိုက်တာလိုချင်တာလည်း ပါလိမ့်မယ်”လို့ အထက်ပါပို့ကုန်သွင်းကုန် လုပ်ငန်းရှင်က ပြောပါတယ်။
ရွေးကောက်ခံအရပ်သားအစိုးရလက်ထက်တုန်းကအမေရိကန်က ပဲပုတ်ဖတ်တွေကိုမြန်မာနိုင်ငံကိုတင်သွင်းခဲ့ဖူးတယ်လို့သူကဆက်ပြောပါတယ်။
အမေရီကန်ပဲပုတ်ဖတ်ဟာ ပရိုတင်းများတာမို့တိရစ္ဆာန် အစာကျွေးရတဲ့သူတွေကကြိုက်ကြတယ်လို့သူကဆိုပါတယ်။
“မြန်မာပြည်မှာက မသွင်းလဲရတဲ့အခြေအနေ ရှိတယ်။မသွင်းတာလည်း အာဏာသိမ်းပြီး ၂၀၂၁ လောက်ကတည်းက ဖြစ်မယ်။နောက်ပြီး ပဲပုတ်ကဒီမှာလည်းထွက်တယ်”လို့ စိုက်ပျိုးရေးနိုင်ငံက အမေရီကန်မှပဲပုတ်ဖတ်ကို မသွင်းရင်လည်းရတဲ့အခြေအနေကိုလုပ်ငန်းရှင်တဦးကပြောပါတယ်။
အမေရီကန်ပဲပုတ်ဖတ်တင်သွင်းဖို့ သဘောတူ လက်မှတ်ရေးထိုးတာမှာ UMFCCI ရဲ့စိုက်ပျိုးရေး၊ မွေးမြူရေးနှင့် ရေလုပ်ငန်း ဖွံ့ဖြိုးတိုးတက်ရေးကော်မတီဥက္ကဌ ဦးရဲမင်းအောင် လက်မှတ်ရေးထိုးပါတယ်။ ဦးရဲမင်းအောင်က မြန်မာနိုင်ငံဆန်စပါးလုပ်ငန်းရှင်များအသင်းရဲ့ဥက္ကဌလည်းဖြစ်ပြီး အာဏာသိမ်းစစ်တပ်အတွက် ဆန်စပါး၊ဖွဲ့နုတင်ပို့မှုတွေကနေ နှစ်စဥ်ဒေါ်လာသန်းရာချီရအောင် တက်ကြွစွာလုပ်ပေးနေတဲ့သူလို့လုပ်ငန်းရှင်တွေကပြောပါတယ်။ဒါအပြင် စစ်တပ်ရွေးကောက်ပွဲကိုပြည်သူတွေ မဲမပေးပဲ သပိတ်မှောက်ကြဖို့တိုက်တွန်းနေကြချိန်မှာ သူကမဲပေးပြီးကြောင်းဖေစ်ဘွခ်မှာတင်ခဲ့တဲ့အတွက် ဝေဖန်ခံခဲ့ရသူလည်းဖြစ်တယ်လို့လုပ်ငန်းရှင်အချို့ကပြောပါတယ်။
“မယောင်ရာဆီလူး ။ကိုယ့်ဆီက ပဲဖတ်နှမ်းဖတ်တွေကိုတော့အိတ်စ်ပို့ တဲ့ တကယ်လိုအပ်တဲ့ အရေးကြီးဆေးဝါးနဲ့ဆက်စပ်ပစ္စည်းကြတော့ မသွင်းဘူး တိရိစ္ဆာန်အစာဖြစ်တဲ့ ပဲပုတ်ဖတ်တင်သွင်းတယ်ဆိုတော့ပြည်သူအပေါ်စေတနာ လုံးဝမရှိဘူးဆိုတာပေါ်လွင်ပါတယ်။”လို့ ပြည်သူတဦးကလည်းမှတ်ချက်ပြုပါတယ် ။
“ငါတို့သိတဲ့ အမေရိကန်ဆိုတာ စူပါပါဝါနဲ့ကမ္ဘာပေါ်က မတရားမှုမှန်သမျှကို ဦးဆောင်တွန်းလှန်ခဲ့သောအားကျဖွယ်နိုင်ငံ။ဒါတွေကအတိတ်မှာကျန်ခဲ့ပြီ။ လက်ရှိအမေရိကန်ဆိုတာ လေးစားဖွယ်မကောင်းတော့ဘူး။”လို့ အခြားပြည်သူတဦးကလည်းသံရုံးအောက်မှာမှတ်ချက်ပြုပါတယ်။
ရှမ်းပြည်နယ်က ကုန်သည်တဦးကတော့စစ်ကောင်စီက အမေရီကန်နဲ့ ကုန်သွယ်ရေးလုပ်ဖို့ကြိုးစားနေတာ တရုတ်အစိုးရကိုဒေါသထွက်စေနိုင်တယ်လို့သုံးသပ်ပါတယ် ။
“တရုတ်က စကစ အမေရိကန်ဘက် ယိမ်းသွားမှာကို စောင့်ကြည့်နေတာ။ ယိမ်းတာနဲ့ တမျိုးကစားမှာပဲ။ အခု ကုန်သွယ်တဲ့ သတင်းကို အမေရိကန်သံရုံးက ထုတ်တာကိုက ထူးတာ။ တရုတ်ကို ဒေသထွက်စေမှာ။ နယ်စပ်ကုန်သွယ်ရေးကိုပါ ပြန်တင်းကျပ်ပြီး စကစကို ပညာပြနိုင်တယ်”လို့အထက်ပါကုန်သည်ကပြောပါတယ်။
လက်ရှိမှာတရုတ်နှစ်သစ်ကူးရက်မို့ မြန်မာ-တရုတ်နယ်စပ်က မူဆယ်၊ချင်း ရွှေဟော်နယ်စပ်ဂိတ် တွေကနေ ကုန်စည်သယ်တာကို တရုတ်က ရပ်ထားပါတယ်။ကုန်သွယ်တဲ့အခါလည်း ဆေးဝါးတွေ နဲ့ စက်သုံးဆီတင်သွင်းတာကို အထူးတင်းကျပ်ထားပြီး စားသောက်ကုန်သာ အဓိက တင်သွင်းတာလို့ သိရပါတယ်။
စစ်ကောင်စီက အမေရီကန်မှ ပဲပုတ်ဖတ်တင်သွင်းမှုကို သတိထားစောင့်ကြည့်ရမှာဖြစ်ပေမယ့် မစိုးရိမ်းကြဖို့ ဖောက်ဖျက်မှုတွေရှိလာရင်လွှတ်တော်ကိုအကြောင်းကြားရမယ်လို့ နွေဦးတော်လှန်ရေးနဲ့ပတ်သက်တဲ့ဆောင်းပါးတွေကို နိုင်ငံတကာသ
တင်းဌာနတွေမှာပုံမှန်ရေးသားနေတဲ့ ဦးဂျမ်းစ်ရွှေကဖေစ်ဘွခ်မှာရေးထားပါတယ် ။အမေရီကန်အစိုးရက စစ်အုပ်စုနဲ့ခရိုနီတွေအပေါ်အရေးယူဒဏ်ခတ်မှုဟာ ဆက်ရှိနေပြီးပိတ်ဆို့အရေးယူမှု စည်းမျဉ်းများအောက်မှာ စားနပ်ရိက္ခာနဲ့သက်ဆိုင်တဲ့ ကုန်သွယ်မှုအဖြစ် ကန့်သတ်ခွင့်ပြုထားခြင်းသာဖြစ်တယ်လို့ အမေရီကန်ရောက်နိုင်ငံရေးတက်ကြွလှုပ်ရှားသူလည်းဖြစ်တဲ့ ဦးဂျိမ်းစ်ရွှေကဆိုပါတယ။ ဒါဟာ အမေရီကန်ကစစ်ကောင်စီကို နိုင်ငံရေးအရ ပုံမှန်ဆက်ဆံရေးပြန်လည်ထူထောင်တာ သို့မဟုတ် ထောက်ခံအားပေးတာ မဟုတ်ဖူးလို့ သူကဆက်လက်ရေးသားထားပါတယ်။
စစ်ကောင်စီကတော့အမေရီကန်အစိုးရနဲ့ထိတွေ့ဆက်ဆံနိုင်ဖို့ လော်ဘီကုမ္ပဏီတွေကိုဒေါ်လာသန်းချီပေးပြီးငှားရမ်းထားပါတယ် ။
