မတ်၂၊ ၂၀၂၆။ ထားမြတ်/People’s Spring
အာဏာသိမ်းစစ်ကောင်စီက သွေးခွဲရေးဗျူဟာကျင့်သုံးလျက်ရှိရာ ပအိုဝ်းအချင်းချင်း တိုက်ကြဆိုတဲ့ သွေးခွဲရေးဗျူဟာကို များစွာသတိထားဖို့ အမျိုးသားညီညွတ်ရေးအစိုးရ(NUG) ယာယီသမ္မတဒူဝါလရှီးလက သတိပေးပါတယ်။
ဒီကနေ့ ကျင်းပတဲ့ (၇၇)နှစ်မြောက် ပအိုဝ်းအမျိုးသားနေ့ အခမ်းအနားမှာ ယာယီသမ္မတက အခုလို ပြောကြားခဲ့တာပါ။
ပအိုဝ်းလူမျိုးတွေရဲ့အမျိုးသားရေးစိတ်နဲ့ ဘာသာရေးကိုင်းရှိုင်းမှုကို အသုံးချပြီး စစ်အာဏာရှင်အတွက် အင်အားဖြည့်ပေးသလို လုပ်ဆောင်နေတဲ့ စစ်ကော်မရှင်နဲ့ အပေါင်းအပါတွေကိုလည်းဝမ်းနည်းဖွယ်ရာ တွေ့ရကြောင်း ယာယီသမ္မတက ပြောပါတယ်။
Public Service Announcement
” အထူးသတိထားရမှာက ရန်သူဟာ အမြဲတမ်း သုံးတက်တဲ့ဟာက ပြည်သူကို ပြည်သူချင်းတိုက် ပအိုဝ်းဆို ပအိုဝ်းချင်းတိုက်ဆိုတဲ့ သွေးခွဲရေးကို သူ့ရဲ့ မဟာဗျူဟာ ဖြစ်တယ်။ အဲဒါကို ကျနော်တို့ အနေနဲ့ အရမ်းသတိထားရမှာ ဖြစ်ပါတယ်” လို့ ယာယီသမ္မတက ပြောကြားပါတယ်။
တောင်ကြီးမြို့မှာ ပြုလုပ်တဲ့ (၇၇)ကြိမ်မြောက် ပအိုဝ်းအမျိုးသားနေ့ မြင်ကွင်း။ ဓာတ်ပုံ – CJ 
တောင်ကြီးမြို့မှာ ပြုလုပ်တဲ့ (၇၇)ကြိမ်မြောက် ပအိုဝ်းအမျိုးသားနေ့ မြင်ကွင်း။ ဓာတ်ပုံ – CJ 
တောင်ကြီးမြို့မှာ ပြုလုပ်တဲ့ (၇၇)ကြိမ်မြောက် ပအိုဝ်းအမျိုးသားနေ့ မြင်ကွင်း။ ဓာတ်ပုံ – CJ 
တောင်ကြီးမြို့မှာ ပြုလုပ်တဲ့ (၇၇)ကြိမ်မြောက် ပအိုဝ်းအမျိုးသားနေ့ မြင်ကွင်း။ ဓာတ်ပုံ – CJ
လက်ရှိမှာ ပအိုဝ်းပြည်သူ့စစ် PNO/PNA ဟာ စစ်ကောင်စီနဲ့ ပေါင်းပြီး စစ်ကောင်စီရဲ့ စစ်ဆင်ရေးတွေမှာ ပါဝင်ဆောင်ရွက်နေတာ၊ စစ်ကောင်စီအတွက် စစ်အင်အားတွေ စုဆောင်ပေးတာတွေ လုပ်ဆောင်လျက်ရှိနေပါတယ်။ စစ်ကောင်စီနဲ့ PNO တို့ ပေါင်းပြီး ပအိုဝ်းတော်လှန်ရေးတပ် PNLO/PNLA အပါအဝင် တော်လှန်ရေးအင်အားစုတွေကို တိုက်ခိုက်နေတာလည်းဖြစ်ပါတယ်။
ပြည်သူတရပ်လုံး လွတ်မြောက်ရေးလုပ်ဆောင် နေတာဖြစ်လို့ ပအိုဝ်းလူထု လွတ်မြောက်ရေးဟာလည်း အရေးပါတဲ့ အခန်းကဏ္ဍဖြစ်ကြောင်း အသိပေးပါတယ်။
ဒါ့အပြင် ပအိုဝ်းအမျိုးသားရေးခေါင်းဆောင်တွေ အနေနဲ့ ပအိုဝ်းအမျိုးသားရေးစိတ်ကို နိုင်ငံရေးအရ လူမျိုးရေးအရ ကျစ်လစ်အောင် ဝိုင်းဝန်းလုပ်ဆောင်နိုင်မယ်လို့ မျှော်လင့်ကြောင်းလည်း ပြောပါတယ်။
လက်ရှိမှ စစ်အာဏာရှင်စနစ်အမြစ်ပြတ် ဖျက်သိမ်းရေးဟာ အလွန်အရေးကြီးတဲ့ ကဏ္ဍက ရှိနေတာမို့ ပအိုဝ်းခေါင်းဆောင်တွေအနေနဲ့ စစ်အာဏာရှင်စနစ် တိုက်ဖျက်ရေးကို အားသွန်ခွန်စိုက်လုပ်ဆောင်ဖို့လည်း ယာယီသမ္မတက တိုက်တွန်းပြီး စစ်အာဏာရှင်ကို ဆန့်ကျင်တဲ့ ပအိုဝ်းခေါင်းဆောင်တွေ အားလုံးနဲ့အတူတူ တသားတည်းရှိနေတယ်လို့ အသိပေးပါတယ်။
ဒါ့အပြင် စစ်ကောင်စီဟာ အတုအယောင် ရွေးကောက်ပွဲတွေပြုလုပ်ပြီး အုပ်ချုပ်ရေး အသက်ရှုပေါက်ချောင်အောင် လုပ်ဆောင်ခဲ့သလို သိပ်မကြာခင် အုပ်ချုပ်မှု ဖွဲ့စည်းမှု ပုံစံတခုကို ပြောင်းလဲပြီး အစိုးရသစ်လို့ နာမည်တပ် ပြည်သူကို ထပ်မံ လှည့်စားဖို့ လုပ်ဆောင်နေတာ အားလုံးအသိဖြစ်ဟု ယာယီသမ္မတက ပြောပါတယ်။
” ဒါတွေအားလုံးဟာ စစ်အာဏာရှင်အတွက် အာဏာသက်ဆိုးရှည်စေတဲ့ လုပ်ရပ်တွေဖြစ်သလို နိုင်ငံရေးအသက်ရှုပေါက်ချောင်စေဖို့ လှည့်စားလုပ်ဆောင်တဲ့ကိစ္စတွေဖြစ်ပါတယ်။ဒါတွေကို ပအိုဝ်းလူထု တရပ်လုံး ကျယ် ကျယ် ပြန့်ပြန့် သိနားလည်ဖို့ ကြိုးစားဖို့ လိုပါတယ်” လို့ ယာယီသမ္မတက ပြောပါတယ်။
ပအိုဝ်းအမျိုးသားနေ့ အခမ်းအနားမှာ ပြည်ထောင်စုလွှတ်တော်ကိုယ်စားပြုကော်မတီ(CRPH) ဥက္ကဋ္ဌ ဦးအောင်ကြည်ညွန့်ကလည်း အမှာစကား ပြောကြားခဲ့ပါတယ်။
ပအိုဝ်းအမျိုးသားတွေအနေနဲ့ တခုတည်းသော အလံတော်အောက်မှာ စုစည်းညီညွတ်ပြီး အကြမ်းဖက်စစ်အာဏာရှင် အမြစ်ပြတ်တဲ့အထိ စုပေါင်းရုန်းကန် မှုကြောင့် ရလဒ်ကြီးကြီးမားမား ရမယ်လို့ ယုံကြည်ကြောင်း ပြောပါတယ်။
ဒါ့အပြင် ဖက်ဒရယ်ဒီမိုကရေစီပြည်ထောင်စုမှာ လူမျိုးတမျိုးချင်းစီအတွက် လွတ်လပ်မှု တန်းတူညီမျှမှု တရားမျှတမှု တို့ရရှိခံစားနိုင်ဖို့ အတူတကွ ချစ်ကြည်ရင်းနှီးစွာ ပေါင်းစည်းဆောင်ရွက်သွားနိုင်ပါစေလို့လည်း CRPH ဥက္ကဋ္ဌက ဆန္ဒပြုခဲ့ပါတယ်။
