ဖေဖော်ဝါရီ-၂၈၊၂၀၂၆။မိုမို/People’s Spring
မကွေးတိုင်း၊ စလင်းမြို့နယ်မှာ စစ်တပ်မီးရှို့လို့ ပေါက်မကျေးရွာက နေအိမ်တွေ မီးလောင်ဆုံးရှုံးခဲ့တယ်လို့ ဒေသခံနဲ့မြို့နယ်အုပ်ချုပ်ရေးအဖွဲ့ဝင်တချို့က ပြောပါတယ်။
စစ်တပ် တပ်စွဲထားတဲ့ လင်းဇင်းနယ်မြေရဲစခန်း အနီးက ပေါက်မကျေးရွာမှာ အခု ဖေဖော်ဝါရီ၂၆ ရက် ည ၉ နာရီဝန်းကျင်က မီးရှို့ခဲ့တာလို့ ဆိုပါတယ်။
“တပ်ရင်းတွေ ထောင်ထားတဲ့မိုင်းတွေကို ရှင်းဖ်ို့ လင်းဇင်းဖက်ကခွေးတွေ ရှို့ခဲ့တာ လို့ ကနဦး သိထားပါတယ်။အိမ်ခြေ ၄၀ လောက် လောင်တယ်လို့ သတင်းရထားတယ်”လို့ စလင်းမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူက ပြောပါတယ်။
Public Service Announcement
မီးရှို့ခံရတဲ့ ပေါက်မရွာမှာ အိမ်ခြေ အစု ၅စုရှိပြီး မီးလောင်သွားတာက အောင်စေဆိုတဲ့ အစု ဖြစ်တယ်လို့လည်း အသိပေးပါတယ်။
လင်းဇင်းနယ်မြေရဲစခန်းက စလင်းချောင်းနံဘေးကပ်လျက်တောင်ဘက်မှာရှိပြီး ပေါင်းမကျေးရွာက စလင်းချောင်းဘေးကပ်လျက် မြောက်ဘက်မှာ ရှိပါတယ်။
မကြာခဏ တိုက်ပွဲဖြစ်နေတဲ့ စလင်းမြို့နယ်ကို စစ်တပ်က အင်အားဖြည့်တာအပြင် ကျေးရွာတွေကို ဒရုန်းတွေ၊ လက်နက်ကြီးတွေနဲ့ တိုက်ခိုက်မှုတွေရှိပါတယ်။
စလင်းမြို့နယ်မှာ ကျေးရွာ ၁၅ရွာ ထက်မနည်း စစ်ဘေးရှောင်နေရပြီး လူဦးရေ ၅,၀၀၀ ဝန်းကျင်က စားနပ်ရိက္ခာတွေ ဆေးဝါးတွေနဲ့ လူသုံးကုန်ပစ္စည်းတွေ လိုအပ်နေတယ်လို့ သိရပါတယ်။
ပြီးခဲ့တဲ့ ဇန်နဝါရီ ၁၈ ရက်က လင်းမြို့နယ်၊ မကျီးဖျားအုပ်စု၊ ကျောက်ခဲကုန်းရွာက စစ်ဘေးရှောင် တွေ လာရောက်နေထိုင်နေတဲ့ ဘုရားတန်ဆောင်းပေါ်ကို စစ်တပ်က ဒရုန်းနဲ့ ဗုံးလာကြဲလို့ အသက် (၇၀)အရွယ် အမျိုးသားတစ်ဦးနဲ့ (၁)နှစ်သားအရွယ်ကလေးငယ် သေဆုံးခဲ့ရပါတယ်။
